Türkiyening qeyseri, enqere we bashqa sheherliridiki Uyghurlar qurban héytni xushal-xuram ötküzdi

Bir yerge jem bolup ötküzüwatqan qurban héytliq pa'aliyettin körünüsh. 2017-Yili 3-séntebir, türkiye.

Bügün düshenbe küni, islam dunyasining eng chong héytliridin biri bolghan qurban héytning tötinchi küni.

Türkiyede bu yil qurban héyti namizi, yeni 9-ayning 1-küni oqulghan idi. Türkiye hökümiti bu yil héytta 10 kün tetil qoyup bérilgenlikini jakarlighan idi. Türkiyede milyonlighan kishiler öz yurtlirigha qaytip uruq-tughqanliri bilen jem bolup, héyt namizi oqup, alemdin ötken yéqinlirining qebrisi béshida du'a qilip, qurbanliq qoylarni soyuwatqan shu peytlerde, türkiyediki Uyghurlarmu Uyghurlarning enenisi boyiche milliy kiyimlirini kiyip, qurbanliqlirini soyup, burun alemdin ötkenlerning qebrisige bérip ziyaret qilip, héyt ötküzüwatidu.

Biz türkiyening enqere, qeyseri we bashqa sheherliride yashawatqan bir qisim Uyghurlar bilen söhbet élip bérip, ularning héyt ötküzüsh ehwalini igiliduq. Ular, qurban héytni xushal-xuram ötküzüwatqanliqini, emma wetendiki uruq-tughqanlirigha alaqe ornitalmighanliqidin köngüllirining bekla yérim ikenlikini tekitleshti.

Qeyseride pa'aliyet élip bériwatqan sherqiy türkistan medeniyet we hemkarliq jem'iyiti mu'awin re'isi emrullah efendigil ependi, burun kelgen Uyghurlar bilen 2014-2015-yilliri tayland we malayshiya arqiliq kelgen Uyghurlar bir yerge jem bolup, héyt namizi oqughanliqi, namazdin kéyin qebristanliqlarni ziyaret qilip, öz'ara héytliship birlik ittipaqliq ichide ötküzgenlikini bayan qildi.

Emrullah efendigil ependi qeyserige özlirining 1964-yili kelgenlikini, 2014-2015-yili kelgen Uyghurlarni qoshqanda ikki mehelle Uyghur barliqini, bu Uyghur toplirining Uyghurlarning örp-adetlirini izchil halda dawamlashturup kéliwatqanliqini bayan qildi.

Emrullah efendigil ependi qeyseridiki Uyghurlar xushal-xuramliq ichide héyt ötküzüwatqan bolsimu hemmisining weten hesritide köngli yérim ikenlikini tekitlidi.

Biz bügün, yeni héytning birinchi küni musapir Uyghurlarning héyt ehwali toghrisida melumat igilesh üchün Uyghur musapirlar bilenmu téléfon söhbiti élip barduq. Ular erkin dunyada qurban héytni yaxshi ötküzüwatqanliqini, emma yüreklirining wetendiki uruq-tughqanlirini séghinish otida köyüwatqanliqini, köngüllirining nahayiti yérim ikenlikini tekitleshti.

Türkiyening paytexti enqerede xoten emiri memet emin bughra, Uyghur tarixchi haji yaqup anat we pénsiyege chiqqan Uyghur général, sherqiy türkistan wexpining sabiq re'isi merhum memet riza bekinlerning maziri bar sheher bolup, enqerediki Uyghurlar héytning birinchi küni qebre béshigha bérip du'a qilip, ularni xatiriligendin kéyin qurbanliqlirini soyup héytlishishqa bashlighan. Zhurnalist mirkamil qeshqerli ependi bu heqte melumat bérip mundaq dédi:
Qeyserige yéngi kelgen Uyghurlardin wolqan ependi türklerning Uyghur musapirlargha yardem qilghanliqini, türklerge rehmet éytidighanliqini bayan qildi.

Wolqan ependi erkin dunyada qurban héyti yaxshi ötken bolsimu könglining yérim ikenlikini bayan qildi.

Türkiyening qeyseri shehiride hazir ikki Uyghur mehellisi bar bolup, bularning biri 1964-yili türkiyening qeyseri shehiri exmet yesewiy mehellisige jaylashturulghan Uyghurlardin terkib tapqan mehelle, yene biri bolsa 2013-2014 yillirida malayshiya we tayland arqiliq kelgen Uyghurlar turushluq belsin dölet qorusidur. Bu yerdiki Uyghurlarning sani hazir 2 mingdin éship ketken. Enqerede dölet idariliride xizmet qilghan Uyghurlar bilen Uyghur oqughuchilar bar bolup, ularmu Uyghur örp-adetliri boyiche qurban héytini ötküzmekte.