Хәлқара сақчи тәшкилати идрис һәсән һәққидики тутуш буйруқини вақтинчә тоңлатқан

Ихтиярий мухбиримиз азиғ
2021.08.02
Хәлқара сақчи тәшкилати идрис һәсән һәққидики тутуш буйруқини вақтинчә тоңлатқан Идрис һәсән маракәшкә меңиштин бир қанчә күн бурун қизи билән биллә чүшкән рәсим. 2021-Йили июл, түркийә.
RFA/Azigh

Идрис һәсән 19-июл күни маракәштә қолға илинған болуп, маракәш даирилири хитайниң тәлипи билән хәлқара сақчи тәшкилатиниң қизил тутуш буйруқи бойичә идрис һәсәнни қолға алғанлиқини билдүргәниди.

Игилишимизчә, хәлқара сақчи тәшкилати идрис һәсән һәққидә йеңи мәлуматларни тапшуруп алғанлиқини, һәқиқий әһвал айдиңлашқанға қәдәр, идирсниң үстидики қизил тутуш буйруқини тоңлитип қойидиғанлиқини елан қилған.

“җәнубий хитай сәһәр почтиси” гезитиниң хәвәр қилишичә, мәзкур қарар хәлқара сақчи тәшкилати тәрипидин маракәш вә хитай даирилиригә билдүрүлгән.

Норвегийәдә турушлуқ кишилик һоқуқ паалийәтчиси абдувәли аюп әпәндиниң ейтишичә, хәлқара сақчи тәшкилатиниң уқтуруши һәр қайси дөләтләрниң хәвпсизлик органлириға йәткүзүлидиған болуп, мәзкур тутуш буйруқини иҗра қилиш яки қилмаслиқ шу дөләтниң өзигә бағлиқ икән.

Идрис һәсән маракәшкә меңиштин бир қанчә күн бурун пәрзәнтлири билән биллә чүшкән рәсим. 2021-Йили июл, түркийә.
Идрис һәсән маракәшкә меңиштин бир қанчә күн бурун пәрзәнтлири билән биллә чүшкән рәсим. 2021-Йили июл, түркийә.

Абдувәли аюп әпәнди зияритимиз давамида йәнә, хәлқара сақчи тәшкилати алған мәзкур қарарниң маракәш даирилири үчүн бир пурсәт икәнликини ейтти.

Идрис һәсәнниң аяли бузайнур ханим зияритимизни қобул қилип, һәр қайси кишилик һоқуқ тәшкилатлириниң тиришчанлиқидин сөйүнгәнликини вә хәлқара сақчи тәшкилатиниң мәзкур қараридин хурсән болғанлиқини ейтти.

Маракәш җамаәт хәвпсизлик тармақлири техи идрис һәсән һәққидә дело турғузмиған болуп, нөвәттә идрис һәсән коруна вируси тәдбирлири сәвәблик карантин астида тутуп турулмақтикән. Идрис һәсән һәққидики қануний тәртип маракәш даирилири рәсмий дело турғузғандин кийин башлинидикән. Идрис һәсәнниң адвокати абдувәли аюп әпәндигә идрис һәсән делосиниң узунға созулуп кетишиниң мумкинликини, бу әһвалниң идрис һәсән үчүн пайдилиқ икәнликини, ахбарат васитилири арқилиқ маракәш даирилиригә бисим чүшүрүш үчүн вақит утқини болидиғанлиқини ейтқан.

Нөвәттә идрис һәсәнни қутқузуш үчүн дуняниң һәрқайси җайлиридики кишилик һоқуқ паалийәтчилири вә хәлқаралиқ кишилик һоқуқ органлири паал тиришчанлиқ көрситиватқан болуп, кишиләр хитайниң уйғурлар үстидә йүргүзүватқан қирғинчилиқ сиясәтлиригә четилип қалмаслиқи үчүн маракәш даириләрни агаһландурмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.