500 Дин артуқ киши лондондики хитай әлчиханиси алдида намайиш өткүзгән

Ихтиярий мухбиримиз әркин тарим
2020-01-20
Елхәт
Пикир
Share
Принт
«Бир дуня һәрикити» тәшкилатиниң уюштуруши билән хитай әлчиханиси алдида өткүзүлгән намайиштин көрүнүш. 2020-Йили 19-январ, лондон.
«Бир дуня һәрикити» тәшкилатиниң уюштуруши билән хитай әлчиханиси алдида өткүзүлгән намайиштин көрүнүш. 2020-Йили 19-январ, лондон.
RFA/Erkin Tarim

Әнглийәдики толуқ оттура мәктәп оқуғучилири қурған «бир дуня һәрикити» тәшкилатиниң уюштуруши билән 1-айниң 19-күни хитайниң лондонда турушлуқ әлчиханиси алдида намайиш өткүзүлгән.

Уйғурлар, тибәтликләр вә хоңкоңлуқларни қоллаш мунасивити билән өткүзүлгән бу намайишниң мәқсити хитайниң тибәттә, уйғур диярида вә хоңкоңда елип бериватқан вәһшиянә бастуруш сияситини паш қилиштин ибарәт икән.

Намайишқа бурун уйғурлар үчүн намайишқа қатнишип бақмиған нурғун кишиләр болуп, 500 әтрапида киши иштирак қилған. Улар қоллирида ай-юлтузлуқ көк байрақ вә лозункиларни көтүргән һалда «уйғурларға әркинлик, хитай җаза лагерлирини тақисун, хитайлар шәрқий түркистандин чиқип кәтсун, хитай уйғурларға елип бериватқан ирқий қирғинчилиқни тохтатсун!» дегәндәк шоарларни товлашқан.

Бу һәқтә телефон зияритимизни қобул қилған әнглийәдики уйғур паалийәтчи, дуня уйғур қурултийиниң лондонда турушлуқ вәкили рәһимә мәхмут ханим 1-айниң 19-күни лондондики хитай әлчиханиси алдида өткүзүлгән намайиш тоғрисида мәлумат бәрди. У хитайға қарши намайишниң мәқситини изаһлап өтти.

Мәзкур намайишқа лондонда тонулған 2 имам, бир христиан поп, көп санда йәһудий паалийәтчиләр, кишилик һоқуқ тәшкилатлириниң мәсуллири қатнашқан вә нутуқ сөзлигән. Рәһимә мәхмут ханим бу һәқтә мәлумат бәрди.

Рәһимә мәхмут ханим йәнә бу кишиләрниң бирлишип әнглийә баш министириға мәктуп язғанлиқини, намайишниң мувәппәқийәтлик өткәнликини, кишиләргә үмид болғанлиқини баян қилди.

Мәлум болушичә, лондонда бурундин тартип хитайға наразилиқ билдүрүш паалийәтлири, болупму намайишлар изчил һалда өткүзүлүп келинмәктикән. Өткән йилиниң оттурилиридин тартип әнглийә парламентидиму бәзи паалийәтләр елип берилишқа башлиған. Болупму әнглийәниң әмгәк партийәси өткән йили 9-айда «уйғурларни қоллаш һәрикити» намида бир гуруппа қуруп, һәр айниң 5-күни хитайға қарши наразилиқ намайиши өткүзүшни қарарлаштурған иди. Бу намайишларға әң көп болғанда 200 әтрапида киши қатнишип кәлгән иди. Әнглийә уйғур җәмийитиниң башқуруш һәйити әзаси керәм заһир әпәндиниң ейтишичә, бу қетимлиқ намайишқа 500 дин көп киши иштирак қилған. Бу әнгилийәдә уйғурларни қоллаш йүзисидин өткүзүлгән әң чоң намайишлардин бири һесаблинидикән.

Дуня уйғур қурултийи мәсуллириниң қатнишиши билән 2019-йил 24-июл күни әнглийә парламентида гуваһлиқ бериш йиғини уюштурулуш билән бир вақитта йәнә йиғин хатимисидә «барлиқ партийә вәкиллириниң аваз қошуши» билән «уйғур достлуқ гурупписи» қурулған иди. Сиясий көзәткүчиләр алдимиздики йилларда әнгилийәдә уйғур дәвасиниң техиму юқири көтүрүлидиғанлиқини илгири сүрмәктә.

Пикирләр (0)
Share
Толуқ бәт