Маракәштә қолға елинған идрис һәсән үстидики карантин тәдбирлири бошитилған

Ихтиярий мухбиримиз азиғ
2021-08-05
Share
Маракәштә қолға елинған идрис һәсән үстидики карантин тәдбирлири бошитилған Идрис һәсән маракәшкә меңиштин бир қанчә күн бурун пәрзәнти билән биллә чүшкән рәсим. 2021-Йили июл, түркийә.
RFA/Azigh

19-Июл касабланкида маракәш даирилири тәрипидин қолға елинған идрис һәсән коруна вируси вабаси тәдбирлири бойичә карантинға илинған болуп, 5-авғуст күни карантин муддити тошқанлиқи үчүн ваба тәдбирлири бошитилған.

Бүгүн чүштин кейин карантин муддити тошқан идрис һәсән түркийәдики аилә йеқинлири билән телефон арқилиқ көрүшкән. Идрис һәсәнниң аяли бузәйнур ханим зияритимизни қобул қилип, идрис һәсәнниң нөвәттики әһвали һәққидә мәлумат бәрди.

Униңдин башқа идрис һәсән йәнә уйғур яр фонди җиддий қутқузуш түриниң мәсуллири биләнму көрүшкән. Уйғур яр фонди җиддий қутқузуш түридин батур қарахан әпәндиниң билдүрүшичә, идрис һәсән әпәндимниң психик әһвали интайин яхши икән.

Идрис һәсән маракәшкә меңиштин бир қанчә күн бурун пәрзәнтлири билән биллә чүшкән рәсим. 2021-Йили июл, түркийә.
Идрис һәсән маракәшкә меңиштин бир қанчә күн бурун пәрзәнтлири билән биллә чүшкән рәсим. 2021-Йили июл, түркийә.

Нөвәттә идрис һәсәнниң икки адвокати бар болуп, бири кишилик һоқуқни қоғдиғучилар тәшкилати яллиған адвокат милуд кандил, йәнә бири бирләшкән дөләтләр тәшкилати кишилик һоқуқ алий комиссарлиқи тәйинлигән адвокат әл кәбир икән.

Кишилик һоқуқ алий комиссарлиқи тәйинлигән адвокат әл кәбирниң уйғур яр фондиға йәткүзүшичә, 12-авғуст күни идрис һәсән үстидин рәсмий сот ечилмақчикән.

Бүгүн, йәни 5-авғуст кәчтә идрис һәсәнни қутқузуш үчүн тиришчанлиқ көрситиватқан хизмәт гурупписи мәхсус бу һәқтә йиғин ачидиған болуп, бу йиғинда идрис һәсәнни қутқузуш үчүн елип берилидиған конкрет хизмәтләр бекитилидикән.

Идрис һәсән һәққидики рәсмий һөҗҗәтләр әрәбчигә тәрҗимә қилинип, мунасивәтлик органларға тапшуруп берилгән болуп, нөвәттә идрис һәсәнниң делоси бирләшкән дөләтләр тәшкилати кишилик һоқуқни қоғдиғучиларға мәсул алаһидә хадими тәрипидин мәхсус көзитилмәктикән.

Биз уйғур яр фонди җиддий қутқузуш түриниң мәсуллиридин батур қарахан әпәндини зиярәт қилдуқ. Батур қарахан әпәнди идрис һәсәнниң делоси һәққидики әң йеңи мәлуматлар һәққидә тәпсилий тохталди.

Биз идрис һәсәнниң нөвәттики әһвали һәққидә техиму тәпсилий мәлумат елиш үчүн маракәшниң истанбулдики баш консулханисиға қайта-қайта телефон қилған болсақму, телефон елинмиди.

Идрис һәсән хитайниң тәлипи билән маракәш даирилири тәрипидин қолға елинғандин кийин кишилик һоқуқ паалийәтчилири тәрипидин қаттиқ бесимға дуч кәлмәктә. Нөвәттә идрис һәсәнни қутқузуш һәрикити кишилик һоқуқни қоғдиғучилар тәшкилати, хәлқара кәчүрүм тәшкилати, чеграсиз мухбирлар тәшкилати вә бирләшкән дөләтләр тәшкилати кишилик һоқуқ алий комиссарлиқи қатарлиқ органларниң һәмкарлиқида җиддий елип берилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт