ئىدرىس ھەسەننىڭ سوتى 1-سېنتەبىرگە كېچىكتۈرۈلگەن

ئىختىيارىي مۇخبىرىمىز ئازىغ
2021-08-27
Share
ئىدرىس ھەسەننىڭ سوتى 1-سېنتەبىرگە كېچىكتۈرۈلگەن ئىدرىس ھەسەن ماراكەشكە مېڭىشتىن بىر قانچە كۈن بۇرۇن پەرزەنتى بىلەن. 2021-يىلى ئىيۇل، تۈركىيە.
RFA/Azigh

ماراكەشتە تۇتۇپ تۇرۇلىۋاتقان كومپۇتېر ئىنژېنېرى ۋە كىشىلىك ھوقۇق پائالىيەتچىسى ئىدرىس ھەسەننىڭ 26-ئاۋغۇست كۈنىدىكى سوتى 1-سېنتەبىرگە كېچىكتۈرۈلگەن.

ماراكەش دائىرىلىرى ئىدرىس ھەسەننى خەلقئارا ساقچى تەشكىلاتى تەرىپىدىن چىقىرىلغان قىزىل تاشلىق تۇتۇش بۇيرۇقى سەۋەبلىك قولغا ئالغانلىقىنى جاكارلىغانىدى. خەلقئارا ساقچى تەشكىلاتى ئىدرىس ھەسەن ھەققىدىكى تۇتۇش بۇيرۇقىنى ئەمەلدىن قالدۇرغان بولسىمۇ، ئەمما ماراكەش سوت مەھكىمىسى ئىدرىس ھەسەننى قويۇپ بېرىشكە تېخىچە ھۆكۈم چىقارمىغان.

ئىدرىس ھەسەننىڭ ئايالى بۇزەينۇر خانىم زىيارىتىمىزنى قۇبۇل قىلىپ، سوتنىڭ مەزكۇر قارارى ھەققىدىكى كۆز قاراشلىرىنى بىز بىلەن ئورتاقلاشتى.

«ئەرەب خەۋەرلىرى»، «ئافرىقا خەۋەرلىرى» قاتارلىق ئىنگىلىزچە ۋە فىرانسۇزچە ئاخبارات ۋاستىلىرى بۇ ھەقتە مەخسۇس خەۋەر ئىشلىگەن بولۇپ، خەۋەرلەردە ئىدرىس ھەسەننىڭ خىتايغا قايتۇرۇۋېتىلگەن تەقدىردە ئېغىر تەن جازاسىغا ۋە قىيىن قىستاققا ئۇچراش ئېھتىماللىقىنىڭ يۇقىرىلىقى ئېيتىلغان.

«ئۇيغۇر يار فوندى» جىددىي قۇتقۇزۇش تۈرىنىڭ مەسئۇللىرىنىڭ بىلدۈرۈشىچە، خىتاي ھۆكۈمىتى ئىدرىس ھەسەن ئۈستىدىكى ئەيىبنامىلەرنى ماراكەش دائىرىلىرىگە تاپشۇرمىغان بولۇپ، ئىدرىس ھەسەننىڭ سوتىنىڭ كېچىكىپ كېتىشى بۇ ئەھۋال بىلەن مۇناسىۋەتلىك ئىكەن. ئىدرىس ھەسەننىڭ ئادۋوكاتلىرى سوتنىڭ كېچىكىشىنى ئىدرىس ھەسەنگە پايدىلىق دەپ قارىماقتا ئىكەن.

ئۇيغۇر يار فوندى جىددىي قۇتقۇزۇش تۈرىنىڭ مەسئۇللىرىدىن باتۇر قاراخان ئەپەندىم زىيارىتىمىزنى قۇبۇل قىلىپ، ئىدرىس ھەسەننى دېلوسى ھەققىدە تەپسىلىي ئۇچۇر بەردى.

ئىگىلىشىمىزچە، ئىدرىس ھەسەن نۆۋەتتە ماراكەشتىن قويۇپ بېرىلگەن تەقدىردە تۈركىيىگە قايتۇرۋېتىلىشتىن ئەندىشە قىلماقتىكەن. كۆزەتكۈچىلەر، يېقىندا ئاشكارىلانغان تۈركىيە تاشقىي ئىشلار مىنىستىرلىقىغا ئائىت بىر مەخپىي ھۆججەتتە ئىدرىس ھەسەننىڭ ئىسمىنىڭ بولۇشىنى مىسالغا ئېلىپ، ئىدرىس ھەسەننىڭ ئەندىشسىنىڭ ئورۇنسىز ئەمەسلىكىنى ئېيتماقتا.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت