Пичан ләмҗинлик ғалипҗанниң лагерда бир мәст хитай сақчи тәрипидин уруп өлтүрүлгәнлики ашкариланди

Мухбиримиз шөһрәт һошур
2019-10-22
Елхәт
Пикир
Share
Принт
Лагерда вәзипә өтәватқан бир мәст хитай сақчи тәрипидин уруп өлтүрүлгән ғалипҗан.
Лагерда вәзипә өтәватқан бир мәст хитай сақчи тәрипидин уруп өлтүрүлгән ғалипҗан.
RFA/Shöhret Hoshur

Өткән айда радийомизға кәлгән вә үрүмчидин йолланғанлиқи билдүрүлгән бир мәктупта, пичан наһийә ләмҗин йеза 10-кәнт 3-мәһәллә әзаси 35 яшлиқ ғалипҗанниң өткән йили 8-айниң 21-күни лагерда өлгәнлики мәлум қилинғаниди.

Мухбиримизниң елип барған телефон зиярәтлири давамида, ғалипҗанниң лагерда вәзипә өтәватқан бир мәст сақчи тәрипидин уруп өлтүрүлгәнлики ашкариланди.

Мәзкур инкасчиниң баян қилишичә, ғалипҗанниң ләмҗин базири 10-кәнт, 3-мәһәллисидә олтурушлуқ аниси 2018-йили 8-айниң 21-күни лагер башқурғучилиридин оғлиниң дохтурханида өлгәнлики һәққидә уқтуруш алған. Ғалипҗанниң уруқ-туғқанлири шу күни кәч саәт 6:30 мәзгилидә дохтурханиға барғинида, ғалипҗанниң көксигә йүрәк қозғатқуч қоюлған һаләттики җәситини көргән. Даириләр уларға ғалипҗанниң йошурун йүрәк кесили барлиқи, лагерда бу кесилиниң қозғилип қалғанлиқи, дохтурханиға әкелингәндә қутқузуш үнүм бәрмәй җан үзгәнликини билдүргән. Әмма даириләр уларға ғалипҗанниң йүз-көзи вә бәдининиң көксидин башқа қисмини көрсәтмигән.

Телефонимизни қобул қилған, ләмҗин базиридики бир сақчи хадими ғалипҗанниң өлүми һәққидики соалимизға җаваб бериштин өзини тартти вә бу һәқтә шәһәрлик сақчи идарисидин мәлумат елишимизни тәвсийә қилди. Шәһәрлик сақчидики бир хадимму, ғалипҗанниң өлүми һәққидә мәлумат беришни рәт қилди. Әмма ләмҗиндики аһалиләрдин бири бу мәһәллидә өткән йили лагерда өлүп кәткән ғалипҗанниң аилисиниң аяқ мәһәллидә олтурушлуқ икәнликини ашкарилиди. Аяқ мәһәллидики бир кәнт кадири

Лагерда өлгән ғалипҗанниң дадисиниң исминиң әхмәтҗан икәнлики вә 1-мәһәллигә нопуслуқ икәнликини баян қилған болсиму, униң сәвәби һәққидә мәлумат берәлмиди.

Инкаста, ғалипҗанниң 35 яшлар чамисида икәнлики, 5 яшлиқ бир балиси барлиқи йезилған вә ғалипҗанниң җәситиниң кәнт кадирлири вә сақчилар тәрипидин шу күни кечиләп йәрликкә қоюветилгәнлики, мейитниң ююлишиғиму рухсәт қилинмиғанлиқи йезилған. Телефон зиярәтлиримиз давамида, 1-мәһәллә башлиқи, ғалипҗанниң лагерда вәзипә өтәватқан бир сақчи хадими тәрипидин сорақханида уруп өлтүрүлгәнлики, сақчи хадими шу күни вәзипә өтәватқанда еғир мәст икәнликини ашкарилиди. Бу мәһәллә башлиқиниң дейишичә, даириләрниң ғалипҗанни уруп өлтүргән сақчи хадимини вәзипә өтәватқан мәзгилидә һарақ ичкәнлики үчүн бәлгилик дәриҗидә җазалиған. Әмма бу сақчи хадиминиң кимлики вә ғалипҗанни өлтүрүп қоюш җәряни һәққидә ғалипҗанниң аилиси вә кәнт кадирлириға мәлумат бәрмигән. .

Мәзкур мәһәллә башлиқи җәмийәттин аңлиғанлириға асасән, ғалипҗанни уруп өлтүргән сақчиниң әслидә әмгәк билән өзгәртиш мәйданиниң сақчиси икәнлики вә лагерға вақитлиқ вәзипә үчүн кәлгәнлики һәм миллити хитай икәнликини билдүргән болсиму, әмма униң исим-фамилисини дәп берәлмиди.

Һөрмәтлик радио аңлиғучилар, юқирида пичан ләмҗинлик ғалипҗанниң лагердики бир мәст хитай сақчи тәрипидин уруп өлтүрүлгәнлики һәққидә аңлитиш бәрдуқ.

Пикирләр (0)
Share
Толуқ бәт