Қәшқәр йеңишәһәрдә 22 яшлиқ алимҗан әмәт лагерға әкетилип 40 күндин кейин җәсити чиққан

Мухбиримиз шөһрәт һошур
2019-07-05
Елхәт
Пикир
Share
Принт
Тез сүрәттә көпийиватқан «йепиқ тәрбийәләш лагери» йәни хитайниң җаза лагеридин бириниң көрүнүши. 2018-Йили 3-декабир, атуш.
Тез сүрәттә көпийиватқан «йепиқ тәрбийәләш лагери» йәни хитайниң җаза лагеридин бириниң көрүнүши. 2018-Йили 3-декабир, атуш.
AP

Қәшқәр йеңишәһәрлик муһаҗирлардин бири бүгүн радийомизға мәктуп йоллап, йеңишәһәр партийә мәктипиниң қоғдаш хадими алимҗан әмәтниң өткән йилниң оттурилири лагерға әкетилип, 40 күндин кейин аилисигә җәсити берилгәнликини хәвәр қилди. Мухбиримизниң қәшқәр йеңишәһәргә қарита елип барған телефон зиярәтлири давамида алақидар хадимлар бу учурниң тоғрилиқини дәлиллиди. Алимҗан әмәтниң хизмәт орнида йошурунчә намаз оқуғанлиқи йәни ишарәт намизи оқуғанлиқи үчүн лагерға әкетилгәнлики илгири сүрүлмәктә.

Һөрмәтлик радио аңлиғучилар, бу һәқтә радийомизға кәлгән мәктупта, 22 яшлиқ алимҗан әмәтниң йеңишәһәр наһийәсиниң әрмудун йезисиға нопуслуқ икәнлики, йеңишәр наһийәлик партийә мәктәптә қоғдаш хадими болуп ишләштин аввал бир мәһәл әрмудун қәрз копиратипида ишлигәнлики вә бу йәрдики вақтида намаз оқуйдиғанлиқи байқилип қелип иштин һәйдәлгәнлики илгири сүрүлгән. Әрмудун йезилиқ қәрз копиратипидики қоғдаш хадимлири, бу идаридин лагерға әкетилгән вә лагерда өлгәнләр барлиқини инкар қилған болсиму, әмма бу орунда бурун алимҗан исимлик бирәйләнниң ишлигәнлики вә иштин һәйдәлгәнликини ашкарилиди. Йеңишәһәр наһийәсидики бир аяллар мудири, наһийәлик партийә мәктәпниң қоғдаш хадими 22 яшлиқ алимҗан әмәтниң лагерда өлгәнликини дәлиллиди. Униң дейишичә, алимҗан әмәт өткән йилниң оттурилири лагерға әкетилип 40 күндин кейин аилисигә җәсити берилгән. Мейит йәрликкә қоюлуш давамида, мәзкур аилә сақчилар тәрипидин назарәт астиға елинған.

Алимҗан әмәтниң лагерда өлгәнлики һәққидә радийомизға кәлгән учурда, униң әслидә бир оқутқучи аилисидә чоң болғанлиқи, оттура мәктәпни пүттүрүп алий мәктәпкә өтәлмигәндин кейин роһий җәһәттин чүшкүнләшкән алимҗанниң диний китабларни оқуш вә тәблиғ аңлаш арқилиқ, роһий җәһәттин тикләнгәнлики қәйт қилинған. Мәзкур аяллар мудири алимҗанниң қәмбәрниса исимлик оқутқучи һаммиси барлиқини баян қилди; әмма униң тутулуш сәвәби һәққидә мәлумат берәлмиди. Мәктупта, алимҗан әмәтниң һидайәт йолиға маңғанлиқи сәвәблик қәрз копиратипидики ишидин айрилғанлиқи баян қилиниш билән бирликтә, бир йилдин буян хизмәт қиливатқан наһийәлик партийә мәктәп қоғдаш бөлүмидиму, йошурун йәни ишарәт намизи оқуғанлиқи сақчиларға доклат қилинип лагерға әкетилгәнлики йезилған. Йеңишәһәр наһийәлик партийә мәктипи, бу һәқтики соаллиримизға җаваб беришни рәт қилди. Мәктупта йәнә алимҗан әмәтниң сорақ җәрянида, өзиниң ишарәт намизи оқуғанлиқини инкар қилғанлиқи вә бу сәвәбтин қейин-қистаққа елинғанлиқи вә униң қейин-қистақтин өлгәнлики йезилған. Мәзкур аяллар мудириму, алимҗанниң қейин-қистаққа елиниш әһвалидин хәвәрсизликини ейтти; әмма алимҗанниң лагерға әкетилиштин бурун саламәтликидә мәсилә йоқлуқи вә сағлам бири икәнликини тилға алди.

Илгири зияритимизни қобул қилған бир лагер сақчиси лагерда ишарәт намизи оқушниң алаһидә еғир әһвал дәп қарилидиғанлиқи вә бу хил әһвал садир қилғанларниң дөләт аманлиқ сақчилириға йәни гобавға тапшурулидиғанлиқини ашкарилиған иди.

Юқирида ишарәт намизи оқуғанлиқи үчүн лагерға әкетилгән 22 яшлиқ алимҗан әмәтниң 40 күндә лагердин җәсити чиққанлиқи һәққидә аңлитиш бәрдуқ.

Пикирләр (0)
Share
Толуқ бәт