Yaponiye parlamént ezasi wada tokyoda Uyghur mesilisi boyiche doklat sözleydu

12-Noyabir küni, tokyoda yaponiyede pa'aliyet élip bériwatqan Uyghur kishilik hoquq teshkilatliridin yaponiye Uyghur birliki teshkilati Uyghurlarning yéqinqi zaman tarixida qurghan ikki qétimliq sherqiy türkistan jumhuriyitini xatirilesh pa'aliyiti élip baridu.

Pa'aliyette yaponiye parlamént ezasi wada masamuné Uyghur mesilisi boyiche doklat sözleydiken.

Xatirilesh pa'aliyiti tokyodiki toshima rayoni medeniyet merkizide kech sa'et alte yérimdin sekkiz yérimgha qeder ikki sa'et dawamlishidiken.

Yaponiye Uyghur birliki teshkilatining tor bétide körsitilishiche, mezkur teshkilat teripidin tokyoda ötküzülidighan 2016-yilliq tarixtiki sherqiy türkistan jumhuriyet künini xatirilesh pa'aliyitide yaponiye parlamént ezasi wada masamuné “Yaponiye dölet siyasitidiki Uyghur mesilisi” dégen témida mexsus bir sa'et doklat béridiken. Bu heqte ziyaritimizni qobul qilghan yaponiye Uyghur birliki teshkilatining re'isi turmuhemmet hashim bu doklat heqqide toxtaldi.

Yaponiyede neshr qilinidighan “Xitaygha nezer” zhurnilining bash muherriri, manju yazghuchi méngsha parlamént ezasi wada heqqide toxtilip: “U, Uyghur mesilisige izchil köngül bölüsh bilen birge parlaméntta köp qétim Uyghur élidin yaponiyege oqushqa kelgen Uyghur oqughuchilargha oqush mukapati puli bérish teklipini otturigha qoyghan. U, Uyghur mesilisigila emes belki tibet, mongghul kishilik hoquq mesililirigimu izchil diqqet qilip kéliwatqan, yaponiyede belgilik tesiri bar siyasetchilerdin biri” dédi.

Turmuhemmet hashimning bildürüshiche, parlamént ezasi wada yaponiye parlaméntida Uyghur mesilisini tunji qétim otturigha qoyghan kishi bolup,uning bashchiliqidiki yapon siyasetchilirining tirishchanliqida Uyghur dawasi yaponiye parlaméntida kün tertipke kelgen.

Yaponiyediki xitay mesililiri tetqiqatchiliridin aroma parlamént ezasi wada heqqide toxtilip: “Uning yaponiye parlaméntida köp qétim dadilliq bilen Uyghur mesilisini otturigha qoyup kelgenlikige shexsen men özüm rehmet éytimen.Wada gerche yash siyasetchilerdin biri bolsimu u we uning siyasiy partiyesi yaponiye jem'iyitide yuqiri yüz abruygha ige” dédi.

Melum bolushiche, 2012-yili 5-ayda yaponiye parlaméntida, yaponiye parlaménti-Uyghur dostluq guruppisi qurulghandin buyan parlaméntida Uyghur kishilik hoquq mesililiri izchil halda otturigha qoyulup kelgen bolup, bezi bir siyasiy öktichi partiyiler bu mesilide xitaygha bésim ishlitish kéreklikini tekitligen.

Yuqiriqi awaz ulinishidin tepsilatini anglang.