Керийидики һамилә қәтлиамида анилар кариватқа бағланған, атилар туғут өйигә бесип киргән

Мухбиримиз шөһрәт һошур
2013-12-30
Share
qorsaqtiki-bowaq-olturush.jpeg Техи балиятқу ичидики туғулай дәп қалған бовақ.
Photo: RFA

Икки күндин бери иҗтимаий ахбарат васитилиридә керийиниң ариш йезисида дуняға көз ечиш алдида турған 6 нәпәр бовақниң ана қарнида өлтүргәнлики, хитай даирилириниң қәтли қилинған бовақлар ата‏-анисиниң һәссиләп җәриманә төләш тәлипигиму писәнт қилмиғанлиқи һәққидә учурлар тарқалди. Мухбиримизниң бу һәқтә әһвал игиләшлири давамида мәзкур қәтлиамниң керийидики нурлуқ дохтурханиси дәп атилидиған бир шәхсий дохтурханида елип берилғанлиқи ашкариланди.

Зиянкәшликкә учриғучи аилиләрниң мухбиримизға паш қилиши вә йәрлик даириләрниң етирап қилишичә, чаршәнбә күнидин һазирға қәдәр мәзкур дохтурханида 4 бовақ қәтли қилинған, йәнә 4 айлиқ бир һамилә өлтүрүлүшни күтүп ятмақта. Өлтүрүлүши пиланланған йәнә бир һамилиниң аниси, пиланлиқ туғут хадимлиридин қечип йүрмәктә.

Соал: сиз мәттурсун қавулму?
Җаваб: шундақ, мән шу.
Соал: аңлисақ силәргә бир чоң аваричлиқ кәпту, зиянкәшликкә учрапсиләр, бу ишниң баш-ахири қандақ?
Җаваб: әр-аял иккимизни хотәндин тутуп келип 8 ай 3 күнлүк балимизни мәҗбурий чүшүрүвәтти, һазир биз билән бир ятақта үчәйлән бар, уларниңму 6 айлиқ, 7 айлиқ балилирини өлтүрүвәтти.
Соал: аялиңиз дохтурханиға қайси күни әкилинди?
Җаваб: чаршәнбә күни. Саәт бир болғанда окул урди, окул урулуп 16 саәттин кейин бала туғулди, бала йиғлап чүшти. Йиғисини аңлап тақәт қилип туралмидим, дохтурханиниң ишикини чеқип кирип баламни дохтурниң қолидин тартип елип наһийилик дохтурханиға апардим. Наһийилик дохтурханида қутқузуш үнүм бәрмәй йерим саәттин кейин җан үзди.
Соал: балиниң туғулғандики һалити қандақ?
Җаваб: қаш-көзлири қапқара, тирнақлириму бар, рәсмий бир адәм шәклигә кирип болған, туғулидиғанға йәнә 20 күнлүк вақти барикәндуқ, дохтурларниң дейишичә.
Соал: балини наһийилик дохтурханиға апарған чеғиңларда, балиниң пиланниң сиртидики бала икәнликини очуқ дедиңларму?
Җаваб: дедуқ, 4-бала икәнликини, мәҗбурий чүшүрүветилгәнликини.
Соал: силәрчә, наһийилик дохтурханидикиләр сәмимийлик билән қутқузушқа тиришип баққанмиду яки бала пиланниң сиртидики бала болғини үчүн, қәстән көңүл бөлмигән, йетәрлик тәдбир қолланмиған әһвал бармиду? бу һәқтә бир гуманиңлар барму?
Җаваб: дохтур, сестраларниң һәммиси йиғилип һәрикәт қилип бақти, баштила бизниң дохтурханиға кәлгән болсаңлар, балини чүшүрмәйттуқ, чүнки пиланлиқ туғут сиясити бойичиму 5 айлиқтин ашқан балини чүшүрүшкә болмайду, силәрниң йеза вә кәнттикиләрниң иши бу дейишти, шуңа бир җан болғандикин, қутқузушқа тиришти дәп ойлидуқ.

Соал: нурлуқ дохтурханисиниң туғут бөлүминиң ишикини чеқип киргиниңиздә немини көрдиңиз?
Җаваб: аялим кариватта бағлақлиқ йетипту, у мени қутқузушма, баламни қутқаз дәп варқираветипту, бир нәччә хәнзу аял баламниң қорсиқини бесиветипту, балиниң киндикини кесип бериңлар дедим, калдирлап бир немә дейишти; ахири балини қолидин юлуп елип ачиқип кәттим.
Соал: дохтурлар балиниң қорсиқини басқанда тирик туғулғачқа тунҗуқтуруп өлтүрүш үчүн басқан охшимамду?
Җаваб: шундақ дәп пәрәз қилимән. Наһийилик дохтурханидикиләрму балиниң қорсиқи қаттиқ бесилип кетипту, зәһәр ичигә өтүп кетипту деди.
Соал: аялни кариватқа бағлап қоюш адәттә һәммиси үчүн қоллиниламдикән?
Җаваб: яқ, мәҗбурий әкилингәнләргә қоллинидикән, һазир аялимниң биләклири көк.
Соал: силәр билән бир ятақтики қалған уч аялниңму биләклири бағлиниптиму?
Җаваб: шундақ. Пидәй бағлинипту. Бала өлүк туғулғандин кейин суляв халтиға селип тутқузуп қоюпту.
Соал: мушу дохтурханида йәнә бала чүшүрүш оператсийисини күтүп турғанлар барму?
Җаваб: бир аилә қечип йүрүпту, бир аилини һазир әкәлди.
Соал: шу һазир әкилингән аилигә телефониңизни бәрсиңиз?
Җаваб: вәй, мән мәтқурбан нури.
Соал: чүшүрүлмәкчи болған балаңлар қанчә айлиқ?
Җаваб: 4 айлиқ оғул, түнүгүн мени сақчиханиға 24 саәт солап қойди, бүгүн аялимни хотәндин мөкүп йүргән йеридин тутуп әкәлди. Һазир һәр иккимиз дохтурханида туруватимиз. Бизгә ярдәм қилсаңлар, 100 миң сом төлисәкму төлисәк, бала аман қалса, бизни бәк бозәк қипкетиватиду.
Соал: қачанлиққа оператсийә қилинмақчи?
Җаваб: бир саәттин кейин, дора берип чүшүридикән. Бир ярдәм қилиңлар, бир йол көрсәтсәңлар!
Соал: әсли буларниң қиливатқини пүтүнләй хата. Әмисә сиз һазир аялиңизни дохтурханидин ачиқип кетиң, бирқанчә күн көрүнмәңлар, аңғичә биз бу әһвалларни йәткүзидиған йәрләргә йәткүзәйли, бир үнүми боп қалса әҗәб әмәс.
Җаваб: болиду әмисә, шундақ қилай.
Соал: телефониңиз очуқ турсун, әһвалиңизни сүрүштә қилип турайли.
Җаваб: болиду, телефонум 24 саәт очуқ.

Юқирида, керийиниң ариш йезисида йүз бәргән һамилә қәтлиами һәққидә тәпсилий хәвәр бәрдуқ. Биз вәқәниң тәрәққияти һәққидә йәнә давамлиқ һалда хәвәр беримиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт