Тонулған диний зат, өлима абдулһәкимхан мәхсум һаҗим аләмдин өтти

Ихтиярий мухбиримиз әркин тарим
2016.12.22
abdulhekimxan-mexsum-yighinda.jpg Түркийәдики шәрқий түркистан маарип җәмийитиниң рәһбири абдулһәкимхан мәхсум.
RFA/Erkin Tarim

Түркийәниң истанбул шәһиридә паалийәт елип бериватқан “шәрқий түркистан маарип вә һәмкарлиқ тәшкилати” билән “шәрқий түркистан өлималар бирлики” ниң қурғучи әзаси вә назири, тонулған диний зат, паалийәтчи абдулһәкимхан мәхсум 12-айниң 22-күни әтигән туюқсиз һошидин кетип аләмдин өткән. Униң вапати түркийәдики уйғурлар арисида қайғу вә мусибәт пәйда қилди. Униң намизи 12-айниң 23-күни истанбул зәйтинбурнидики әмин инанч мәсчитидә җүмә намизидин кейин чүшүрүлүп, дәпинә қилинмақчи.

Абдулһәкимхан мәхсум ким? униң уйғур дәвасиға қошқан төһписи немиләрдин ибарәт? униң 53 йиллиқ һаяти қандақ һаят иди? бу һәқтә мәлумат игиләш үчүн униң әң йеқин сәпдиши һидайәтулла оғузхан әпәнди, сәпдиши нимәтуллақ қарим, иқтисадшунас абдурешит абдухәмит әпәнди вә дуня уйғур қурултийи муавин рәиси сейит түмтүрк әпәндиләр билән сөһбәт елип бардуқ.

Һидайәтулла оғузхан әпәнди, диний зат өлима абдулһәкимхан мәхсумниң һаяти һәққидә мәлумат бәрди вә мәрһумниң уйғур дәвасиға қошқан төһписиниң зор икәнликини тәкитлиди.

Дуня уйғур қурултийи муавин рәиси сейит түмтүрк әпәнди абдулһәкимхан мәхсум билән он нәччә йил бурун йәни “шәрқий түркистан маарип вә һәмкарлиқ тәшкилати” ни қуруш вақтида тонушқанлиқини, униң қисқа вақит ичидә көрүнәрлик нәтиҗиләрни қолға кәлтүргән өлима икәнликини баян қилди.

Көп қетим абдулһәкимхан мәхсумниң диний сөһбитини аңлиған абдурешит абдухәмит әпәнди, мәрһумниң көп тәрәплимилик билимгә игә бир зат икәнликини, униң вапатиниң “шәрқий түркистан дәваси” үчүн бир зор йоқитиш икәнликини баян қилди.

Абдулһәкимхан мәхсум 1963-йили қәшқәр вилайитиниң қағилиқ наһийисидә дуняға кәлгән. У, башланғуч, оттура вә толуқ оттура мәктәпни қағилиқта пүттүргәндин кейин, әйни чағда уйғур диярида тонулған өлима абдулһәкимхан мәхсумниң қолида диний илимләрни өгәнгән. У, уйғур елиниң һәрқайси җайлирида бир мәзгил диний тәрғибат ишлири билән шуғулланғандин кейин мисирниң пайтәхти қаһирәдики әзһәр университетида магистирлиқта оқуған вә оқушни тамамлиғандин кейин түркийәгә келип йәрләшкән, түркийәдә тәшкилат қуруп уйғур яш-өсмүрләрни диний җәһәттин оқутушқа зор әһмийәт бәргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.