Lé'o maye: “Muhajirettiki Uyghurlar üchün nan wetenning bir parchisidur”
2023.12.28

“Muhajirettiki Uyghurlar üchün nan wetenning bir parchisidur!” deydu, firansiyelik Uyghur nan medeniyiti tetqiqatchisi lé'o maye.
Nöwette jenwe uniwérsitétida doktorluq aspirantliqida oquwatqan lé'o maye Uyghur nan medeniyiti we Uyghur nawaychiliqi toghrisida chongqur izdinish élip barghan yash tetqiqatchilarning biridur. U, bügünki ziyaritimiz dawamida nanning Uyghurlarning muhajirettiki kündilik hayatida tutqan orni heqqide öz qarashlirini rawan Uyghur tili bilen bayan qildi.
Lé'o maye ependi, Uyghur xelqining tarixtin buyan her bir hüner-kespte öz aldigha risale tutup mangghanliqi, buning bir en'enige aylan'ghanliqi, risalilerning yalghuz bir qolyazma yaki kitabchila emes, belki Uyghurlarning hüner-kesp medeniyitidiki mexsus qa'ide-mizan ikenlikini, shundaqla risalilerning Uyghur soda exlaqining ölchimi süpitide ustamlarning shagirtlarni terbiyeleydighan desturi ikenlikini tekitlep ötti.
Uyghur millitining qayghusini özining qayghusi dep bilidighan we ularning hazirqi teqdiridin qattiq endishe qilidighan lé'o maye, Uyghur medeniyitining her bir kichik halqisighiche qétirqinip öginishke bashlighan iken. U, ziyaritimiz jeryanida hetta özining toyi bolghanda istanbuldin mexsus dashqazan ekeldürüp, Uyghur polusi we kawapliri bilen toy murasimini ötküzgenlikini tekitlep ötti.
Lé'o ependi axirida yene chet elde Uyghur nawayliqini saqlap qélish we Uyghur nanlirini xelq'ara bazargha yüzlendürüsh heqqide özining bir qisim köz qarashliri we tewsiyelirini otturigha qoyup ötti.
Özige Uyghurche “Shir'eli” dep isim qoyuwalghan doktorant lé'o maye özining Uyghur nan medeniyiti we Uyghur nawaychiliqi heqqidiki izdinishlirini, shundaqla Uyghur medeniyitining nöwette kommunist xitay hakimiyiti teripidin weyran qilinishigha qarita küchlük endishilirini anglarmenler bilen ortaqlashti. Biz uninggha Uyghur xelqi, jümlidin Uyghur anglarmenler namidin rehmitimizni bildürüp, ziyaritimizni axirlashturduq.