Amérika-xitay istratégiyelik riqabet pewqul'adde komitétining ezaliri otturigha qoyghan teklipler Uyghurlargha ümid berdi

23-Mart küni kechte amérika dölet mejlisi qarimiqidiki amérika-xitay istratégiyelik riqabet pewqul'adde komitéti mexsus guwahliq yighini ötküzdi. Yighinda Uyghur qirghinchiliqini yene bir qétim mu'eyyenleshtürüldi.

Mezkur yighin'gha a'ile tawabi'atliri her xil shekilde tutqunda turuwatqan Uyghurlarmu qatnashqan bolup, ular yighinda xitay hökümitining Uyghurlargha yürgüzüwatqan irqiy qirghinchliqining janliq shahitliri idi.

Aldinqi yili 12-ayning axiridin bashlap iz-déreksiz ghayip bolghan 19 yashliq singlisi kamile wahitning süritini kötürüp yighin'gha qatnashqan kewser wahit 23-mart kechtiki yighin heqqide radiyomizning ziyaritini qobul qilidi. U amérika dölet mejlisi ezalirining üch sa'etlik yighin jeryanida xitaygha qaratqan keskin sözliridin singlisini öz échige alghan barliq tutqundiki Uyghurlarning xitayning zulumidn pat arida qutulidighanliqigha bolghan ishenchisining ashqanliqni bildürdi.

Uning xénen ölkisining shyangchyu sana'et institutida oquwatqan 19 yashliq singlisi kamile wahitning ötken yili 12-ayning béshida qishliq tetil qilip yurtigha qaytqinida tutqun qilin'ghanliqi, radiyomiz teripidin delillen'genidi.

Iz-déreksiz ghayib bolghan a'ile-tawabi'atlirining awazi bolush üchün yighin'gha qatnashqanlarning arisida yene 2017-yili tutqun qilin'ghan Uyghur aptonom rayonluq ormanchiliq nazaritining sabiq naziri memet abdullaning qizi sübhi memet, iz-déreksiz ghayip bolghan seypidin hémtning oghli dilyar seypidin we pasporti tartiliwélin'ghanliqi üchün besh yashliq qizini bir qétimmu yüz turane körüp baqmighan ablimit ablizning ayali adalet sabit qatarliqlarmu bar idi.

Adalet sabit ra'iyomizgha söz qilip, besh yashliq qizi erden'ay bilen yoldishining resimini tutup turghanda, amérika-xitay istratégiyelik riqabet pewqul'adde komitéti mexsus guwahliq yighinining re'isi awam palata ezasi mayk gallagér (Rep. Gallagher) Ependi ularning yénigha kelgen. Gallagér ependi adalet xanimning besh yashliq qiz erden'aygha qarap turup: “Biz pütün küchimiz bilen a'ilingizni jem qilimiz” dégen.

Mezkur yighinda amérika dölet mejlisi ezaliri ayrim-ayrim halda Uyghurlar uchrawatqan irqiy qirghinchiliq toghrisida amérikaning téximu küchlük we emeliy bolghan tedbirlerni élishi zörürlikini otturigha qoydi. Bu teklip-pikirler yighin'gha qatnashqan Uyghurlargha küchlük ümid béghishlidi.