IPAC Ниң омумий йиғинида уйғурлар мәсилиси муһим темилар қатаридин орун алди

Вашингтондин мухбиримиз нуриман тәйярлиди
2023.09.05
zumretay-piraga Чехийә пайтәхти пирагада “хитайға қарши парламентлар комитети” (қисқичә айпәк-IPAC) ниң үчинчи қетимлиқ омумий йиғинидин көрүнүш, 2023-йили 1-сентәбир, пирага
Дуня уйғур қурултийи

1-Сентәбир күни 25 дөләттин кәлгән 50 парламент әзаси чехийә пайтәхти пирагада “хитайға қарши парламентлар комитети” (қисқичә айпәк-IPAC) ниң үчинчи қетимлиқ омумий йиғини үчүн топланған. Мәзкур комитетниң чехийә авам палатаси вә кеңәш палатасида елип барған йиғини икки күн давамлашқан.

IPAC Ниң рәсмий тор бетидики мәлуматларға асасланғанда, мәзкур йиғининиң ядролуқ нуқтиси хитайға мунасивәтлик алтә тема , йәни тәйвән, енергийә мәнбәси җәһәттә йеңи йолларни тепиш, дөләт һалқиған бастуруш, хоңкоң, “бир бәлбағ бир йол” пирограммиси вә кишилик һоқуқ қатарлиқлар үстидә болған. Йиғинда қанун чиқарғучилар бу темиларға мунасивәтлик һөҗҗәтләрни бирликкә кәлтүрүш һәмдә кәлгүси бир йилда мушу мәсилиләрни һәл қилишқа мунасивәтлик паалийәтләр һәққидә музакириләр елип берилған.

Мәзкур йиғинға чехийә ташқи ишлар министири вә авам палатасиниң рәиси, шундақла дуняниң  һәр қайси җайлиридин кәлгән даңлиқ мутәхәссисләр, сиясий паалийәтчиләр тәклип билән қатнашқан. Бу йиғинға қатнашқан сиясий паалийәтчиләр қатарида дуня уйғур қурултийи лондон ишханисиниң мудири рәһимә мәһмут ханим билән дуня уйғур қурултийиниң пирограмма директори зумрәтай әркин ханимлар бар икән. Улар бу йиғинда хитайниң уйғурларға қаритиватқан бастуруш сиясәтлири, буниң нәтиҗисидә келип чиққан еғир  мәсилиләр вә уни һәл қилишниң йоллири һәққидики тәклиплирини оттуриға қойған.

Рәһимә ханим бу һәқтә радийомизниң зияририни қобул қилди. У, йиғинда өзи оттуриға қойған мәсилиләр һәққидә тохталди. У йәнә IPAC вәкиллириниң вәзипилирини әскәртип өтти. Рәһимә ханимниң билдүрүшичә, у мәзкур комитетиниң мәслиһәтчилири қатаридин орун алған.

2020-Йили қурулған “хитайға қарши парламентлар комитети” америка кеңәш палата әзаси марко рубийо вә роберт менендез, явропа парламентиниң әзаси рейнхард бутикофер қатарлиқ муһим шәхсләрдин тәшкил тапқан болуп, “хәлқара тәртипни вә кишилик һоқуқни қоғдаш һәммимизниң ортақ мәсулийити” дегән шоарни өзлиригә ортақ нишан қилған икән.

Чехийә пайтәхти пирагада “хитайға қарши парламентлар комитети” (қисқичә айпәк-IPAC) ниң үчинчи қетимлиқ омумий йиғинидин көрүнүш, 2023-йили 1-сентәбир, пирага

Рәһимә ханим IPAC ниң хитайниң күнсери күчийиватқан тәһдитигә қарши тез сүрәттә кеңийиватқан бир комитет икәнликини, шуңа хитайниң бу бирликкә пүтүн күчи билән қарши чиқиватқанлиқини тәкитлиди.

Зумрәтай ханимниң радийомизға билдүрүшичә, уйғур мәсилиси мәзкур йиғинида муһим мәсилиләр қатаридин орун алған.  У йиғинда уйғур қирғинчилиқниң наһайити җиддий мәсилә икәнликини оттуриға қойған.

IPAC Омуми йиғининиң ахирида мақулланған қарарда, мәзкур комитетниң уйғур райони вә униң сиртида хитайниң вәһший сиясәтлириниң зиянкәшликигә учраватқан уйғурлар үчүн елип бериватқан күрәшлирини давамлаштуридиғанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.