Wirjiniye Uyghur birliki komandisi putbol musabiqisining chémpiyoni boldi

Muxbirimiz irade
2017-07-04
Élxet
Pikir
Share
Print
Amérika qit'esidiki Uyghurlarning 3-nöwetlik putbol longqisini talishish dostluq musabiqisidin körünüsh. 2017-Yili 2-iyul.
Amérika qit'esidiki Uyghurlarning 3-nöwetlik putbol longqisini talishish dostluq musabiqisidin körünüsh. 2017-Yili 2-iyul.
Photo: RFA

Amérika qit'esidiki Uyghurlarning 3-nöwetlik putbol longqisini talishish dostluq musabiqisi 4-iyul küni ghelibilik ayaghlashti. Musabiqining axirqi künide kaliforniye Uyghur komandisi bilen wirjiniye Uyghur birliki komandisi hel qilghuch musabiqe oynidi.

Amérika qit'esidiki Uyghurlarning 3-nöwetlik putbol longqisini talishish dostluq musabiqisi 1-iyul küni etigen boston shehiride bashlan'ghan idi. 4 Kün dawam qilghan musabiqe jeryanida wirjiniyediki Uyghur birlik komandisi, teklimakan komandisi, kaliforniye Uyghur komandisi, boston-nyuyork birleshme komandisi we kanada Uyghur komandisi qatarliq 5 komanda öz-ara musabiqileshken. Musabiqilishish dawamida boston-nyuyork komandisi üchünchilikni qazan'ghandin kéyin, axirida kaliforniye Uyghur komandisi bilen wirjiniye Uyghur birliki komandisi hel qilghuch chémpiyonluq talishish musabiqisi oynash sheripini qolgha keltürgen. Keskin dawam qilghan uchrishish netijiside wirjiniye shtatidin barghan Uyghur birliki komandisi 1 ge qarshi 2 netije bilen kaliforniye komandisini yéngip 3-nöwetlik putbol longqisini talishish dostluq musabiqisining chémpiyonluqigha érishken.

Musabiqe axirida musabiqe meydanidin ziyaritimizni qobul qilghan washin'gton-wirjiniye teklimakan Uyghur komandisining mes'ulliridin jür'et obul ependi ziyaritimizni qobul qilip, bu qétimliq musabiqining kütkendinmu muweppeqiyetlik ötkenlikini éytti.

Bu yilliq musabiqige wirjiniye shtatidin teklimakan komandisimu qatnashqan bolup, bu ularning tunji qétim musabiqige qatnishishi bolup hésablinidu. Bu komandining alahidiliki bolsa, bu komanda asasen wirjiniye shtatidiki ottura yashliqlardin teshkillen'gen bolushidur. Jür'et ependining éytishiche, ular gerche musabiqilerde yashlargha yéngilip qalghan bolsimu, emma ularning rohi yashlargha ülge bolghan.

Bu qétimliq musabiqining sahibxana komandisi, yeni boston-nyuyork Uyghur komandisining térnéri uchqun ghappar ependimu ziyaritimizni qobul qilip, bu nöwetlik musabiqining özini qattiq tesirlendürgenlikini éytti.

Uchqun ependi sözi dawamida, bu musabiqining bir putbol riqabitidin bek, yashlargha milliy rohni we uyushqaqliq rohini yétildüridighan ehmiyetlik bir sorun bolghanliqini bildürdi.

Melum bolushiche, amérika qit'esidiki Uyghurlarning kéler yilliq putbol musabiqisini kéler yili wirjiniye shtatida ötküzüsh pilanlan'ghan bolup, wirjiniye teklimakan komandisi sahibxaniliqni öz üstige alidiken.

Toluq bet