Ғулҗадики кан өрүлүш вәқәсидә йәр астида қалған 18 кишиниң көпинчисиниң уйғур икәнлики мәлум болмақта

Хитай ахбарати ғулҗа наһийәсиниң қараяғач йезисиға җайлашқан хитайниң “ғәрбий дияр алтун кан или чәклик мәсулийәт ширкити” ниң йәр асти канида 24 ‏-дикабир күни кан өрүлүш вәқәси йүз бәргәнлики, вәқәдә 18 нәпәр ишчиниң кан астида қапсилип қалғанлиқи хәвәр қилинған иди. Мухбиримизниң ғулҗадики алақидар органларға қарита елип барған телефон зиярәтлири давамида, мәзкур 18 нәпәр кишиниң көпинчисиниң уйғур икәнлики мәлум болди. Ениқлишимизчә, қутқузуш һәркити нөвәттә 5‏-күнигә қәдәм қойған болсиму, әмма кан астиға қапсилип қалған ишчилардин бирәрсиниңму техи қуутулдурулалмиғанлиқи ашкариланди.

Хитайниң һөкүмәт хәвәрлиридә, ғулҗа наһийәсидә кан өрүлүш вәқәси йүз бәргәндә, кан астида җәмй 40 киши барлиқи, булардин 22 нәпириниң шу күни қутқузулғанлиқи, әмма қалған 18 нәпирниң кан астида қапсилип қалғанлиқи хәвәр қилинған иди. Вәқә йүз бәргән канниң саһиби болған “ғәрби дияр алтун кан чәклик мәсулийәт ширкити” ниң бир хадими, мәзкур қутқузуш һәркити бүгүн 5‏-күнигә қәдәм қойған болсиму, әмма қутқузушниң йәнила давамлишиватқанлиқини ашкарилиди.

Униң баянлиридин мәлум болушичә, нөвәттә мәзкур ширкәттики барлиқ хадимлар, алдинқи сәпкә, йәни өрүлгән кан астида қапсилип қалған кишиләрни қутқузуш һәркитигә қатнашқан. Әмма та һазирғичә кан астиға қапсилип қалған ишчилардин бирәриниң қутулдурулғанлиқи һәққидә өзлиригә һечқандақ җавап кәлмигән.

stc-new.8531.cn

Телефонимизни қобул қилған ғулҗа наһийилик хәлқ дохтурханисиниң бир хадимиму, мәзкур дохтурханидики җиддий қутқузуш бөлүми хадимлириниң нәқ мәйданға кәткәнлики, өзлириниң болса елип келинииш еһтимағли болған яридарларни күтүп туруватқанлиқи, әмма һазирғичә бирму яридраниң бу дохтурханиға әкилинмигәнликини баян қилди.

Йоқуриқи бу мәлуматлардин қутқузуш һәркитиниң һелиһәм давам қиливатқанлиқи, әмма һечбир нәтиҗә болмайватқанлиқи мәлум болмақта. Биз алақидар хадимлардин өрүлгән канниң көлими, сәвәби, кан астида ишләватқан ишчиларниң кимликлири, болупму милләт тәвәлики һәққидә мәлумат соридуқ. Хадимлардин бәзилири бу мәлуматлардин хәвәрсизликини ейтса, йәнә бәзилири бу учурларни ашкарилашқа болмайдиғанлиқини баян қилди. Мәзкур кан җайлашқан ғулҗа наһийә қараяғач йезисиниң йеза башлиқи, бу соалларға пәқәт һүкүмәтниң тәстиқини алғандин кейинла җавап берәләйдиғанлиқини билдүрди.

Илгирики ениқлашлиримизда, қарияғач йезисдики көмүр вә алтун канлирида еғир җисманий ишларни төвән иш һәққи билән йәрлик аһалиләр, йәни уйғурлар қилидиағанлиқи мәлум болған иди. Шуңа биз бу қетимлиқ ениқлашлиримиз давамида, мәзкур 18 кишиниң милләт тәвәлики һәққидә йәрлик даириләрдин нуқтилиқ мәлумат соридуқ.

Мәзкур алтун кан ширкитиниң хадими бу һәқтики соалимизға җавабән, 18 киши ичидә уйғур вә хәнзудин ибарәт һәр икки милләт кишилириниң барлиқини тилға алди. Биз униңға қараяғач йезисиниң уйғурлар олтурақлашқан йеза икәнликни әскәртип, “бу 18 кишиниң көпинчиси уйғурму?” дәп сориғинимизда, у: “шундақ” дәп җаваб бәрди. Биз бу хадимдин уларниң исимлирини сориғинимизда, у бу һәқтә йәрликтин, йәни ғулҗа наһийәлик партком тәшвиқат бөлүмидин мәлумат елшимизни тәвсийә қилди.

Или областлиқ җиддий қутқузуш мулазимәт ширкитиниң бир хадимиму, қутқузушниң техичә давам қиливатқанлиқини баян қилиш билән бирликтә, кан астида қалған 18 кишиниң мутләқ көпинчисиниң уйғур ишчилар икәнликини ашкарилиди.

Юқурида, ғулҗа наһийәсидики кан өрүлүш вәқәсидә йәр астида қалған вә издиливатқан 18 кишиниң көпичисиниң уйғур икәнлики һәққидә мәлумат бәрдуқ.