Корладики "җаһан" пул муамилә пай чеки ширкити вә "606 тил мәктипи" ниң саһиби һәсәнҗан исмаил лагерда

Мухбиримиз шөһрәт һошур
2019-09-23
Share
Hesenjan-Ismail.jpg Лагерға қамалған корлидики "җаһан" пул муамилә пай чеки ширкити вә "606 тил мәктипи" ниң саһиби карханичи һәсәнҗан исмаил.
Photo: RFA

Хитайниң уйғур районидики аталмиш кәспий тәрбийә мәктәплиригә соливелинған милйонларчә тутқунлар арисида өз кәспидә мутәхәссис болуп утуқ қазанған зор бир түркүм ихтисас игилириниң барлиқи миңларчә пакитлар билән дәлилләнмәктә. Бүгүн дәлилләнгини корла шәһиридә "606 тил мәктипи" намида мәктәп ачқан вә арқидин "җаһан" пул муамилә пай чеки ширкити қурған 41 яшлиқ карханичи һәсәнҗан исмаилниң хотунсумбул наһийәсидики бир лагерда бир йилдин буян тутқунда икәнликидур.

Мәлум болушичә, далйән пән-техника университетиниң сода-санаәт кәспини пүттүргән һәсәнҗан исмаил нөвәттә белгийәдә яшаватқан сабиқ шерики елиҗан әмәт билән бирликтә корлада тунҗи болуп "606 тил мәктипи" ни тәсис қилған. Хусуси игиликтики бу мәктәп арқилиқ бәлгилик дәриҗидә һәм иҗтимаий һәм иқтисадий үнүмгә еришкән бу икки шерик корлада йәнә тунҗи болуп "җаһан" пул муамилә пай чеки ширкитини тәсис қилған. 

Елиҗан әмәтниң баян қилишичә, инглизчә, түркчә вә хитайчә тилларни өгитиштин башқа оқуғучилириниң чәтәлдә оқуш имканлири үчүн рәсмийәт мулазимити билән шуғуллинип изчил ронақ тепиватқан бу мәктәп вә ширкәтниң мәблиғи 3 милйон йүәндин ашқан бир мәзгилдә уйғур районида чиққан сиясий җудунниң зәрбисигә учриған. Ширкәтниң корладики саһиби һәсәнҗан исмаил өткән йилниң оттурилири уштумтут ғайиб болған. 

Телефонимизни қобул қилған корла шәһәрлик маарип идарисиниң хадимлири дәсләптә бундақ бир мәктәп вә һәсәнҗан исмаил исимлик бир карханичиниң барлиқидин хәвәрсизликини ейтти. 

Мәзкур мәктәп вә ширкәтниң әһвали һәққидә тәпсилий мәлумат бәргән елиҗан әмәт һәсәнҗан исмаилниң тутулуш сәвәби һәққидә бир еһтималлиқни баян қилди.

Корла маарип идарисиниң хадимлири һәсәнҗан исмаилниң әһвали һәққидә мәлумат бериштин өзини қачурғандин кейин байинғолин областлиқ әдлийә идарисиниң хадимидин мәлумат соридуқ. Бу хадим һәсәнҗан исмаилниң тутқунда икәнликини рәт қилмаслиқ билән бирликтә униң нәдә икәнликидин хәвәрдар бир җ. Х. Хадиминиң алақә учурини тәминлиди. Илгири бир түрмидә вәзипә өтигән вә кейин бир лагерға хизмәткә йөткәлгән бу хадим һәсәнҗан исмаилниң бир йилдин бери тутқунда икәнлики вә нөвәттә хеҗиң, йәни хотунсумбул наһийәсидики бир лагерда икәнликини дәлиллиди. 

Елиҗан әмәт бу йил 41 яшқа киргән яш карханичи һәсәнҗан исмаилниң бир пәрзәнти барлиқи, аялиниң областлиқ дохтурханида икәнлики, әмма уларниң нөвәттики тәқдиридин хәвәрсизликини ейтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт