Истанбулда өткүзүлгән иптарлиқ йиғилишта тәшкилатлар ара өмлүк вә бирликтә һәрикәт қилиш тәкитләнди

Истанбулдин ихтиярий мухбиримиз арслан тәйярлиди
2024.03.15
istanbul-iptar-02 Дуня уйғур қурултийи вәхписиниң рәиси абдурешит абдулһәмит сөзләватиду. 2024-Йили 12-март, истанбул
RFA/arslan

Хитай коммунист һакимийити уйғур дияридики мусулманларниң роза тутушини чәкләп, уйғур мусулманлириниң ибадәт әркинликини боғуп келиватқан бүгүнки күндә, түркийәдики уйғур җамаити башқа дөләтләрдә яшаватқан уйғурларға охшашла роза тутуп, ибадәтлирини ада қилип кәлмәктә, шундақла бир йәргә җәм болуп иптарлиқ паалийәт елип бармақта.

Истанбулдики дуня уйғур қурултийи вәхпиниң уюштуруши билән 13-март күни зәйтинбурнудики бәрикәт ресторанида иптарлиқ паалийәт өткүзүлди. Бу паалийәткә истанбулдики шәрқий түркистан тәшкилатлириниң мәсуллири, юрт ақсақаллири, кишилик һоқуқ паалийәтчилири вә содигәрләр болуп көп санда киши қатнашти.

Шәрқий түркистан өлималар бирликиниң рәиси доктор алимҗан буғда сөзләватиду. 2024-Йили 12-март, истанбул
Шәрқий түркистан өлималар бирликиниң рәиси доктор алимҗан буғда сөзләватиду. 2024-Йили 12-март, истанбул
RFA/arslan

Паалийәттә, шәрқий түркистан өлималар бирликиниң рәиси доктор алимҗан буғда сөз қилип, уйғурларниң рамизан ейини тәбриклиди; андин йеқинда бир қисим җасус гумандарлириниң түркийә сақчилири тәрипидин тутқун қилинғанлиқини тилға елип, уйғурлар үстидин ирқий қирғинчилиқ елип бериватқан хитайға маслишиштин, хитайға ишләштин йирақ турушқа чақириқ қилди һәмдә уйғурларниң йүрүш-туруш, иш-һәрикәтлиридә һошяр болуши керәкликини тәкитлиди. У уйғурларни дәва йолида ортақ һәрикәт қилишқа үндәп: “һәммимиз бу дәваға ортақ күч чиқирайли, хитайға қарши ортақ һәрикәт қилайли” деди.

Доктор алимҗан буғданиң дуа қилиши билән тәң җамаәтму бирдәк қол көтүрүп, уйғур диярида чәклимигә учрап роза туталмайватқан мусулманларниң пат пурсәттә әркин вә хатирҗәм һалда роза туталайдиған болуши үчүн дуа қилди.

12-Март сәйшәнбә күни дуня уйғур қурултийи вәхписиниң уюштуруши вә шәрқий түркистан тәшкилат рәһбәрлири, юрт ақсақаллири вә паалийәтчиләрниң қатнишиш билән өткүзүлгән иптар көрүнүши. 2024-Йили 12-март, истанбул
12-Март сәйшәнбә күни дуня уйғур қурултийи вәхписиниң уюштуруши вә шәрқий түркистан тәшкилат рәһбәрлири, юрт ақсақаллири вә паалийәтчиләрниң қатнишиш билән өткүзүлгән иптар көрүнүши. 2024-Йили 12-март, истанбул
RFA/arslan

Арқидин җамаәт әрбаби абдуқадир япчан сөз қилип, хитайниң уйғурлар үстидин елип бериватқан инсанийәткә қарши җинайәтлири вә ирқий қирғинчилиқиниң түп сәвәбиниң шәрқий түркистан земинини хитайниң ишғал қиливалғанлиқидин ибарәт таҗавузчилиқ җинайити икәнликини тәкитлиди вә “шәрқий түркистан бизниң топриқимиз, хитай у йәрдә ишғалчи, таҗавузчидур, униң у йәрдә яшаш һәққи йоқ” деди.

12-Март сәйшәнбә күни дуня уйғур қурултийи вәхписиниң уюштуруши вә шәрқий түркистан тәшкилат рәһбәрлири, юрт ақсақаллири вә паалийәтчиләрниң қатнишиш билән өткүзүлгән иптар көрүнүши. 2024-Йили 12-март, истанбул
12-Март сәйшәнбә күни дуня уйғур қурултийи вәхписиниң уюштуруши вә шәрқий түркистан тәшкилат рәһбәрлири, юрт ақсақаллири вә паалийәтчиләрниң қатнишиш билән өткүзүлгән иптар көрүнүши. 2024-Йили 12-март, истанбул
RFA/arslan

Абдурешит абдулһәмит әпәнди бу паалийәтни оюштурушниң әһмийити тоғрисида тохтилип мундақ деди: “хитай һакимийити муһаҗирәттики шәрқий түркистан җәмийәтлири арисиға иттипақсизлиқ уруқлири чечип, өзара иттипақсизлиқ вә бир-биригә ишәнмәслик, бир-биригә шүбһә билән қарашни пәйда қилди. Хитай бизни нишанни хитайға қаратмай, шәрқий түркистан дәвасини қиливатқан вә алдинқи сәптә меңиватқан пидаийларға қаритишқа, зеһнимизни чечиш, писхологийәмизни бузуш арқилиқ ирадимизни аҗизлаштурушқа урунмақта. Биз хитайниң бу рәзил оюнлириға кәлмәсликимиз керәк. Мушундақ хисләтлик бир айда бир йәргә келип пикирлишиш, өзара әпу қилиш, қучақлишиш, меһри муһәббитини билдүрүш арқилиқ зиддийәтләрни түгитип, вәтинимиз шәрқий түркистанниң азадлиқи вә хәлқимизниң һөрлүки үчүн ортақ һәрикәт қилалайдиған, бирликтә йол маңалайдиған бир кәйпиятни шәкилләндүрүшимиз керәк. Шу мәқсәттә бу иптарлиқ паалийәт орунлаштурулди, рамизан ейи яхшилиқ қилишқа йүзләндүридиған бир ай. Бу айда дуняниң һәр қайси җайлиридики шәрқий түркистанлиқ қериндашларму бирлик-иттипақлиқ шәкилләндүрүши, вәтинимиздә болуватқан зулумни һеч қачан унтуп қалмаслиқи керәк. Барлиқ ибадәтлиримиздә, дуалиримизда вә әмәлий паалийәтлиримиздә шәрқий түркистан дәвасиға төһпә қошушимиз керәк” .

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.