Shiwétsiyede ikki jumhuriyetni xatirilesh pa'aliyiti ötküzüldi

Shiwétsiyediki Uyghurlar 1933-yili we 1944-yilidiki jumhuriyetlerni xatirilesh pa'aliyiti ötküzdi.

Shiwétsiyening sitokholm shehiridin igiligen melumatlirimizgha asaslan'ghanda, shiwétsiyediki Uyghurlar 12-noyabir küni 1933-yilidiki sherqiy türkistan islam jumhuriyiti qurulghanliqining 85 yilliqini we 1944-yilidiki sherqiy türkistan jumhuriyiti qurulghanliqining 74 yilliqini xatirilesh pa'aliyetlirini istiqlal marshi bilen bashlap, ilgiriki yillargha sélishturghanda zor daghdugha bilen ötküzgen.

Bu pa'aliyetni “Shiwétsiye Uyghur ma'arip uyushmisi”, “Shiwétsiye teklimakan islam medeniyet merkizi”, “Uyghur yardem fondi” qatarliq teshkilatlar birlikte uyushturghan bolup, pa'aliyetke köp sanda Uyghur jama'iti, Uyghurlar mesilisige hésdashliq qilghuchi shwédlar, adwokatlar, shiwétsiye radiyo-téléwiziye organliri we kishilik hoquq teshkilatlirining rehberliri qatnashqan. Pa'aliyette istiqlal marshidin kéyin bayraq chiqirish murasimi ötküzülüp, sherqiy türkistanning ay yultuzluq kök bayriqi sehnige élip chiqilghan.

“Shiwétsiye Uyghur ma'arip uyushmisi” rehberliridin abdulla kökyar ependi bu heqte toxtalghanda “Ikki jumhuriyetni xatirilesh pa'aliyitini pat arida hör wetende xelqimiz bilen birge ötküzüshni arzu qilimiz” dédi.

Pa'aliyette ikki jumhuriyetning qurulush tarixi we jeryanliri eks etken filimlar körsitilgen hemde ikki jumhuriyet heqqide chüshenchiler bérilgen. “Shiwétsiye Uyghur ma'arip uyushmisi” mes'ulliridin exmetjan ependi pa'aliyetning yaxshi ötkenlikini, köp sanda Uyghur jama'iti we teshkilat rehberlirining bu pa'aliyetke aktip qatnashqanliqini tilgha aldi.

Bu qétimqi pa'aliyette shiwétlarmu nutuqlar sözlep: “Sherqiy türkistan mesilisi” üstide pikirler bayan qilishqan. Teshkilat rehberliri sözliride: “Kündin kün'ge nacharlishiwatqan sherqiy türkistan weziyiti” toghrisida toxtalghan.

Shiwétsiyede ötküzülgen 2 jumhuriyetni xatirilesh pa'aliyitide yene, Uyghur moysipitliridin faruq sadiq ependimu nutuq sözligen. Pa'aliyetning axirida “Sherqiy türkistan toghrisida tarixiy bilimler” témisida yash-ösmürler arisida zéhin sinash musabiqisi ötküzülüp, netije qazan'ghanlar ilhamlandurulghan. Pa'aliyet menilik we qizghin keypiyat ichide dawam qilghan.