Алматада әдәбиятчилар "идиқут" романиниң түркчә нәшрини тәбриклиди

Ихтиярий мухбиримиз ойған
2016-03-31
Share
idiqut-Mejlistin-korunush-Almata.jpg "идиқут" романиниң түркчә нәшрини тәбрикләш йиғинидин көрүнүш. 2016-Йили 31-март, алмата.
RFA/Oyghan

31-Мартта алматадики язғучилар өйидә қазақистан язғучилар иттипақи йенидики уйғур әдәбияти кеңишиниң кеңәйтилгән мәҗлиси болуп өтти. Уйғур вә қазақ зиялийлири иштирак қилған мәзкур мәҗлистә дәсләп сөзгә чиққан қазақистан язғучилар иттипақи рәисиниң биринчи орунбасари ғалим жайлибай йеқинда түркийә пайтәхти әнқәрәдә қазақистан язғучилар иттипақи уйғур әдәбияти кеңишиниң башлиқи, тонулған язғучи вә драматорг әхмәтҗан һашириниң түрк тилида йоруқ көргән "идиқут" романини тонуштуруш бойичә чоң мурасимниң өткәнликини хәвәр қилип, китабни мәҗлис қатнашқучилириға тонуштурди.

Ғалим жайлибай бу вәқәниң пүткүл көп милләтлик қазақистан әдәбияти үчүн, қазақистанлиқларниң мәниви байлиқи һәм барлиқ түркий хәлқләр үчүн чоң йеңилиқ болғанлиқини алаһидә тәкитлиди.

Нөвәттә сөз алған "қазақистан санаәтчиләр, тиҗарәтчиләр вә йеза игилики хадимлири бирләшмиси" ниң президенти дилмурат қузийеф әхмәтҗан һашириниң "идиқут" романиниң түрк тилида нәшр қилинишиниң пүткүл қазақистан үчүн чоң абруй икәнликини, уйғур хәлқиниң тарихини, мәдәнийитини, сәнитини башқа тилларда аләмгә тонуштурушниң бүгүнки күндә муһим әһмийәткә игә икәнликини оттуриға қоюп, әхмәтҗан һашириниң "идиқут" романиниң түрк тилида нәшр қилинишиниң пүткүл қһаширини чин қәлбидин тәбриклиди.

У шундақла уйғур әдәбиятини болупму қериндаш қазақ хәлқигә тонуштурушта алаһидә паалийәтчанлиқ көрситип келиватқан яш қазақ язғучиси даулетхан байтурсинофниң әмгикигә юқири баһа бәрди.

Дилмурат қузийеф йеқинда өзи башқуруп келиватқан бирләшмә әзалириниң бир еғиздин қоллап-қуввәтлиши билән әдәбият саһәси бойичә "илһам" мукапатиниң биринчи дәриҗисини даулетхан байтурсинофқа тапшурди. Өз нөвитидә даулетхан байтурсиноф уйғур тилини ана тили сүпитидә һөрмәтләйдиғанлиқини, өз әмгикини түркий хәлқләр достлуқини, иттипақини техиму мустәһкәмләшкә беғишлиғанлиқини, бу мукапатниң шу йолда йәниму көп әмгәк қилишқа үндәйдиғанлиқини билдүрүп, өзиниң миннәтдарлиқини изһар қилди.

Радиомиз зияритини қобул қилған шаир вә тәрҗиман дәулетбек байтурсиноф "идиқут" романиниң түркийәдә нәшр қилинишиға қазақистанниң түркийәдики әлчиси җансейит түймебайефниң, түркий хәлқләр мәдәнийити тәшкилатиниң башлиқи дүйсен қасейинофниң, шундақла қазақистанниң бу тәшкилаттики вәкили малик отарбайефниң чоң тәсири болғанлиқини билдүрди.

У мундақ деди: "бу уйғур әдәбиятиниңла әмәс, бәлки қазақистан дөлитиниң чәтәлдә тәрғиб қилиниши, чәтәлдә тарқилишиға қошулған чоң бир төһпә дәп һесаблаймиз. Бу һәммимиз хушал болидиған йеңилиқ. ‹Идиқут' романиниң башқа тилларға тәрҗимә қилиниши арқилиқ уйғур хәлқи әдәбиятиниң башқа хәлқләргә кәң тарилишиға мубарәк болсун демәкчимән. Бүгүн маңиму уйғур хәлқиниң ‹илһам' мукапати тәқдим қилинди. Бу мукапат дунядики 20 милйондин көп уйғур хәлқиниң, җүмлидин қазақистандики уйғур хәлқиниң маңа қилған бир һөрмити дәп һесаблаймән. Бу икки хәлқниң достлуқини ипадиләйдиған мукапат. Мениң азрақла әмгикимгә уйғур хәлқиниң тәқдим қиливатқан мукапати мениң буниңдин кейинки хизмитимгә илһам бериду, дәп һесаблаймән. Туғқанлиримизға, уйғур хәлқигә рәһмәт!"

Мәҗлистә сөзгә чиққан қуддус ғоҗамяроф намидики җумһурийәтлик дөләт уйғур музикилиқ комедийә тиятириниң кәспий иттипақ тәшкилати башлиқи гүлнисәм садиқова тиятир мудири руслан тохтахуноф намидин әхмәтҗан һаширини тәбрикләп, униң миллий сәнәтниң тәрәққиятиға қошқан зор төһписи үчүн тиятирниң пәхрий ярлиқини тапшурди. Қазақистан язғучилар иттипақиниң катипи вә балилар әдәбияти кеңишиниң башлиқи қали султан, әдәбиятшунас алим рабик исмайилоф, уйғур тиятири әдәбият бөлүминиң башлиқи, алимә вә шаирә патигүл мәқсәтова, тиятир режиссори ялқунҗан шәмийеф, балилар язғучиси авут мәсимоф, драматорг әкрәм әхмәтоф, шаир вә язғучи телман нурахунофлар әхмәтҗан һашири вә дәулетбек байтурсинофларни тәбриклиди. Улар шундақла қазақ вә уйғур достлуқи, әдәбий иҗадийәтниң муһим мәсилилири һәққидә өз пикирлирини оттуриға қойди.

Зияритимизни қобул қилған қазақистан язғучилар иттипақи йенидики уйғур әдәбияти кеңиши башлиқиниң орунбасари, шаир вә язғучи телман нурахуноф бу йили қазақистан мустәқиллиқиниң 25 йиллиқи һарписида уйғур шаир вә язғучилири һаятида көплигән хушаллиқларниң йүз бериватқанлиқини, болупму қазақистанниң түркийәдики әлчиханиси вә түркий хәлқләр мәдәний тәшкилатиниң уйғур язғучилириниң әсәрлирини башқиму түркий тилларға тәрҗимә қилишта вә нәшр қилишта актип ишләватқанлиқини, улар уюштурған иҗадий фестивалларда уйғурларниңму утуқлар қазинип, буниңдин пүткүл дуня уйғурлириниң чоң хушаллиққа чөмүлүватқанлиқини илгири сүрди.

У мундақ деди: "шуларниң бири, қазақистан уйғур әдәбиятиниң карван беши әхмәтҗан ака һаширофниң ‹идиқут' тарихий романиниң түркийәдә түрк тилида нәшр қилинишини, әлвәттә, чоң хушаллиқ, чоң мәрикә, дәп қараш керәк. Түрк хәлқи билән бизниң тилимиз, дилимиз, динимиз биллә болғачқа, алаһидә сәмимийәт билән бүгүнки күндә уйғур җамаәтчилики, уйғур зиялийлири буни чоң хушаллиқ билән қарши еливатиду. язғучи әсирини башқа хәлқләргә тонуштуруш вәзиписини атқуридиған тәрҗиман.

‹Идиқут' қа охшаш чоң романни түрк тилиға тәрҗимә қилған тәрҗиманниң бу йәрдә чоң әмгики ятиду. Шәхсән язғучи ретидә, өзүм һәм уйғур язғучилири намидин тәрҗиманға тәшәккүр изһар қилмақчимән. Буниңдин кейинму түркий хәлқләр мәдәнийәт тәшкилати, түркийәдики түрк қериндашлиримиз бизни һәр қачан мушундақ қоллап-қуввәтләп, язғучиларға болған һамийлиқини давамлаштуриду, дәп ойлаймән. Шундақла түрк җумһурийитидики қазақистан әлчиликигә уйғур язғучилири намидин тәшәккүр изһар қилимән."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт