Almatada kompozitor ismayiljan isayéfning 80 yashliqi tebriklendi

Ixtiyariy muxbirimiz oyghan
2016-02-02
Élxet
Pikir
Share
Print
Ataqliq kompozitor ismayiljan isayéf.
Ataqliq kompozitor ismayiljan isayéf.
RFA/Oyghan

30-Yanwarda almata shehirining ewézof nahiyisige qarashliq dostluq mehelliside orunlashqan abdulla rozibaqiyéf namidiki 153-mektep-gimnaziyede körneklik kompozitor ismayiljan isayéfning 80 yashliq tewellut ötküzüldi.

Gimnaziye kolléktipining uyushturushida ötken mezkur tentenige ziyaliylar, ustaz we oqughuchilar, tewellut égisining yurtdashliri, shagirtliri, sen'etkarlar qatnashti. U gimnaziye xor ömikining orunlishida sha'ir mesümjan zulpiqarofning sözi, i. Isayéfning muzikisigha yézilghan "Ana tilim" naxshisi bilen bashlandi.

Sözge chiqqan qazaqistan Uyghurlirining jumhuriyetlik étno-medeniyet merkizining ijra'iye mudiri zuhrullam qurwanbaqiyéf, jumhuriyetlik "Uyghur awazi" gézitining bash muherriri érshat esmetof, pédagogika penlirining namzati éméliyan hoshurof, filologiye penlirining namzatliri öktebir jamaldinof we rabik ismayilof, quddus ghojamyarof namidiki jumhuriyetlik dölet Uyghur muzikiliq komédiye tiyatiri edebiyat bölümining bashliqi patigül mexsetowa, qazaq radi'osining Uyghurche anglitishlar rédaksiyesi xadimi güljamal emetbaqiyéwa we bashqimu shuninggha oxshash köpligen ziyaliylar, jem'iyetlik birleshmiler wekilliri, i. Isayéfning yurtdashliri, dost-buraderliri, kesipdashliri uning ijadiy pa'aliyiti, insaniy xisletliri heqqide öz pikirlirini bildürdi. Gimnaziye mudiri shawket ömerof bolsa, milliy sen'etke, ma'aripqa qoshqan bibaha töhpisi üchün i. Isayéfni "Tinchliq dunyasi" xelq'ara qazaq ijadiy birleshmisi namidin "El pexri" médali bilen teqdirlidi.

Ziyaritimizni qobul qilghan mezkur gimnaziyening naxsha péni mu'ellimi nadiyem rémbakiyéwa i. Isayéf ijadiyitining alahidilikliri heqqide toxtilip, mundaq dédi: "Men isma'il akamni sirttin bilettim. Shu yilliri "Perwaz" zhurnaligha isma'il akining "Qochiqim", sélimaxun akining "Keptirim" naxshiliri chiqqanda biz nahayiti xushal bolghan. Mushu mektepke kelgendin béri isma'il aka bilen tonushup, uning naxshilirining notilirini élip, balilargha ögitishni bashliduq. Uning naxshilirining bir alahidiliki, naxshiliri bir-birige oxshimaydu. U balilargha yadlawélishqa ongay metinlerni tallawalidu, shundaqla ularning ahanglirimu balilar üchün ongay."

Körneklik kompozitor, ustaz i. Isayéfning 80 yashliq tewellutigha béghishlan'ghan tentene dawamida gimnaziye oqughuchiliri hemde tonulghan naxshichilar nuralim warisof, dilber burhanowa, ablehet islamofning qatnishishi bilen konsért programmisi we "Sirliq sézim" filimidin üzündi körsitildi.

Ismayiljan isayéf 1936-yili almata wilayiti Uyghur nahiyisining awat yézisida dunyagha kelgen. U 1954-yili 7-sinipni tamamlighandin kéyin, 1958-yili almata shehiride orunlashqan chaykowskiy namidiki muzika mektipining xelq eswabliri bölümige oqushqa chüshidu. 1958-We 1960-yillar ariliqida i. Isayéf shu oqush ornida ustazliq qilghan. Öz bilimini ashurush meqsitide u 1968-yili qurman'ghazi namidiki konsérwatoriyening ikki yilliq kompozitorlarni teyyarlash kursini tamamlaydu. I. Isayéfning kespiy kompozitor derijisige yétishide, bolupmu ataqliq kompozitor, sowét ittipaqi we qazaqistan xelq artisi quddus ghojamyarof muhim rol oynighan idi. I. Isayéf peqet muzika we naxsha yézish bilenla cheklinip qalmay, belki ustazliq bilenmu shughullan'ghan. 1968-We 1975-yilliri u almata shehirining hazir özi turuwatqan dostluq mehellisidiki abdulla rozibaqiyéf namidiki mektepte muzika mu'ellimi bolup ishlidi. Bu jehette i. Isayéf balilar üchün köpligen naxshilarni ijat qilip, oqughuchilargha ögitidu. U 1973-yildin bashlap qazaq radi'osining Uyghur rédaksiyiside awaz rézhissori, muzika muherriri bolup ishlidi.

I. Isayéf radi'omiz ziyaritini qobul qilip, özining muzikigha qiziqishining qandaq bashlan'ghanliqi hem uninggha kimning seweb bolghanliqini mundaq dep chüshendürdi: "Muzika mektipige oqushqa chüshüshümning bir sewebi, urush waqtida qishning künliri apimiz bizni kanggha yatquzup qoyup, Uyghurche naxshilarni éytatti. Men apamdin yene éytip bergine, dep sorattim. Apam méni muzikini yaxshi köridighan oxshaydu dep, yene éytip béretti. Men uni tingshap, hözürlinattim. Birinchi naxshamni iliya bextiyaning "Gülxan" dégen shé'irigha yazghan idim."

I. Isayéf köpligen Uyghur naxshilirining, shundaqla ziya semedining "Lashman", jamalidin bosaqofning "Qaynam", hézmet abdullinning "Köchken yultuz", "Chin tömür batur", exmetjan hashirining "Muqamchilar", turghan toxtemofning "Aq yéghin", qurwanjan mengsürofning "Ömer muhemmediy" sehne eserlirige yézilghan muzikilarning aptoridur. Buningdin tashqiri u 1997-yili muzika boyiche dersliklerni Uyghur tiligha terjime qilishta, Uyghur mektepliri üchün muzika pénidin oqush qorallirini teyyarlashta alahide közge köründi. Uning ottuzgha yéqin naxshiliri mektep dersliklirige kirgüzüldi. I. Isayéf 1998-yildin bashlap sherep bilen dem élishqa chiqti. Hazirmu u balilargha béghishlan'ghan muzikilarni ijat qilish üstide ishlep kelmekte.

Toluq bet