21 Айдин буян из-дерики елинмайватқан дохтур гүлшән аббасниң тутқунда икәнлики дәлилләнди

Мухбиримиз шөһрәт һошур
2020-05-29
Елхәт
Пикир
Share
Принт
Үрүмчи нурбағ нефит дохтурханисиниң пенсийигә чиққан дохтури гүлшән аббас ханим. 2015-Йили вашингтон.
Үрүмчи нурбағ нефит дохтурханисиниң пенсийигә чиққан дохтури гүлшән аббас ханим. 2015-Йили вашингтон.
Photo: RFA

Йеқинқи икки йилдин буян хәлқара сәһниләрдә исми көп тилға тилға елинған, әмма һечқандақ учури елинмай кәлгән ғайиб уйғурлардин бири үрүмчи нурбағ нефит дохтурханисиниң пенсийигә чиққан дохтури, вашингтондики паалийәтчи рошән аббасниң һәдиси гүлшән аббастур. Айлардин бери өзлириниң гүлшән аббас исимлик бир дохтури болғанлиқини рәт қилип кәлгән мәзкур дохтурхана хадимлири бу қетим мухбиримизниң соаллириға җавабән гүлшән аббасниң тутқунда икәнликини дәлиллиди.

Гүлшән аббасниң америкада яшаватқан икки қизи үрүмчидики уруқ-туғқан, тонуш-билишлири вә һәтта сақчи органлиридин аписи һәққидә һечқандақ учурға еришәлмигәндин кейин вашингтондики хитай әлчиханисиға тохтимай хәт язған, телефон қилған. Әмма анисиниң нәдә икәнлики, телефониниң немә үчүн елинмайдиғанлиқи, тутқунда яки әмәсликидин ибарәт толиму аддий бир соалға җаваб тапалмиған.

Гүлшән аббасниң хизмәт орниға қарита айлардин бери елип барған телефон зиярәтлиримизму изчил җавабсиз қалдурулди. Хадимлар бәзидә гүлшән аббасни тонумайдиғанлиқини билдүрсә, бәзидә бу орунда бундақ бир хизмәтчиниң болғанлиқиниму инкар қилип кәлди.

Гүлшән аббасниң америкада яшаватқан икки қизи вә үч қериндиши 3 йилдин буянқи омумий уйғур вәзийитигә қарап туруп, болупму уруқ-туғқан вә тонуш-билишлириниң гүлшән ханим һәққидә еғиз ачалмаслиқиға қарап туруп униң тутқунда икәнликини көңлидә җәзмләштүргән. Улар шуниңдин кейин, гүлшән аббасниң қәйәрдә тутуп турулуватқанлиқи вә аталмиш «җинайити» ниң немә икәнлики һәққидә издәнгән. Паалийәтчи рошән аббас бу һәқтә мәлуматқа еришиш үчүн паалийәтлиригә бирләштүрүп һәдиси гүлшән аббасниң әһвалини хәлқара сәһниләргә елип чиққан. Ачисиниң кәспий тәрбийәләргә еһтияҗи йоқлуқи, униң бир тәҗрибилик дохтур икәнликини сорунларда көп қетим тәкитлигән. Бу мәсхирилик шикайәтләрму хитай даирилирини зуванға кәлтүрәлмигән.

Телефонимизни қобул қилған тәвәликтики сақчи хадимлириму ғайиблар мәсилисиниң «дөләт мәхпийәтлики» икәнликини тәкитләп, соалимизға җаваб бәрмиди.

Хитай лагерларни тақиғанлиқини елан қилип дуняниң көзини бойиғанда гүлшән аббасниң қизлири вә қериндашлири «бизму уйғур», «қериндашлиримиздин техичә хәвәр йоқ» дегән намлардики һәштәг паалийәтлиригә қетилған. Хитай даирилири бу һәрикәткә җавабән бир түркүм паалийәтчиләрниң уруқ-туғқанлирини екранда көрситишкә мәҗбур болған вә уларниң тутқунда әмәслики һәққидә һекайиләрни тоқуп чиққан, әмма гүлшән аббас һәққидә йәнила һечнемә дейилмигән.

Биз шу күнләрдә гүлшән аббас ишлигән дохтурханиға телефон қилип әһвал сүрүштә қилдуқ. Дохтурхана хадимлири бу қетим бу тоғрида дохтурханиниң песийонерлар бөлүмидин мәлумат елишимизни тәвсийә қилди.

Бу узунға созулған җавапсизлиқ вә из-дерексизлик гүлшән аббасниң вашингтондики аилә тавабиатлирини техиму әндишигә салиду. Қизи зиба муратниң радийомизға баян қилишичә, гүлшән аббас актип иҗтимаий паалийәтләрдин чекингән бир пенсийонер, икки пәрзәнтиниң оқуш вә аилә ишлириға өзини атиған бир аилә аяли, униң 21 айғичә соливелинип тәкшүрүлгүдәк бир иш-изи мәвҗут әмәс. Бу нуқтини көздә тутқан паалийәтчи рошән аббас паалийәтлири давамида хитайниң һәдисини гөрүгә еливелиш йоли билән өзини паалийәттин тосмақчи болғанлиқини илгири сүриду вә һәдисиниң тутулушиниң өзиниң 2018‏-йили һудсун институтида уйғур вәзийити һәққидә сөз қилишиниң арқисидинла йүр бәргәнликини буниңға пакит қилип көрситиду вә хитай дөлитиниң бу қилмишини бандитлиққа охшитиду һәмдә уларни террорлуқ билән әйибләйду.

Телефонимизни бу қетим қобул қилған дохтурхана пенсийонерлар ишханисиниң хадими гүлшән аббасниң әң йеқинда маашини қачан алғанлиқи һәққидики соалимизға җавабән униң тутқунда икәнликини ашкарилиди.

Телефонимизни қобул қилған кадирлар бөлүминиң хадими гүлшән аббасни қайси сақчи оргини тутқанлиқи һәққидики соалимизға җавабән униң тутқунда икәнлики һәққидә дохтурхана ичидә уқтуруш тарқитилғанлиқини ашкарилиди. У йәнә хизмити мунасивити билән гүлшән аббас делосиға алақидар бир қисим материялларни көргәнликиниму тилға алди.

Мәлум болушичә, ғайиб гүлшән аббас ханим өзиниң 2 яшлиқ иккинчи нәврисини техи көрүп бақмиған вә бир йерим яштин ашқан үчинчи нәврисиниң туғулғанлиқидин техи хәвәрсиз икән. Бу түр гөрүгә еливелишниң пүтүн уйғур паалийәтчилири вә уларниң аилә тавабиатлириға еғир азабларни елип кәлгәнликини тилға алған рошән аббас буниң йәнә өзлириниң хитайға қарши паалийәтлиридә қоллиридики күчлүк бир қоралға айланғанлиқи, хитайниң пәрдазлап келиватқан зулум вә қирғинчилиқлирини ечип ташлишида муһим рол ойниғанлиқини әскәртти. У уйғур паалийәтчилириниң бу түр тосалғулар нәтиҗисидә техиму чениқидиғанлиқи вә бу түр дөләт террорлуқи үстидин ғалип келидиғанлиқини тәкитлиди.

Пикирләр (0)
Share
Толуқ бәт