Марийә муһәммәт: «атуштики 90 яшлиқ анам қаранчуқсиз қалди, җәмәтимиздин 60 тин артуқ адәм тутқунда»

Мухбиримиз меһрибан
2019-04-01
Елхәт
Пикир
Share
Принт
Американиң бостун шәһиридә яшаватқан марийә муһәммәт ханимниң лагердики тағиси 80 яшлиқ абидун аюп әпәнди.
Американиң бостун шәһиридә яшаватқан марийә муһәммәт ханимниң лагердики тағиси 80 яшлиқ абидун аюп әпәнди.
Mariye Muhemmet teminligen

Марийә муһәммәт американиң бостун шәһиридә өзи ялғуз «йипәк йоли ресторани» намлиқ уйғур ашханисини ечип, 3 балисиниң оқушини қамдаватқан уйғур аяллириниң бири. Марийә муһәммәт ханим радийомиз зияритини қобул қилип, юрти атушта қаранчуқсиз қалған 90 яшлиқ аниси билән йеқинда үндидарда көрүшкәнликини вә анисидин хитай даирилири тәрипидин тутқун қилинип лагер вә түрмиләргә қамалған аилә әзалири һәққидә йеңидин аңлиған әһвалларни аңлатти.

Мария ханимниң билдүрүшичә, хитай даирилириниң бу аилигә қаратқан тәқипи 2015-йилила башланған икән. Марийә ханим америкаға кәлгәндин кейин өзи ялғуз балилирини беқиш билән бирликтә йәнә 2017-йилдин буян тутқун қилинип лагерларға қамалған уруқ-туғқанлириниң әһвалини давамлиқ сүрүштүрүп турған. Америкада елип берилған лагерларға наразилиқ билдүрүш паалийәтлиридә балилири билән бирликтә ери вә тутқун қилинған қериндашлириниң сүрәтлирини көтүрүп намайишларға қатнашқан.

Марийә ханимниң билдүрүшичә, униң аилиси «қуран кәрим» ни әрәб тилидин уйғур тилиға тәрҗимә қилған муһәммәт салиһ һаҗимниң йеқин туғқанлиридин һесаблинидикән. Атушта хәлқ ичидә «диний етиқади мустәһкәм, тәқвадар җәмәт» дәп қарилидиған бу җәмәттинла 2 йил ичидә 60 тәк киши тутқун қилинған.

Униң 90 яштин ашқан аниси йеқинда униң билән үндидар арқилиқ көрүшкәндә өзиниң қаранчуқсиз, тикәндәк ялғуз қалғанлиқини, һәтта өлүп тартип қалса бешида туруп дәпнә қилғудәк туғқининиңму қалмиғанлиқини билдүргән.

Марийә ханим аилисигә кәлгән еғир күлпәтләрни вә тутқун қилинған аилә әзалириға мунасивәтлик учурларни американиң мунасивәтлик һөкүмәт органлири вә америка дөләт мәҗлисидики мунасивәтлик кишиләргә мәктуб шәклидә төвәндикидәк йоллап бәргән:

1. Марийә ханимниң ери садиқ әли (кимлик номури: 653021197109010219 ). Садиқ әли 2015-йили балилирини америкада оқутуш үчүн әкелип қойған. Шундин кейин даириләр униң паспортини тартивалған. 2018-Йили 6-ай мәзгилидә үрүмчидин юрти атушқа чақиртип әкетилип, аввал өгиниш намида атуштики лагерларниң биригә қамалған. 2018-Йили 11-айда марийә ханимниң аписи турниса һаҗимниң тәлипи билән қейнаниси билән көрүштүрүлгән. Шундин кейин униң из-дерикини елиш мумкин болмиған.

2. Марийә ханимниң бир туғқан қериндашлиридин ‏-инилири бурһан муһәммәт (кимлик номури: 653021196706150443), исмаил муһәммәт (кимлик номури: 653021197302090433), сиңиллиридин рәшидә муһәммәт (кимлик номури: 653021197205230422), асийә муһәммәт (кимлик номури тәминләнмигән), қатарлиқлар җорилири вә балилири билән бирликтә тутқун қилинип, лагерларға елип кетилгән. 2018-Йили 11-айда марийә ханимниң аписи турниса һаҗимниң тәлипи билән униң икки иниси аписи турниса һаҗим билән көрүштүрүлгәндин кейин уларниң из-дерикини елишму мумкин болмиған.

3. Марийә ханимниң тағилиридин-атуш бостан мәһәллиси қайрақ мәсчитиниң имами 90 яшлиқ юрт мөтивири абидин аюп һаҗим 2018-йили тутқун қилинип, лагерға елип кетилгәнчә из-дерики болмиған.

4. Марийә ханимниң тағилиридин ғаппарҗан муһәммәт (кимлик номури: 653021196303180815), ибраһимҗан муһәммәт (кимлик номури: 653021196909150450) вә уларниң балилирини өз ичигә алған аилә әзалириму 2016-йилиниң ахиридин башлап тутун қилинип, лагерларға елип кетилгән.

5. Марийә ханим тәминлигән учурларда йәнә атушта «тәқвадар аилә» дәп нам алған бу җәмәтниң аилә әзалиридин әнвәрҗан әли, рози һемит, саригүл рози, мамут абидин, абдусәми абла, абдукерим абла, андуғәни абла, меһригүл абла қатарлиқ бир нәврә туғқанлириму җорилири вә балилири билән бирликтә тутқун қилинип лагерларға қамалған. Нөвәттә уларниң қәйәрдә икәнлики мәлум әмәс икән.

Юқириқи аваз улинишидин мухбиримиз меһрибанниң марийә ханим билән өткүзгән сөһбитиниң тәпсилатини аңлайсиләр.

Пикирләр (0)
Share
Толуқ бәт