Җәнубий австралийә парламенти д у қ һәйитигә бир қатар вәдиләрни бәргән

Ихтиярий мухбиримиз әркин тарим
2022.11.30
Share on WhatsApp
Share on WhatsApp
awstraliye-guwahliq-2.jpg Аделайд шәһиридики бир қисим уйғур җамаити гуваһлиқ бериш үчүн кәлгән лагер шаһитлири вә д у қ вәкиллирини айродурумда күтивалди. 2022-Йили 29-ноябир.
RFA/Erkin Tarim

Дуня уйғур қурултийи вә лагер шаһитлиридин тәркиб тапқан бир һәйәт, 11-айниң 29-күни австралийәниң аделайд шәһиридики җәнубий австралийә йәрлик парламентида гуваһлиқ берип, уйғурларниң һазирқи еғир вәзийити тоғрисида әтраплиқ мәлумат бәргәндин кейин бәзи тәләплирини йәткүзгән. Парламент әзалири мәзкур тәләпләрни аңлиғандин кейин бәзи вәдиләрни бәргән.

Мәзкур паалийәт һәққидә мәлумат игиләш үчүн дуня уйғур қурултийиниң программа директори зумрәтай әркин ханим билән сөһбәт елип бардуқ.

Зумрәтай әркин ханим бу паалийәтниң бурунқи паалийәтләргә охшимайдиған тәрипи һәққидә тохтилип мундақ деди: “бүгүнки паалийәтниң башқа паалийәтләргә охшимайдиған тәрипи, әлвәттә җәнубий австралийә парламенти федератсийә парламентиға охшимайду. Бу йәрлик парламент федератсийә парламентниң ишлириға арилишип кәтмәйду. Ташқи сиясәт билән дөләт мудапиә сияситигә арилишип кәтмәйду. Шуңа бу парламент әзалири җәнубий австралийәдә туруватқан уйғурлар үчүн немә қилип берәләймиз? дәп сориди. Булар лагер шаһитлирини аңлиғандин кейин интайин һаяҗанланди. Шундақла биз бундин кейин конкрет иш қилишқа өтимиз дәп вәдә бәрди. Җәнубий австралийәдики уйғурларниң тәләп-пикирлирини игилиди. Биз җәнубий австралийәдики уйғурларниң җиддий тәһдиткә учраватқанлиқини, австралийә һөкүмитиниң буларниң бихәтәрликини қоғдиши керәкликини ейттуқ. Йәнә бир муһим нәрсә австралийә федератсийә парламентида музакиригә қоюлидиған ‛мәҗбурий әмгәк билән ишләп чиқирилған малларни чәкләш‚ қануниниң мақуллиниши үчүн күч чиқиришини тәләп қилдуқ”.

Д у қ вә лагер шаһитлиридин тәркиб тапқан бир һәйәт австралийәниң аделайд шәһиридики җәнубий австралийә йәрлик парламентида гуваһлиқ бәрди. 2022-Йили 29-ноябир.

Австралийә уйғур җәмийити, д у қ вә австралийә тәңритағ ханим-қизлар җәмийити бирликтә уюштурған җәнубий австралийә штатлиқ парламентида өткүзүлгән гуваһлиқ бериш йиғинида икки нәпәр лагер шаһити гуваһлиқ бәргәндин сирт зумрәтай әркин ханим уйғурларниң һазирқи еғир вәзийити вә уйғур дәвасиниң нөвәттики йүзлиниши тоғрисида мәлумат бәргән. Доклат бериш йиғининиң ахирида йиғин әһли доклат бәргүчиләрдин соал сориған. 20 Әтрапида йәрлик парламент әзасии уйғур һәйәтниң тәләплирини аңлиғандин кейин‚мәҗбурий әмгәк билән ишләп чиқирилған мәһсулатларниң австралийәгә елип кирилишини чәкләш‚кә охшаш бир қатар мәсилиләрни һәл қилиш үчүн күч чиқиридиғанлиқи тоғрисида вәдә бәргән. Лагер шаһити өмәрбек али әпәнди бу һәқтә мәлумат бәрди.

Мәзкур һәйәт 29-ноябирда җәнубий австралийә парламентида доклат бериватқанда аделайдта туруватқан көп сандики уйғур парламент бинасиниң алдида хитайға қарши наразилиқ намайиши өткүзгән. Лагер шаһити қәлбинур сидиқ ханим бу һәқтә мәлумат бәрди.

Д у қ вә лагер шаһитлиридин тәркиб тапқан бир һәйәт австралийәниң аделайд шәһиридики җәнубий австралийә йәрлик парламентида гуваһлиқ бәрди. 2022-Йили 29-ноябир.

Мәзкур һәйәт австралийәниң пайтәхтидики федератсийә парламентида вә сиднейдики штатлиқ парламентта гуваһлиқ бериш йиғиниға иштирак қилип, уйғур ирқий қирғинчилиқини етирап қилишини тәләп қилғандин сирт бәзи конкрет тәләпләрни оттуриға қойған. Ундақта җәнубий австралийә парламентида елип берилған бу паалийәтниң әһмийити немә? аделайдтики тәңритағ ханим-қизлар җәмийитиниң рәиси рамилә чанишеф ханим бу һәқтә тохталди.

Д у қ рәиси долқун әйса башчилиқидики һәйәтниң австралийәдики 10 күнлүк зиярити пайтәхт канберрадин башланғаниди. Мәзкур һәйәт сиднейдики зияритини ахирлаштуруп, аделайдқа йетип кәлгән. Д у қ рәиси долқун әйса әпәнди үрүмчидики от кетиш вәқәсидин кейин австралийә зияритигә хатимә берип мюнхенға қайтип кәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.