Istanbuldiki marakesh konsolxanisi aldida idris hesenni qoyup bérishni telep qilip, namayish ötküzüldi

Ixtiyariy muxbirimiz arslan
2021-12-17
Share
Idris hesenning a'ilisi uni qutuldurush üchün marakeshning istanbuldiki konsulxanisi aldi namayish qiliwatqan körünüsh. 2021-Yili 16-dékabir, türkiye
RFA/Arslan

12-Ayning 16-küni idrés hesenning ayali we istanbuldiki Uyghurlardin 200 etrapida kishi marakeshning istanbuldiki konsolxanisi aldigha jem bolup, idrés hesenning erkinlikke chiqishi we xitaygha qayturulmasiliqini telep qilip, namayish élip bardi.

Namayishchilar qollirida ay-yultuzluq kök bayraq we idris hesenning resimlirini kötürgen halda marakeshning istanbuldiki konsolxanisi aldigha jem boldi. Ular “Idris hesen'ge erkinlik!”, “Idrés hesenni qutquzayli!” dégendek shu'arlar towlidi.

Idris hesenning kichik oghli uni qutuldurush üchün marakeshning istanbuldiki konsulxanisi aldi namayish qiliwatqan körünüsh. 2021-Yili 16-dékabir, türkiye.
Idris hesenning kichik oghli uni qutuldurush üchün marakeshning istanbuldiki konsulxanisi aldi namayish qiliwatqan körünüsh. 2021-Yili 16-dékabir, türkiye.

Namayish jeriyanida Uyghur pa'aliyetchilerdin doktur burhan ulughyol, jewlan shirmuhemmed we idris hesenning ayali buzeynur xanim qatarliqlar marakesh hökümitige xitap qilip, söz qildi. Ular idris hesenning héchqandaq jinayitining yoqluqini, uni qoyup bérishni, xitaygha qayturup bermeslikni telep qildi.

Idris hesenning ayali buzeynur xanim türkiye jumhur re'isi rejep tayyip erdoghan'gha xitap qilip, yoldishi idrés hesenni qutuldurush üchün yardem telep qildi. U mundaq dédi: “Méning yoldishim idris hesen marakeshte tutqun qilindi, yoldishimning héchqandaq bir jinayiti yoq. U Uyghurlar üchün paydiliq xizmet qilip kelgen kompiyotér inzhénéri. Xelq'ara saqchi teshkilati yoldishim toghriliq chiqarghan qizil tashliq tutush buyriqini bikar qilghan bolsimu, emma marakash hökümiti uni qoyup bermestin xitaygha qayturush qararini aldi. Men sizdin yoldishimini qutuldurup qélishingizni telep qilimen. Sizgimu melum bolghinidek, xitay Uyghurlar üstidin irqiy qirghinchiliq élip bériwatidu. Yoldishimning irqiy qirghinchiliq élip bériwatqan xitaygha qayturulmasliqini telep qilimen!”

Istanbuldiki Uyghurlardin 200 etrapida kishi idris hesenni qutuldurush üchün istanbuldiki konsulxanisi aldi namayish qiliwatqan körünüsh. 2021-Yili 16-dékabir, türkiye.
Istanbuldiki Uyghurlardin 200 etrapida kishi idris hesenni qutuldurush üchün istanbuldiki konsulxanisi aldi namayish qiliwatqan körünüsh. 2021-Yili 16-dékabir, türkiye.

Ziyaritimizni qobul qilghan doktur burhan ulughyol ependi, bügünki namayishning uyushturulush mexsiti we jeryani toghrisida melumat berdi.

Uning bildürüshiche, namayish axirida marakeshning konsolxana xadimliri idris hesenning ayali buzeynur xanim we doktur burhan ulughyolni qobul qilip, ayrim uchrashqan. Uchrishishta buzeynur xanim yoldishini qoyup bérishni telep qilghan iltimasni konsulxana xadimigha tapshurup bergen.

Doktur burhan ulughyol, konsulxana xadimlirigha idris hesen toghrisida chüshenche bérip, eger u xitaygha qayturulghan teqdirde ölüm jazasigha we yaki jaza lagérlirida qiyin-qistaqqa uchraydighanliqini tekitligen. U marakesh konsulxanisining xadimlirigha Uyghur jama'itining idris hesenni qoyup bérish toghrisidiki teleplirini yetküzgen.

Idris hesenning ayali buzeynur xanimning bildürüshiche, uchrishishta konsulxana xadimi ularning telipini marakesh hökümitining munasiwetlik organlirigha yetküzidighanliqini bildürgen.

Namayish axirlashqandin kéyin, idris hesenning ayali buzeynur xanim yoldishini qutuldurush üchün yol méngiwatqan barliq qérindashlargha teshekkür éytidighanliqini bildürdi.

Idris hesenni qutuldurush üchün xelq'aradiki kishilik hoquq teshkilatliri, sherqiy türkistan teshkilatliri we dunyaning her qaysi jayliridiki Uyghurlar jiddiy pa'aliyet élip barmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet