Афғанистанда тутқун қилинип хитайға қайтурулған уйғурлар һәққидики вәқәниң тәпсилати ашкариланди (2)

Мухбиримиз қутлан
2016.03.03
afghanistan-ibrahim-uyghur.jpg Ата-аниси 1961-йили ғулҗидин афғанистанға кочуп чиққан, өзи йерим әсирдин буян афғанистанда яшап кәлгән ибраһим уйғур
RFA/Qutlan


Йеқинда радийомиз зияритини қобул қилған афғанистанлиқ икки нәпәр уйғур буниңдин бир йил илгири афған даирилири тәрипидин тутқун қилинип хитайға тапшуруп берилгән уйғур тутқунлар һәққидики бәзи мәлуматларни ашкара қилди.

Нам-шәрипини ашкарилашни халимайдиған афғанистанлиқ бир уйғур аял шаһит гуваһлиқ берип, әйни чағда афған сақчилири тутқун қилинған уйғур тиҗарәтчиләр вә уларниң аилә тавабиатлирини хитайға қайтуридиған чағда, өзиниң афған сақчи башлиқиға пара бериш арқилиқ бир нәпәр уйғур қизни қутулдуруп қалғанлиқини илгири сүрди.

Һалбуки, пул елиш шәрти билән бир нәпәр уйғур қизни тутқун қилиштин ваз кәчкән афған сақчи шуниңдин кейин мәзкур икки нәпәр уйғур шаһиттин давамлиқ пул, мал тәләп қилиду.

Афған сақчиниң пул вә мал-дуня тәлипини бир йилғичә чишини чишләп қандурушқа мәҗбур болған бу икки нәпәр уйғур шаһит кейинчә нурғун мүшкүлатлар билән һелиқи уйғур қизни 3- бир дөләткә йолға селип, бихәтәр һаятқа ериштүриду.

Икки нәпәр уйғур шаһит зияритимиз җәрянида йәнә, афған дөләт хәвпсизлик сақчилириниң тутқун қилинған уйғур әрләрниң хотун, балилирини қандақ қолға алғанлиқ җәряни һәққидә мәлумат бәрди. Уларниң гуваһлиқ беришичә, шу чағда арқа көриниши гуманлиқ болған бир өзбәк қиз билән униң таҗик ери афғанистандики уйғурларниң тутқун қилинишида мәлум рол ойниған икән.

Шаһитлардин ибраһим уйғур өзиниң әйни чағда көргән-билгәнлиридин гуваһлиқ бәрди. У, кабулда уйғур аяллар билән биллә тутқун қилинған һелиқи гуманлиқ өзбәк қизниң йенидин 4 миң нәччә йүз америка доллири билән бирмунчә афған пулиниң чиққанлиқини, техиму сәзгүр йери шуки, өзбәк қизниң сомкисидики  MP3 аваз үскүнисигә орнитилған бомба билән биллә қолға елинғанлиқини илгири сүрди.

Шаһитлар йәнә, афғанистанда тутқун қилинған уйғурлар вә уларниң аилилиригә сайидәк әгишип йүргән “иш-һәрикити гуманлиқ” өзбәк қизниң шунчә пул вә бомба билән тутулған туруқлуқ, хитайға қайтурулмиғанлиқини, әмма йенидин һечқандақ гуманлиқ буюм тепилмиған уйғурларниң хитайға тапшуруп берилгәнликини әпсуслуқ билән баян қилди.

Шаһитлар 2015-йилиниң бешида афған даирилири тутқун қилип хитайға тапшуруп бәргән уйғур әрләр вә уларниң аилә тавабиатлири болуп, җәмий 24 нәпәр киши икәнликини ашкара қилди.

Икки нәпәр шаһит, афған даирилириниң өткән йили йәнә башқа 3 нәпәр уйғурни тутқун қилип хитайға өткүзүп бәргәнликини илгири сүрди һәмдә уларниң тутулуш җәрянидики тәпсилатларни ашкара қилди.

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.