Америкиниң авиаматка зәрбә бериш гурупписи җәнубий деңизға кирди

Мухбиримиз мәмәтҗан җүмә
2021-04-11
Share
Америкиниң авиаматка зәрбә бериш гурупписи җәнубий деңизға кирди 2021-Йили 10-апрел америкиниң авиаматка зәрбә бериш гурупписи җәнубий деңизға кирди.
Social Media

Америка деңиз армийә тәтқиқат институтиниң хәвәр қилишичә, хитайниң деңиз хәлқ әскәрлири филиппинниң алаһидә иқтисадий райониға бесип кирип, район вәзийити җиддийләшкән мәзгилдә, американиң бир авиаматка зәрбә бериш гурупписи вә бир һәммәбап (қуруқлуқ вә суда тәң җәң қилишқа тәйяр) уруш парахоти гурупписи җәнубий деңизға киргән вә маневир башлиған.

Америка 7-флотиниң билдүрүшичә, 10-апрел җәнубий деңизға киргән америка қисимлири, теодор розвелт CSG авиаматка зәрбә бериш гурупписи, макин арили ARG–15 һәммәбап уруш парахоти гурупписи, деңиз армийә пиядилириниң деңиз експедитсийә әтрити қатарлиқлардин тәркиб тапқан икән.

Филиппин даирилири өткән һәптә хитайниң деңиз хәлқ әскәрлиригә тәвә 44 парахот филиппинниң деңиз қирғиқиға йеқин җайдики витсүн марҗан араллири әтрапиға топланғанлиқини мәлум қилған.

Мәлуматларға қариғанда, бу "деңиз хәлқ әскәрлири" рәсмий һәрбий қошун болмисиму, әмма хитай һөкүмити биваситә малийә билән тәминләйдиған қораллиқ күч болуп, хитай буларни хитайға деңиз арқилиқ чегрилинидиған әлләргә бесим ишлитиш вә тоқунуш пәйда қилиш үчүн қоллинип кәлгән икән.

Бу йил мартта, хитайниң бу хилдики 200 дин артуқ кемиси начар һаварайидин панаһлиниш баһанисидә, филиппинға тәвә арал әтрапиға йөткәлгән.

Җүмә күни, америка ташқи ишлар министири антоний билинкен филиппин ташқи ишлар министири локсин билән телефонлашқанда, хитай парахотлириниң витсун марҗан араллириға топлинишидин әндишиләнгәнликини билдүргән вә вашингтон билән манила оттурисидики "өз-ара мудапиә шәртнамиси" ниң җәнубий деңизға қоллинилидиғанлиқини қайта тәкитлигән.

Америка дөләт мудапиә министирлиқиниң баянатчиси җон кирбиниң билдүрүшичә, дөләт мудапиә министири остин америкиниң өз иттипақдашлири билән бир сәптә туридиғанлиқини ейтқан.

Алдинқи айниң ахирида, ташқи ишлар министири антоний биллинкен әгәр филиппин һуҗумға учриса америкиниң уни қоғдаш вәдисидә чиң туридиғанлиқини қайта муәййәнләштүргән иди.

Америка деңиз армийә тәтқиқат институтиниң билдүрүшичә, хитайниң бу аталмиш "деңиз хәлқ әскәрлири" парахотлириниң хитайниң деңиз қирғиқи муһапизәт әтрити вә хитай деңиз армийәси парахотлири билән һәмкарлишип мәшғулат қиливатқанлиқи байқалған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт