Lagér shahidlirining gérmaniyediki guwahliq bérish pa'aliyetliri netijilik axirlashti

Lagér shahidliridin qelbinur sidiq we gulbahar xatiwajining gérmaniyediki ikki heptige sozulghan guwahliq bérish pa'aliyetliri netijilik axirlashqan.

Lagér shahidliridin qelbinur sidiq we gulbahar xatiwajining gérmaniyediki axirqi guwahliq bérish pa'aliyiti 20-noyabir gérmaniyening karlsruxé shehiride ötküzülgen. Karlsruxé shehiride yashaydighan Uyghur ziyaliysi enwer ehmet ependining bildürishiche, bu pa'aliyetke korona wirusi cheklimisige qarimastin, köp sanda kishi qatnashqan we nahayiti tesirlik bir pa'aliyet bolghan.

Qelbinur sidiq we gulbahar xatiwajining gérmaniyediki guwahliq bérish pa'aliyiti 7-noyabir bashlan'ghan bolup, ikki heptige sozulghan bu pa'aliyet gérmaniyediki 10 sheherde élip bérilghan. Mezkur pa'aliyet “Yawropa sherqiy türkistan birliki” teshkilatining orunlashturishi we “Tehdit astidiki xelqlerni qoghdash teshkilati”, “Xelqara kechürüm teshkilati” qatarliqlarning hemkarliqida élip bérilghan. “Yawropa sherqiy türkistan birliki” teshkilatining re'isi esqer jan ependi bu heqte toxtalghanda, bu guwahliq bérish pa'aliyitining gérmaniye metbu'atlirining küchlük diqqitini tartqanliqini tilgha aldi. Uning bildürishiche, guwahliq anglash yighinigha qatnashqan bezi kishiler shahidlarning sözliridin tesirlinip yighlap ketken.

Hazir gollandiyede yashawatqan lagér shahidi qelbinur sidiq bu munasiwet bilen ziyaritimizni qobul qilghanda, ikki heptilik bu guwahliq pa'aliyitining nahayiti tesirlik we netijilik bolghanliqini bildürdi. Firansiyede yashawatqan lagér shahidi gulbahar xatiwaji bu heqte toxtalghanda, bu pa'aliyetler esnasida bezi gérmanlarning “Gérmaniye hökümitining Uyghur irqiy qirghinchiliqini étirap qilmighanliqidin nomus qilghan” liqini bildürgenlikini eskertti.

Lagir shahidlirining jaza lagérliri toghrisida guwahliq bérish pa'aliyiti ilgiri-kéyin gérmaniyening myunxén, réginisburg, awgusburg, würsburg, frankfurt, göttin'gén, layipsig, xannowér, bérlin we karlsruxé sheherliride, shundaqla chéxiyening praga shehiride ötküzülgen.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar