Германийәдә уйғур рәссам мәрвайит һапизниң рәсимлири юқири баһаға еришти

Мухбиримиз меһрибан
2016-06-17
Елхәт
Пикир
Share
Принт
Мәрвайит һапиз ханим «өзгичә дуняға саяһәт» темисидики рәсим көргәзмиси
Мәрвайит һапиз ханим «өзгичә дуняға саяһәт» темисидики рәсим көргәзмиси
RFA


Явропа кәспи һоқуқини қоғдаш идарисиниң таллиши вә орунлаштуруши билән 27 - апрел күни германийәниң мюнхен шәһиридә ечилған «өзгичә дуняға саяһәт» темисидики рәсим көргәзмиси 17 - июн җүмә күни ахирлашти. Мәзкур көргәзмигә германийә қатарлиқ явропа дөләтлиридә тонулған уйғур рәссам мәрвайит һапиз ханим қатарлиқ 3 нәпәр рәссамниң әсәрлири талланған. Рәссам мәрвайит ханим зияритимизни қобул қилип, бу қетимқи рәсим көргәзмисиниңму илгирикигә охшашла мувәппәқийәтлик вә нәтиҗилик аяғлашқанлиқини билдүрди. Узундин буян мәрвайит ханимниң рәсим көргәзмисигә қатнишип келиватқан вә униң бир қисим рәсимлирини сетивалған германийәлик лило ханим өз тәсиратини баян қилип, явропада тонулған уйғур рәссам мәрвайит ханимниң юқири бәдиий маһарәттә сизилған рәсимлириниң кишиләргә гүзәл естетик зоқ берипла қалмастин, бәлки өзигә охшаш көргәзмә әһлини уйғурлар вә уйғур вәзийитини тонуш пурситигә ериштүргәнликини билдүрди.

Германийәниң мюнхен шәһиридә бир йерим ай давам қилған «өзгичә дуняға саяһәт» темисидики рәсим көргәзмисигә явропада тонулған рәссамлардин белгийәлик аял рәссам утә миддәл ханим, уйғур рәссам мәрвайит һапиз ханим қатарлиқ рәссамларниң иҗадий әмгәклири көргәзмә қилинған болуп, мәрвайит ханимниң «вәтән» темисиға беғишланған 46 парчә рәсими талланған.

Германийәдә муһаҗирәттә яшаватқан уйғур рәссам мәрвайит һапиз ханим, 20 йилдин буян рәсим иҗадийитини изчил давамлаштуруп келиватқан вә өзиниң уйғурлар һаятиға беғишланған рәсимлири билән явропада тонулған уйғур рәссамлириниң бири.

6 Һәптилик рәсим көргәзмисини аяғлаштурған мәрвайит ханим бүгүн толиму һаяҗанлиқ кәйпиятта зияритимизни қобул қилип, өзиниң бу қетимқи рәсим көргәзмисиниң мувәппәқийәтлиридин наһайити хурсән болғанлиқини вә пәхирләнгәнликини билдүрди.

Мәрвайит ханимниң билдүрүшичә, бу қетимқи көргәзмигә һәр күни дегүдәк зиярәтчиләр келип турған болуп, мәрвайит ханим һәр күни йерим күн, бәзи күнлири һәтта бир күн вақтини аҗритип, зиярәтчиләрниң униң рәсимлири вә уйғурлар һәққидики түрлүк соаллириға җаваб бәргән.

Мәрвайит ханим зиярәтчиләрниң соаллириға җаваб бәргән вақиттики кәйпиятини баян қилип, уйғурлар һаяти тема қилинған рәсимлириниң көргәзмә әһлини бу қәдәр қизиқтурғанлиқини көргән вә уларниң өзиниң рәсимлиригә бәргән баһалирини аңлиған чеғида толиму бәхтиярлиқ туйғусида болғанлиқини һәмдә өзиниң рәсимлири арқилиқ уйғурларни тонутуш пурситигә игә икәнликидин пәхирлинидиғанлиқини билдүрди.

Мәрвайит ханимниң билдүрүшичә, бу қетимқи көргәзмини уюштурғучи доктор һаррман шиффәрер әпәнди мәрвайит ханимниң рәсим иҗадийитигә юқири баһа берип, өзигә охшаш нурғун кишиләрниң мәрвайит һапизниң рәсимлиридин йүксәк бәдиий зоқ алғанлиқини ейтқан.

Һалбуки, биз һаррман шиффәрер әпәнди билән билән алақилишишкә көп тиришқан болсақму, әмма вақит пәрқи сәвәбидин униң билән сөзлишиш имканийити болмиди.

Узун йиллардин буян мәрвайит ханимниң рәсим көргәзмисигә қатнишип келиватқан вә униң рәсимлирини сетивелип сақлаватқан германийәлик достлардин лило ханим бу қетимқи көргәзмидиму мәрвайит ханимниң йәнә бир парчә рәсимини сетивалғанлиқини билдүрди.

Лило ханим рәссам мәрвайит һапиз вә униң рәсимлириниң җәлпкарлиқи һәққидә тохтилип, «мән мәрвайит һапиз билән 10 нәччә йил илгири тонуштум. Униң уйғур дияридики карван тәсвирләнгән рәсимлиридин бирқанчисини сетивелип сақлаватимән. Униң рәсимлирини толиму сөйимән! мәрвайитни мән униң сизған рәсимлиридин тонудум десәмму болиду. Мени әң тәсирләндүргини униң өз кәспигә болған чәксиз сөйгүси, җапаға чидамлиқи вә мәсулийәтчанлиқ роһи. У 20 йилдин буян изчил һалда иҗадийитини давамлаштуруп келиватиду. Униң уйғурлар һаяти вә уйғур вәтинигә беғишланған рәсимлиридин мән уйғурларни тонудум десәмму болиду» деди.

Бу қетимқи вә алдинқи қетимқи рәсим көргәзмилириниң мувәппәқийәтлик елип берилишиниң сәвәблири һәққидә тохталған мәрвайит ханим, бир рәссам үчүн өз иҗадийитини давамлаштуруш вә рәсимлиригә тайинип яшаш имканийитиниң бу саһәдики нурғун рәссамларға мәнсуп болмиғанлиқини, болупму муһаҗирәттә яшаватқан өзиниң, германийәдәк бир дөләттә 20 йилдин буян изчил һалда рәсим иҗадийитини давамлаштурушиға, өзиниң тиришчанлиқи, тәр төкүп әҗир сиңдүрүшидин башқа, лило ханимға охшаш германийәлик достларниң қоллиши вә мәдәт бериши түрткә болғанлиқини билдүрди.

Пикирләр (0)
Share
Толуқ бәт