Afghanistanda tutqun qilinip xitaygha qayturulghan Uyghurlar heqqidiki weqening tepsilati ashkarilandi (2)

Muxbirimiz qutlan
2016.03.03
afghanistan-ibrahim-uyghur.jpg Ata-anisi 1961-yili ghuljidin afghanistan'gha kochup chiqqan, özi yérim esirdin buyan afghanistanda yashap kelgen ibrahim Uyghur
RFA/Qutlan


Yéqinda radiyomiz ziyaritini qobul qilghan afghanistanliq ikki neper Uyghur buningdin bir yil ilgiri afghan da'iriliri teripidin tutqun qilinip xitaygha tapshurup bérilgen Uyghur tutqunlar heqqidiki bezi melumatlarni ashkara qildi.

Nam-sheripini ashkarilashni xalimaydighan afghanistanliq bir Uyghur ayal shahit guwahliq bérip, eyni chaghda afghan saqchiliri tutqun qilin'ghan Uyghur tijaretchiler we ularning a'ile tawabi'atlirini xitaygha qayturidighan chaghda, özining afghan saqchi bashliqigha para bérish arqiliq bir neper Uyghur qizni qutuldurup qalghanliqini ilgiri sürdi.

Halbuki, pul élish sherti bilen bir neper Uyghur qizni tutqun qilishtin waz kechken afghan saqchi shuningdin kéyin mezkur ikki neper Uyghur shahittin dawamliq pul, mal telep qilidu.

Afghan saqchining pul we mal-dunya telipini bir yilghiche chishini chishlep qandurushqa mejbur bolghan bu ikki neper Uyghur shahit kéyinche nurghun müshkülatlar bilen héliqi Uyghur qizni 3- bir döletke yolgha sélip, bixeter hayatqa érishtüridu.

Ikki neper Uyghur shahit ziyaritimiz jeryanida yene, afghan dölet xewpsizlik saqchilirining tutqun qilin'ghan Uyghur erlerning xotun, balilirini qandaq qolgha alghanliq jeryani heqqide melumat berdi. Ularning guwahliq bérishiche, shu chaghda arqa körinishi gumanliq bolghan bir özbek qiz bilen uning tajik éri afghanistandiki Uyghurlarning tutqun qilinishida melum rol oynighan iken.

Shahitlardin ibrahim Uyghur özining eyni chaghda körgen-bilgenliridin guwahliq berdi. U, kabulda Uyghur ayallar bilen bille tutqun qilin'ghan héliqi gumanliq özbek qizning yénidin 4 ming nechche yüz amérika dolliri bilen birmunche afghan pulining chiqqanliqini, téximu sezgür yéri shuki, özbek qizning somkisidiki  MP3 awaz üskünisige ornitilghan bomba bilen bille qolgha élin'ghanliqini ilgiri sürdi.

Shahitlar yene, afghanistanda tutqun qilin'ghan Uyghurlar we ularning a'ililirige sayidek egiship yürgen “Ish-herikiti gumanliq” özbek qizning shunche pul we bomba bilen tutulghan turuqluq, xitaygha qayturulmighanliqini, emma yénidin héchqandaq gumanliq buyum tépilmighan Uyghurlarning xitaygha tapshurup bérilgenlikini epsusluq bilen bayan qildi.

Shahitlar 2015-yilining béshida afghan da'iriliri tutqun qilip xitaygha tapshurup bergen Uyghur erler we ularning a'ile tawabi'atliri bolup, jem'iy 24 neper kishi ikenlikini ashkara qildi.

Ikki neper shahit, afghan da'irilirining ötken yili yene bashqa 3 neper Uyghurni tutqun qilip xitaygha ötküzüp bergenlikini ilgiri sürdi hemde ularning tutulush jeryanidiki tepsilatlarni ashkara qildi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.