Өсмүрләр «уйғурум-анам» намлиқ ана тил мусабиқисигә актип қатнашти

Ихтиярий мухбиримиз әркин тарим
2017-12-27
Елхәт
Пикир
Share
Принт
«Уйғурум-анам» ана тил көрики баһалаш хуласиси. Уйғур яр тори (www.uyghuryar.org).
«Уйғурум-анам» ана тил көрики баһалаш хуласиси. Уйғур яр тори (www.uyghuryar.org).
RFA/Erkin Tarim

Хитай һөкүмити уйғур тилида маарипни әмәлдин қалдуруп, хитай тилини мәҗбурий өгитишкә тиришиватқан бүгүнки күнләрдә чәтәлләрдики уйғурлар пәрзәнтлиригә ана тилини өгитиш паалийитини қанат яйдурмақта. Бу мәқсәт билән «уйғуряр фонди» билән «уйғур адашлар гурупписи» пүтүн дуняда «уйғурум-анам» намлиқ ана тил көрики өткүзүш уқтурушини тарқатқан иди. 2017-Йили 12-айниң 15-күнигичә бу паалийәткә иштирак қилған уйғур пәрзәнтлири 14 парчә нахша вә декламатсийә, 40 парчә түрлүк рәсим вә гүзәл сәнәт әсири, 3 парчә әдәбий әсәр әвәткән. «Уйғуряр» ниң көрәккә әвәтилгән әсәрләрни баһалаш комитети әзалиридин күндүзай һамут ханимниң ейтишичә, әсәр әвәткән уйғур яш-өсмүрлириниң кичики үч яш, чоңи 12 яш болуп, булар өз йешиға нисбәтән елип ейтқанда бу ишқа бәкму тиришчанлиқ көрсәткән.

Шветсийәдә туруватқан уйғур зиялийси абдушүкүр мәмәт әпәнди он нәччә йилдин бери чәтәлдики уйғурлар ана тил мәктәплирини ечип пәрзәнтлиригә уйғур тилини өгитишкә тиришиватқанлиқини, бүгүнки күндә болса бу балиларни ана тилини өгинишкә қизиқтуруш үчүн «уйғурум-анам» ана тил көрикини уюштурғанлиқини, буларниң уйғур миллий кимликини күчәйтиш роли барлиқини баян қилди. 

Абдушүкүр мәмәт әпәнди бу көрәккә әвәтилгән әсәрләрниң темисиниң «уйғур икәнликини, пүтүн әсәрләрдә уйғурлар тонуштурулғанлиқи» ни баян қилди. 

Уйғур зиялийси абдушүкүр мәмәт әпәнди бу паалийәтниң уйғур яш-өсмүрләргә илһам вә мәдәт болидиғанлиқини тәкитлиди.

«Уйғурум-анам» ана тил көрикигә 57 парчә һәр түрлүк әсәр әвәтилгән болуп, буларниң ичидин йеримигә йеқини мукапатқа еришкән болуп, мәзкур мукапатларға тағ-дәря, һайванат вә гүл-чечәкләрниң намлири берилгән. Абдушүкүр әпәнди бундақ намларни бериштики сәвәбләр тоғрисида тохталди. 

«Уйғур адашлар гурупписи» намидики ватсап гурупписиниң қурғучилиридин бири болған һазир шветсийәдә турушлуқ уйғур зиялийси күндүзай ханим, «уйғуряр фонди» билән бирликтә өткүзгән бу паалийәтниң яхши өткәнликини күткән үмидкә йәткәнликини баян қилди. 

«Уйғуряр фонди» ниң истанбулдики мәсуллиридин батур қараханли әпәнди бу паалийәтни өткүзүш арқилиқ өзлиригә болған ишәнчниң күчәйгәнликини, 2018-йили уйғур яш-өсмүрлирини йиғип лагер паалийити өткүзүшни пиланлаватқанлиқини баян қилди. 

«Уйғуряр фонди» 2016-йили 10-айда мәрипәтпәрвәр 7 нәпәр уйғур тәрипидин қурулған болуп, һазирғичә иқтисадий җәһәттин қийнилип қалған көп сандики уйғур оқуғучиларға ярдәм қилип кәлмәктә. Мәхсус оқуш мукапат пули тәсис қилип, түркийәдә оқуватқан оқуғучиларға ярдәм қолини сунмақта.

Пикирләр (0)
Share
Толуқ бәт