Һәптилик хәвәрләр (22-марттин 28-мартқичә)

Әркин асия радиоси уйғур бөлүми һәптилик хәвәрлири

Рабийә қадир ханим шиветсийә зиярити давамида муһим паалийәтләрдә болди

Дуня уйғур қурултийиниң рәиси рабийә ханим җәнвәдики йиғинни мувәппәқийәтлик аяғлаштуруп, 21-март күни чүштин кейин шиветсийәгә йетип кәлгән.

Шиветсийәдә уйғур комитетиниң орунлаштуруши билән 23-март күни чүштин кейин ситокһолмда рабийә қадир ханимни қарши елиш вә норуз байримини тәбрикләш паалийити өткүзүлгән.

Паалийәттә рабийә ханим дуня уйғур қурултийиниң хизмәтлири һәққидә җамаәткә мәлумат бәргән. Андин рабийә ханимниң риясәтчиликидә шиветсийә уйғур комитетиниң ишхана елиши үчүн ианә топлаш паалийити елип берилған.

Рабийә қадир ханим 25-март чүштин кейин, шиветсийә парламентида гуваһлиқ бериш йиғиниға қатнашқан. Йиғин давамида гуваһлиқтин өткән рабийә ханим уйғурларниң нөвәттики әһвали һәққидә мәлумат бәргән. Уйғурлар дуч келиватқан миллий вә диний чәклимиләр шундақла көчмән уйғурлар мәсилилири бойичә соралған соалларға җаваб бәргән.

Йоқап кәткән айропиланидики уйғур рәссам мәмәтҗан абланиң аилә тавабиатлири диққәт қозғимақта

Малайшия һава йоллириниң 370 типлиқ йолучилар айропиланида бәхтсизликкә учриған 239 нәпәр йолучи арисидики уйғур яш мәмәтҗан абланиң қисмити пүтүн дунядики уйғурларни қаттиқ ечиндурмақта.

Мәлум болушичә, вәқәдин кейин, мәмәтҗан абланиң қәшқәрдики аилиси бейҗиңға йетип кәлгән. Радиомиз улар туруватқан меһманханиға телефон қилип, мәмәтҗан абланиң дадиси билән көрүшүшни тәләп қилған болсиму, лекин меһманхана хадимлири телефонни улап беришни рәт қилған. Улар мәмәтҗан абланиң аилисидикиләр билән сөзлишиш үчүн юқириниң тәстиқи болуши керәкликини әскәрткән.

Малайшия һава йоллириниң мәзкур йолучилар айропилани -8 март йоқап кәткәндин кейин хитай даирилириниң, айропиландики хитай пуқралириниң тизимлики ичидин мәмәтҗан абланиң 99-рәттики исмини қара рәңдә бойиветиши гуман пәйда қилған.

Көзәткүчиләр хитай даирилириниң айропиланда қазаға учриған хитай йолучиларниң аилилири билән бирдин-бир уйғур йолучи мәмәтҗан абланиң аилисидикиләргә пәрқлиқ муамилә қиливатқанлиқиға диққәт қилған.

Қәшқәр нәзәрбағ деһқанлири терилғу йәрлиридин айрилип қалмақта

Игилишимизчә, қәшқәр шәһәр нәзәрбағ йеза юқириқи қазириқ 14-кәнт деһқанлири 5000 мо терилғу йеридин айрилип қалған.

2002-Йилиға кәлгәндә қәшқәр шәһәрлик һөкүмәт йәнә 864 мо терилғу йәрни деһқанларға уқтурмай туруп қәшқәр шәһәр шенҗен тәрәққият райониға сетивәткән.

Бу ишниң ашкара болуп кетиши вә униң еғир мәсулийитидин қачқан нәзәрбағ базарлиқ һөкүмәт әмәлдарлири сақчихана хадимлирини ишқа селип 3 нәпәр деһқанлар вәкиллирини нәзәрбәнд қилғанлиқи мәлум болмақта.

Атушта алаһидә сақчилар бир уйғур яшни уруп чала өлүк қилип қойған

Радиойимизниң игилишичә, мушу айниң 23-күни, йәни йәкшәнбә кәчтә хитайниң коча чарлаватқан бир топ алаһидә сақчилири атуш шәһиридә бир уйғур яшни уруп еғир яриландурған.

Мәлум болушичә, шу күни сақчилар мотсиклит һәйдәп кетиватқан 21 яшлиқ һөкүмәт кадири ниҗат сәмәтниң алдини тосқан вә сәвәбсизла мотсиклитиниң ачқучини тартивалған. Ниҗат сәмәт буниң сәвәбини сориғинида хитай сақчи униң йүзигә бир тәстәк урған. Сақчиниң бу йолсизлиқиға ниҗат сәмәтму лайиқида инкас қайтуруп, қаршилиқ көрсәткән. Буниң билән 7-8 сақчи бирлишип ниҗат сәмәтни қаттиқ урған. Таяқ зәрбисидин ниҗат сәмәт һошидин кәткән.

Бу зораванлиқ вәқәсини көргән җамаәт билән сақчилар, шундақла йәнә ниҗат сәмәтниң уруқ-туғқанлири билән сақчилар арисидиму сүркилиш келип чиққан. Нөвәттә ниҗат сәмәт қизилсу областлиқ 1-дохтурханида даваланмақтикән.

Тайландта йәнә 15 нәпәр уйғур мусапирниң тутулғанлиқи хәвәр қилинмақта

Тайланд гезитлириниң хәвәрлиригә қариғанда, өткән йәкшәнбә күни тайланд сақчилири тайландниң шәрқидики бир орманлиқта йәнә 15 нәпәр мусапирни тутқун қилған.

Мәлум болушичә, уларниң арисида 10 нәпири кичик бала икән. Тайланд даирилири бу кишиләрниң илгири тутулған вә уйғурлуқи илгири сүрүлүватқан 220 нәпәр мусапир билән охшаш кишиләр икәнликини билдүргән.

Мәлумки, тайланд даирилири 13-март күни тайландниң җәнубий чеграсида 220 нәпәр мусапирни, арқидин йәнә тайландниң шәрқидики камбоджа билән чегрилинидиған районидики орманлиқтин йәнә 112 нәпәр мусапирни тутқан. Хәлқара кишилик һоқуқ органлири вә америка уйғур бирләшмиси тайланд һөкүмитини бу мусапирларни хәлқара мусапирлар қануни бойичә бир тәрәп қилишқа вә хитай тәрәпкә қайтуруп бәрмәсликкә чақирған.

Кишилик һоқуқ органлири әгәр бу мусапирлар уйғур болған тәқдирдә, бунчә көп кишиниң хәтәргә қаримай хитайдин қечип чиқишиниң ойлинишқа тегишлик җиддий мәсилә икәнликини билдүрмәктә.

Үрүмчи шәһәрлик сақчи идарисиниң илһам тохтиниң маашини тоңлатқанлиқи илгири сүрүлмәктә

Илһам тохти әпәнди 15-январ тутқун қилинғандин буян даириләрниң һәр хил йоллар арқилиқ униң аяли гүзәлнур ханимға қаратқан бесимни күчәйткәнлики мәлум болмақта.

Илһам тохтиниң аяли гүзәлнур ханим йеқинда радиомиз зияритини қобул қилип, мушу күнләрдә өзиниң еғир роһи бесимға учриғандин башқа, йәнә иқтисадий бесимғиму учраватқанлиқини билдүргән.

У, илһам тохтиниң мәктәп тәрипидин берилидиған маашиниң үрүмчи шәһәрлик сақчи идарисиниң буйруқи билән тоңлитиветилгәнликини ейтқан. Гүзәлнур ханим йәнә адвокат ли фаңпиң арқилиқ үрүмчи сақчи даирилириниң бу хил қанунсиз бу қилмишини сүрүштүрүш қарариға кәлгәнликини билдүргән.