Йеңишәһәр әрмудунда идрис қуддус вә һезим қуддус ака-укиларниң лагерда өлгәнлики дәлилләнди

Мухбиримиз шөһрәт һошур
2019-09-12
Елхәт
Пикир
Share
Принт
Хитай уйғур районида қурған йиғивелиш лагерлириниң бир. 2019-Йили 2-июн, атуш.
Хитай уйғур районида қурған йиғивелиш лагерлириниң бир. 2019-Йили 2-июн, атуш.
AFP

Җәмийәт хәвәрлиридә баян қилишичә, уйғур районидики йиғивелиш лагерлирида елип бериливатқан қейин-қистақтин башқа начар ятақ, начар тамақ вә начар давалаш шараитлириму һәр күни дегүдәк көп санда кишиниң өлүмигә сәвәб болмақта. Әмма даириләр та һазирға қәдәр, худди лагерда йетиватқанларниң омуми сани һәққидә һечқачан мәлумат берип бақмиғандәк лагерда өлгәнләрниң сани һәққидиму мәлумат бәрмиди. Шуңа биз йеқинқи аяллардики лагерлар тоғрулуқ ениқлашлиримизда, лагердики өлүм-йетим вәқәлирини асаслиқ диққәт мәркизи қилдуқ.

Мәлум болушичә, даириләр лагерда өлгәнләрниң өлүм учурини өлгүчиниң биваситә уруқ-туғқанлиридин башқилардин пүтүнләй сир тутмақта. Һәтта асаси қатламдики сақчи хадимлириму, өзи мәсул кәнт яки мәһәллә сиртидики кишиләрниң лагердики өлүм һадисилиридин хәвәрсиз қалдурулмақта. Ениқлашлиримиздин йәнә мәлум болушичә йезиларға чүшкән һәр дәриҗилик хизмәт гуруппилири лагерда өлгәнләрниң әһвалини йошуруш вә униң җәмийәткә тарқилишиниң алдини елиш үчүн вәзипәләндүрүлмәктә. Қәшқәрниң йеңишәһәр наһийәсигә хизмәткә чүшкән бир хадим, өзи мәсул болмиған әрмудун йеза 3-кәнт 5-мәһәллидә лагерда өлгән бирму киши йоқлуқини баян қилған иди. Әмма мәзкур мәһәллә башлиқи бу мәһәллидин лагерға әкетилгәнләрдин ака-ука идрис қуддус билән һезим қуддусниң бултур йилниң ахири вә бу йилниң оттурилири болуп, һәр иккисиниң лагерда җан үзгәнликини ашкарилиди.

Бу мәһәллә башлиқи бала йәнә идрис қуддус билән һезим қуддусниң өлүм сәвәби вә җәряни һәққидә өзлиригә сақчилардин тәрипидин һечқандақ мәлумат берилмигәнлики, мусибәттики аилидин һал сорап барған вақтида, бу аилә әзалириниңму өлүм сәвәби һәққидә гәп қилишқа җүрәт қилалмиғанлиқини баян қилди. Униң дейишичә, йеңишәһәрдә у билидиған икки йиғивелиш лагери бар болуп; идрис қуддус йеңишәһәрдики чеңнән лагерда бир мәһәл турғандин кейин, җинайити байқилип кесиветилгән вә үрүмчидики бир түрмигә йөткәлгән. У өткән йил декабирда үрүмчидики түрмидә җан үзгән. Һезим қуддус йеңишәһәрдики чеңнән лагерида аталмиш тәрбийәлниватқан мәзгилидә, йәни бу йил 6-айда һаятидин айрилған.

52 Вә 45 яшлардики бу ака-укиларниң өлүм сәвәбидин мәһәллә кадирлири та һазирғичә хәвәр тапалмиған. Йәнә җәмийәт хәвәрлиридә дейилишичә, даириләр лагерда өлгәнләрниң бир қисминиң җәситини, ғәлвә қилмаслиқ вә мәхпий тутуш шәрти билән аилисигә қайтурған; әмма көпинчисиниң җәсити аилисигә берилмигән. Йеңишәһәр әрмудунлуқ идрис қуддусниң җәситиму үрүмчидин аилисигә әкилинмигән. Әмма җәсәтниң немә үчүн аилисигә берилмигәнлики вә үрүмчидә қандақ бир тәрәп қилинғанлиқи һазирчә мәлум әмәс.

Пикирләр (0)
Share
Толуқ бәт