Gérmaniyede Uyghur ressam merwayit hapizning resimliri yuqiri bahagha érishti

Muxbirimiz méhriban
2016-06-17
Élxet
Pikir
Share
Print
Merwayit hapiz xanim "Özgiche dunyagha sayahet" témisidiki resim körgezmisi
Merwayit hapiz xanim "Özgiche dunyagha sayahet" témisidiki resim körgezmisi
RFA


Yawropa kespi hoquqini qoghdash idarisining tallishi we orunlashturushi bilen 27 - aprél küni gérmaniyening myunxén shehiride échilghan "Özgiche dunyagha sayahet" témisidiki resim körgezmisi 17 - iyun jüme küni axirlashti. Mezkur körgezmige gérmaniye qatarliq yawropa döletliride tonulghan Uyghur ressam merwayit hapiz xanim qatarliq 3 neper ressamning eserliri tallan'ghan. Ressam merwayit xanim ziyaritimizni qobul qilip, bu qétimqi resim körgezmisiningmu ilgirikige oxshashla muweppeqiyetlik we netijilik ayaghlashqanliqini bildürdi. Uzundin buyan merwayit xanimning resim körgezmisige qatniship kéliwatqan we uning bir qisim resimlirini sétiwalghan gérmaniyelik lilo xanim öz tesiratini bayan qilip, yawropada tonulghan Uyghur ressam merwayit xanimning yuqiri bedi'iy maharette sizilghan resimlirining kishilerge güzel éstétik zoq béripla qalmastin, belki özige oxshash körgezme ehlini Uyghurlar we Uyghur weziyitini tonush pursitige érishtürgenlikini bildürdi.

Gérmaniyening myunxén shehiride bir yérim ay dawam qilghan "Özgiche dunyagha sayahet" témisidiki resim körgezmisige yawropada tonulghan ressamlardin bélgiyelik ayal ressam ute middel xanim, Uyghur ressam merwayit hapiz xanim qatarliq ressamlarning ijadiy emgekliri körgezme qilin'ghan bolup, merwayit xanimning "Weten" témisigha béghishlan'ghan 46 parche resimi tallan'ghan.

Gérmaniyede muhajirette yashawatqan Uyghur ressam merwayit hapiz xanim, 20 yildin buyan resim ijadiyitini izchil dawamlashturup kéliwatqan we özining Uyghurlar hayatigha béghishlan'ghan resimliri bilen yawropada tonulghan Uyghur ressamlirining biri.

6 Heptilik resim körgezmisini ayaghlashturghan merwayit xanim bügün tolimu hayajanliq keypiyatta ziyaritimizni qobul qilip, özining bu qétimqi resim körgezmisining muweppeqiyetliridin nahayiti xursen bolghanliqini we pexirlen'genlikini bildürdi.

Merwayit xanimning bildürüshiche, bu qétimqi körgezmige her küni dégüdek ziyaretchiler kélip turghan bolup, merwayit xanim her küni yérim kün, bezi künliri hetta bir kün waqtini ajritip, ziyaretchilerning uning resimliri we Uyghurlar heqqidiki türlük so'allirigha jawab bergen.

Merwayit xanim ziyaretchilerning so'allirigha jawab bergen waqittiki keypiyatini bayan qilip, Uyghurlar hayati téma qilin'ghan resimlirining körgezme ehlini bu qeder qiziqturghanliqini körgen we ularning özining resimlirige bergen bahalirini anglighan chéghida tolimu bextiyarliq tuyghusida bolghanliqini hemde özining resimliri arqiliq Uyghurlarni tonutush pursitige ige ikenlikidin pexirlinidighanliqini bildürdi.

Merwayit xanimning bildürüshiche, bu qétimqi körgezmini uyushturghuchi doktor harrman shifferér ependi merwayit xanimning resim ijadiyitige yuqiri baha bérip, özige oxshash nurghun kishilerning merwayit hapizning resimliridin yüksek bedi'iy zoq alghanliqini éytqan.

Halbuki, biz harrman shifferér ependi bilen bilen alaqilishishke köp tirishqan bolsaqmu, emma waqit perqi sewebidin uning bilen sözlishish imkaniyiti bolmidi.

Uzun yillardin buyan merwayit xanimning resim körgezmisige qatniship kéliwatqan we uning resimlirini sétiwélip saqlawatqan gérmaniyelik dostlardin lilo xanim bu qétimqi körgezmidimu merwayit xanimning yene bir parche resimini sétiwalghanliqini bildürdi.

Lilo xanim ressam merwayit hapiz we uning resimlirining jelpkarliqi heqqide toxtilip, "Men merwayit hapiz bilen 10 nechche yil ilgiri tonushtum. Uning Uyghur diyaridiki karwan teswirlen'gen resimliridin birqanchisini sétiwélip saqlawatimen. Uning resimlirini tolimu söyimen! merwayitni men uning sizghan resimliridin tonudum désemmu bolidu. Méni eng tesirlendürgini uning öz kespige bolghan cheksiz söygüsi, japagha chidamliqi we mes'uliyetchanliq rohi. U 20 yildin buyan izchil halda ijadiyitini dawamlashturup kéliwatidu. Uning Uyghurlar hayati we Uyghur wetinige béghishlan'ghan resimliridin men Uyghurlarni tonudum désemmu bolidu" dédi.

Bu qétimqi we aldinqi qétimqi resim körgezmilirining muweppeqiyetlik élip bérilishining sewebliri heqqide toxtalghan merwayit xanim, bir ressam üchün öz ijadiyitini dawamlashturush we resimlirige tayinip yashash imkaniyitining bu sahediki nurghun ressamlargha mensup bolmighanliqini, bolupmu muhajirette yashawatqan özining, gérmaniyedek bir dölette 20 yildin buyan izchil halda resim ijadiyitini dawamlashturushigha, özining tirishchanliqi, ter töküp ejir singdürüshidin bashqa, lilo xanimgha oxshash gérmaniyelik dostlarning qollishi we medet bérishi türtke bolghanliqini bildürdi.

Toluq bet