Korladiki "Jahan" pul mu'amile pay chéki shirkiti we "606 Til mektipi" ning sahibi hesenjan isma'il lagérda

Muxbirimiz shöhret hoshur
2019-09-23
Élxet
Pikir
Share
Print
Lagérgha qamalghan korlidiki "Jahan" pul mu'amile pay chéki shirkiti we "606 Til mektipi" ning sahibi karxanichi hesenjan isma'il.
Lagérgha qamalghan korlidiki "Jahan" pul mu'amile pay chéki shirkiti we "606 Til mektipi" ning sahibi karxanichi hesenjan isma'il.
Photo: RFA

Xitayning Uyghur rayonidiki atalmish kespiy terbiye mekteplirige soliwélin'ghan milyonlarche tutqunlar arisida öz kespide mutexessis bolup utuq qazan'ghan zor bir türküm ixtisas igilirining barliqi minglarche pakitlar bilen delillenmekte. Bügün delillen'gini korla shehiride "606 Til mektipi" namida mektep achqan we arqidin "Jahan" pul mu'amile pay chéki shirkiti qurghan 41 yashliq karxanichi hesenjan isma'ilning xotunsumbul nahiyesidiki bir lagérda bir yildin buyan tutqunda ikenlikidur.

Melum bolushiche, dalyen pen-téxnika uniwérsitétining soda-sana'et kespini püttürgen hesenjan isma'il nöwette bélgiyede yashawatqan sabiq shériki élijan emet bilen birlikte korlada tunji bolup "606 Til mektipi" ni tesis qilghan. Xususi igiliktiki bu mektep arqiliq belgilik derijide hem ijtima'iy hem iqtisadiy ünümge érishken bu ikki shérik korlada yene tunji bolup "Jahan" pul mu'amile pay chéki shirkitini tesis qilghan. 

Élijan emetning bayan qilishiche, in'glizche, türkche we xitayche tillarni ögitishtin bashqa oqughuchilirining chet'elde oqush imkanliri üchün resmiyet mulazimiti bilen shughullinip izchil ronaq tépiwatqan bu mektep we shirketning meblighi 3 milyon yüendin ashqan bir mezgilde Uyghur rayonida chiqqan siyasiy judunning zerbisige uchrighan. Shirketning korladiki sahibi hesenjan isma'il ötken yilning otturiliri ushtumtut ghayib bolghan. 

Téléfonimizni qobul qilghan korla sheherlik ma'arip idarisining xadimliri deslepte bundaq bir mektep we hesenjan isma'il isimlik bir karxanichining barliqidin xewersizlikini éytti. 

Mezkur mektep we shirketning ehwali heqqide tepsiliy melumat bergen élijan emet hesenjan isma'ilning tutulush sewebi heqqide bir éhtimalliqni bayan qildi.

Korla ma'arip idarisining xadimliri hesenjan isma'ilning ehwali heqqide melumat bérishtin özini qachurghandin kéyin bayin'gholin oblastliq edliye idarisining xadimidin melumat soriduq. Bu xadim hesenjan isma'ilning tutqunda ikenlikini ret qilmasliq bilen birlikte uning nede ikenlikidin xewerdar bir j. X. Xadimining alaqe uchurini teminlidi. Ilgiri bir türmide wezipe ötigen we kéyin bir lagérgha xizmetke yötkelgen bu xadim hesenjan isma'ilning bir yildin béri tutqunda ikenliki we nöwette xéjing, yeni xotunsumbul nahiyesidiki bir lagérda ikenlikini delillidi. 

Élijan emet bu yil 41 yashqa kirgen yash karxanichi hesenjan isma'ilning bir perzenti barliqi, ayalining oblastliq doxturxanida ikenliki, emma ularning nöwettiki teqdiridin xewersizlikini éytti.

Toluq bet