Qirghizistanda ikki jumhuriyetni xatirilesh yighini ötküzüldi

14-Noyabir küni bishkek shehirining alamédin kichik birinchi rayonidiki medeniyet öyide qirghizistan Uyghurliri “Ittipaq” jem'iyitining uyushturushi bilen sherqiy türkistan islam jumhuriyitining 83 yilliqi we sherqiy türkistan jumhuriyiti qurulghanliqining 72 yilliqini xatirilesh yighini bolup ötti.

Yighin'gha bishkek shehiri we uning etrapidiki yéza-rayonlardin, toqmaq we qarabalta sheherliridin kelgen jama'et wekilliri bolup 150 tin artuq kishi qatnashti. Bu yighin'gha qirghizistan xelqi assambiliyesi kéngishining mu'awin re'isi we qirghizistan Uyghurliri “Ittipaq” jem'iyitining re'isi artiq hajiyéf riyasetchilik qildi. U, aldi bilen xalayiqqa illiq salamlarni yollap, sherqiy türkistan jumhuriyiti qurulghanliqi xatirisi munasiwiti bilen “Ittipaq” jem'iyiti namidin tebrik sözlirini éytti shundaqla sherqiy türkistan milliy armiyisining qurulghanliqi we deslepte partizanliq küreshliri bilen milliy eskerlerning sani 15 ming kishi bolup, kéyin 30 mingdin ashqanliqini tekitlidi.

Milliy eskerlerning küresh qilishi bilen ili, altay we tarbaghatay wilayetliri azad bolghan, andin kéyin pütkül Uyghurstanni azad qilish üchün nurghun jengler bolghan, shu jenglerde on minglighan jengchi-ofitsérlar qurban bolghan idi. Yighin aldida wetenning azadliqi yolida qurban bolghan shéhitlargha atap xetme qur'an oquldi.

1960-Yilliri qirghizistanda, shu chaghdiki inqilabqa qatnashqan jengchi-ofitsérlardin 200 din artuq kishi bar idi. Epsuski bügünki künlerde, qehriman akilirimizdin peqet 13 adem hayat iken. Ularning ichide abdurasul abdullayif, sabir muhemmeduf, nurmuhemmet hasanof, ablimit bekriyif, mes'ud hajim musayif, ghilajidin iminif, nurdun ehmetof, osman bekriyif, xemit kenjibayif, abduréshit mirghaziyif, kerim kerimof, abduréshit salimof, abdukérim abdurahmanof qatarliq jengchi akilirimiz bishkek shehirining mehelliliride we uning etrapidiki yézilarda turidu. Tilekke qarshi qehriman akilirimizning salametliki nachar bolghanliqi üchün, köpi yighin'gha qatnishalmay qaldi.

Yighinda pelsepe penlirining kandidati we “Ittipaq” gézitining bash muherriri ekberjan bawudunof we dunya Uyghur qurultiyining re'isi rabiye qadir xanimning meslihetchisi tursun islam niyazoflar doklatlirini oqudi.

Ekberjan bawudunof aldi bilen, 12-noyabir küni Uyghur xelqi üchün chong bayram dep, jama'etni tebriklidi. Öz doklatida u ikki jumhuriyetni xitay hökümiti bilen sowét ittipaqi birliship yoq qilghanliqi, sherqiy türkistan dölitining 1944-yili noyabir éyidin 1949-yili awghust éyigha qeder ömür sürgenliki toghrisida sözlep ötti.

Qoshumche doklat oqughan tursun islam se'udi erebistanda yashighan inqilabchi merhum musa türkistanining “Türkistan paji'esi” namliq kitabidin inqilabqa munasiwetlik mulahizilerni oqup berdi.

Shundaqla sherqiy türkistan jumhuriyiti dewride yashighan gheyret hajim aka jahanuf öz héssiyatlirini sözlep berdi.

Doklatlar oqulup bolghandin kéyin ixtiyariy sözge chiqqanlardin kéyin, jengchi akilargha sowghatlar tapshurulup we estelik üchün süretler tartildi.

Mezkur yighindin paydilinip, 7-noyabir küni qirghizistanda “Axbaratchilar küni” bolghanliqi munasiwiti bilen qirghizistanda “Ittipaq” gézitige xalis xizmet qilip kéliwatqan aktiplargha pexriy yarliqlar tapshurulup yighin tamamlandi.