Yekendiki ésilip ölüwélish weqesining yenimu inchike tepsilatliri ashkarilandi

Muxbirimizning saqchi xadimliri bilen yenimu ilgirilep élip barghan söhbetliri dawamida yekende 28‏-yanwar küni yüz bergen ésilip ölüwélish weqesining yene bir qisim tepsilatliri ashkarilandi. Melum bolushiche, yekenning bagh hoyla ahaliler komitétida 25‏-yanwar küni échilghan siyasiy öginish yighinigha mezkur teweliktiki 16 yash bilen 45 yash arisidiki 200 che kishi qatnashqan. Yighinda bulardin 17 nepiri dölet shé'irini yadliyalmighanliqi üchün tenqidke uchrighan we ulargha 3 künlük möhlet bérilgen. 27‏-Yanwar küni bu 17 kishidin 6 kishi téxiche yadliyalmighan. Da'iriler bu 6 kishini shu küni jazalap taziliq ishigha salghan we ulargha yene 3 künlük möhlet bérip, 29-yanwar künigiche yadliyalmisa, 6 aydin 5 yilghiche qamaqqa késilidighanliqini uqturghan. Xitay dölet shé'irini yadlap bolushqa qurbi yetmigen tursun ablet 28‏-yanwar etigende ésilip ölüwalghan.

Melum bolushiche, weqe yüz bergendin kéyin yéza we kent derijilik kadir we saqchilardin teshkillen'gen bir guruppa mezkur weqe üstide tekshürüsh élip barghan. Tekshürüshke qatnashqan saqchi xadimi weqege baghlinishliq xadim we guwahchilar bilen ötküzgen söhbet xatirisidin mundaq melumat béridu. “Yeken nahiyilik kocha bashqarmisi ahalilerning komitétining bashliqi memettursun we bagh hoyla ahaliler komitétining mudiri turdi tursun qatarliq kadirlar we kursigha qatnashqan ahaliler bilen söhbet élip bardim.” 

Uning bayan qilishiche, guwahliq bergen ahalilerning hemmisi tursun abletning til-haqaretke chidimay ölüwalghanliqini ilgiri sürgen we ahaliler komitétining mudiri memettursun mexmutning kursqa qatnashqan pütün ahalilerni dölet shé'irini yadliyalmighanliqi üchün tillighanliqini pash qilghan. Söhbet xatiriside ahalilerdin birining töwendiki sözliri orun alghan: “‏25-Chésla ikki yüzche kishi yighin'gha qatnashtuq, 17 kishi dölet shé'irini yadliyalmiduq, bizni mudir ‛döt-éshekler‚ dep tillidi. 27‏-Yanwar küni 17 kishidin yene 6 kishi dölet shé'irini yadliyalmidi, ular taziliqqa sélindi hem ulargha 29-yanwarghiche yadlashmisang, birleshme jeng supisi (yitixu'a) gha kirgüzüwétimiz, dölet shé'iri qanuni boyiche 6 aydin 5 yilghiche késilisiler dep tehdit saldi.”

Melum bolushiche, bagh hoyla ahaliler komitétining mudiri, mes'uliyetni rayon'gha mes'ul mudir memettursun mexmutqa artqan. Umu memettursun mexmutning ahalilerni bir qétim kolléktip halda tillighanliqigha guwahliq bergen. 

Igilinishiche, ésilip ölüwalghan tursun ablet yeken bazar ichidiki bagh hoyla ahaliler komitétigha tewe bolsimu, emma uning nopusi eslide yeken baziridin 3 kilométir uzaqliqtiki tom'östeng yézisining xan'ériq yézisida iken. Uning xan'ériqtiki öyide béqiwatqan birqanche toxusi bar bolup, u ölüwalidighan küni öyidin ene shu toxulirigha dan chéchip bérish bahanisi bilen ayrilghan. U bu kona öydiki baranggha arqan sélip, ésilip ölüwalghan iken. 

Saqchi xadimi, tursun abletning burun héchqandaq jinayet ötküzüp baqmighan kishi ikenliki we ma'arip terbiyisi körüp baqmighanliqi, uning jazalinishtin qorqup ésilip ölüwalghanliq éhtimalliqini otturigha qoydi.