Токйодики хитай әлчиханиси алдида барин инқилабини хатириләш намайиши елип берилди

Ихтиярий мухбиримиз һаҗи қутлуқ қадири
2016-04-05
Елхәт
Пикир
Share
Принт
Хитай әлчиханиси алдида өткүзүлгән, барин инқилабини хатириләш намайишидин көрүнүш. 2016-Йили 3-апрел, токйо.
Хитай әлчиханиси алдида өткүзүлгән, барин инқилабини хатириләш намайишидин көрүнүш. 2016-Йили 3-апрел, токйо.
RFA/Qutluq

3-Апрел, японийә уйғур бирлики тәшкилати, 1990-йили 5-апрел уйғур елиниң ақту наһийәси барин йезисида йүз бәргән барин инқилабиниң 26 йиллиқини хатириләш йүзисидин токйодики хитай әлчиханисиниң алдида хитайға қарши намайиш елип барған. Намайишқа уйғур вә японлардин көп сандики кишиләр қатнашқан. Намайиш шу йәр вақти чүштин кейин саәт үчтин төткә қәдәр давамлашқан.

Қоллирида ай юлтузлуқ көк байрақлирини көтүргән намайишчилар япон вә уйғур тиллирида җараңлиқ шоарларни товлап, хитай компартийәсиниң барин инқилабини «қәбиһ бастурғанлиқидин ибарәт өз җинайитини тонушини, мәзкур инқилабта қолға елинип муддәтсиз түрмиләргә қамалған бигунаһ уйғур деһқанлириниң шәртсиз қоюп берилиши» ни тәләп қилған.

Намайиш башлиништин илгири японийә уйғур бирлики тәшкилатиниң рәиси доктор турмуһәммәт һашим намайиш иштиракчилириға вә мухбирларға барин инқилабиниң келип чиқиш сәвәблири вә униң бастурулуш җәряни тоғрисида мәлумат бәргән. Мәйданға топланған намайишчилар, японийә қанун даирилири бәлгилигән қаидиләргә асасән бәштин-бәштин бир гуруппа болуп, хитай әлчиханиси алдиға берип өз наразилиқлирини билдүргән.

Намайишчилар вәкили доктор турмуһәммәт һашим хитай әлчиханиси алдида японийә уйғур бирлики тәшкилати намидин йезилған баянатнамини оқуған.

Намайиштин кейин телефон зияритимизни қобул қилған доктор турмуһәммәт һашим мәзкур баянатнаминиң мәзмуни һәққидә қисқичә тохталди.

Токйодики хитай әлчиханиси алдида елан қилинған мәзкур баянатта йәнә 5-июл ғайиблар аниси патигүл ғулам ханимниң йеқинқи әһвалиму баян қилинған.

Бу қетимқи намайишқа қатнашқан, узундин буян японийәдә елип бериливатқан уйғур кишилик һоқуқ паалийәтлирини қоллап келиватқан танака йошиаки намайиш һәққидә тохтилип: «мән илгири 5-июл үрүмчи вәқәсигә даир бу хилдики намайишларға коп қатнаштим. Бүгүн барин инқилабини хатириләш мәқситидә өткүзүлгән намайишқа тунҗи қетим қатнишишим. Хитай компартийәсиниң уйғур елида елип бериватқан түрлүк бастуруш сиясәтлиригә қарши уйғурларниң барин инқилабиға охшаш қаршилиқ билдүрүш һәрикәтлирини хатириләш вә вәқәдә өлүп кәткәнләрниң паҗиәсини дуняға аңлитишниң өзи әлвәттә, хәлқара җәмийәтниң вә япон хәлқиниң уйғур мәсилисигә болған қизиқишини қозғайду дәп ойлаймән» деди.

Японийә уйғур бирлики тәшкилатиниң қоллиғучилиридин такаши сато намайиш һәққидә тохтилип: «намайишқа қатнашқан кишиләрниң сани гәрчә чәклик болсиму, бирақ, көпчиликниң роһи наһайити җушқун. Барин инқилаби японийә җәмийитигә уйғур елида йүз бәргән 5-июл үрүмчи вәқәси вә 5-феврал или вәқәлиридәк техи тонулмиди. Шуңа барин инқилаби һәққидә көпләп тәшвиқ елип бериш зөрүр дәп қараймән» деди.

Японийәдә елип бериливатқан бу хил намайишларға изчил иштирак қилип келиватқан уйғур сиясий актиплиридин гүлистан әзизи өзиниң намайиш һәққидики тәсиратлирини баян қилди.

Игилишимизчә, бу қетимқи намайиш японийә уйғур бирлики тәшкилати қурулғандин буян барин инқилаби тоғрисида елип берилған тунҗи қетимлиқ намайишкән.

Юқириқи аваз улинишидин тәпсилатини аңлаң.

Пикирләр (0)
Share
Толуқ бәт