Истанбулдики уйғурлар җәм болуп қурбан һейтлиқ паалийити өткүзди

Ихтиярий мухбиримиз арслан
2017-09-04
Елхәт
Пикир
Share
Принт

9-Айниң 3-күни йәкшәнбә йәни қурбан һейтниң 3-күни истанбулдики уйғурлардин әр-аял вә балилар болуп 1000 дин артуқ киши җәм болуп қурбан һейтлиқ паалийәт елип барди.

Өз юртлирини тәрк етип истанбулда олтурақлишип қалған муһаҗир уйғурлар, уруқ-туғқанлиридин айрилған, өз вәтинидин йирақ мусапирлиқ һаятта көңли йерим һалда қурбан һейтни күтүвалди вә бир күн болсиму хушал өткүзүш үчүн истанбулда 1000 кишилик бир залға җәм болуп қурбан һейтни бирликтә өткүзди.

Бу паалийәтни истанбулдики шәрқий түркистан маарип вә һәмкарлиқ җәмийити уюштурған болуп, паалийәтни истанбулдики уйғур җәмийәтләрдин, шәрқий түркистан өлималар бирлики, шәрқий түркистан вәхпи, шәрқий түркистан яшлар җәмийити, сутуқ буғрахан илим вә мәдәнийәт вәхпи, қутадғубилик илми тәтқиқат вә һәмкарлиқ җәмийити вә башқа уйғур җәмийәтлири қоллап қуввәтлиди вә пүтүн мәсуллири вә әзалири қатнашти. Бу паалийәткә истанбулда яшаватқан уйғурлардин әр-аял кичик балилар нурғун киши қатнашти. Паалийәткә шәрқий түркистан маарип вә һәмкарлиқ җәмийитиниң баш катипи абдуләһәд абдурахман риясәтчилик қилди. Паалийәт қуран кәрим тилавәт қилиш билән башланди. Паалийәттә шәрқий түркистан маарип вә һәмкарлиқ җәмийитиниң рәиси һидайәтулла оғузхан ечилиш сөзи қилип, қатнашқучиларниң қурбан һейтини қизғин тәбриклиди.

Паалийәттә йәнә шәрқий түркистан өлималар бирлики рәиси доктор атавулла шәһяр сөз қилип, бирлик баравәрлик тоғрисида тохталди вә пикир охшашмаслиқ болсиму бөлүнмәстин бирлишиш, өз-ара йол қоюшуп бирликтин айрилмаслиқниң муһим икәнликини тәкитлиди.

Кейин шәрқий түркистан вәхпи рәиси доктор абдулһәмит авшар, шәрқий түркистан яшлар җәмийитиниң рәиси елиһан туранли, оқу уйғур җәмийити рәиси һәбибулла күсәни, иман дияри тәлим-тәрбийә җәмийитиниң рәиси мәхмут дамоллам қатарлиқлар сөз қилип қатнашқучиларниң қурбан байримини тәбриклиди вә көпинчиси бирлик-баравәрликниң әһмийити тоғрисида тохталди.

Паалийәттә йәнә уйғур өсмүрләр сәһнигә чиқип һәр хил номур көрсәтти. Шеир декламатсийә қилди. Қурбан һейтқа атап йезилған тәсирлик нәсри шеирлар оқуди.

Өсмүрләр бир бирләп сәһнигә чиқип, «һейт бүгүн айәм бүгүн», «ойған», «из» қатарлиқ шеирларни декламатсийә қилип қизғин алқишқа еришти.

Ахирида өсмүрләрниң зеһни синаш мусабиқиси өткүзүлүп вәтинимиз қәйәр? қачан мустәқил дөләт қурулған дегәндәк соалларни сораш арқилиқ тоғра җаваб бәргәнләргә маддий боюм мупакат берилди.

Паалийәт 3 саәт давам қилған болуп ахирида тамақ зияпити берилди вә дуа қилиш билән ахирлашти. Паалийәткә қатнашқучиларқизғин кәйпият билән өйлиригә қайтишти.

Пикирләр (0)
Share
Толуқ бәт