Istanbuldiki Uyghurlar jem bolup qurban héytliq pa'aliyiti ötküzdi

9-Ayning 3-küni yekshenbe yeni qurban héytning 3-küni istanbuldiki Uyghurlardin er-ayal we balilar bolup 1000 din artuq kishi jem bolup qurban héytliq pa'aliyet élip bardi.

Öz yurtlirini terk étip istanbulda olturaqliship qalghan muhajir Uyghurlar, uruq-tughqanliridin ayrilghan, öz wetinidin yiraq musapirliq hayatta köngli yérim halda qurban héytni kütüwaldi we bir kün bolsimu xushal ötküzüsh üchün istanbulda 1000 kishilik bir zalgha jem bolup qurban héytni birlikte ötküzdi.

Bu pa'aliyetni istanbuldiki sherqiy türkistan ma'arip we hemkarliq jem'iyiti uyushturghan bolup, pa'aliyetni istanbuldiki Uyghur jem'iyetlerdin, sherqiy türkistan ölimalar birliki, sherqiy türkistan wexpi, sherqiy türkistan yashlar jem'iyiti, sutuq bughraxan ilim we medeniyet wexpi, qutadghubilik ilmi tetqiqat we hemkarliq jem'iyiti we bashqa Uyghur jem'iyetliri qollap quwwetlidi we pütün mes'ulliri we ezaliri qatnashti. Bu pa'aliyetke istanbulda yashawatqan Uyghurlardin er-ayal kichik balilar nurghun kishi qatnashti. Pa'aliyetke sherqiy türkistan ma'arip we hemkarliq jem'iyitining bash katipi abdul'ehed abduraxman riyasetchilik qildi. Pa'aliyet qur'an kerim tilawet qilish bilen bashlandi. Pa'aliyette sherqiy türkistan ma'arip we hemkarliq jem'iyitining re'isi hidayetulla oghuzxan échilish sözi qilip, qatnashquchilarning qurban héytini qizghin tebriklidi.

Pa'aliyette yene sherqiy türkistan ölimalar birliki re'isi doktor atawulla shehyar söz qilip, birlik barawerlik toghrisida toxtaldi we pikir oxshashmasliq bolsimu bölünmestin birlishish, öz-ara yol qoyushup birliktin ayrilmasliqning muhim ikenlikini tekitlidi.

Kéyin sherqiy türkistan wexpi re'isi doktor abdulhemit awshar, sherqiy türkistan yashlar jem'iyitining re'isi élihan turanli, oqu Uyghur jem'iyiti re'isi hebibulla küseni, iman diyari telim-terbiye jem'iyitining re'isi mexmut damollam qatarliqlar söz qilip qatnashquchilarning qurban bayrimini tebriklidi we köpinchisi birlik-barawerlikning ehmiyiti toghrisida toxtaldi.

Pa'aliyette yene Uyghur ösmürler sehnige chiqip her xil nomur körsetti. Shé'ir déklamatsiye qildi. Qurban héytqa atap yézilghan tesirlik nesri shé'irlar oqudi.

Ösmürler bir birlep sehnige chiqip, “Héyt bügün ayem bügün”, “Oyghan”, “Iz” qatarliq shé'irlarni déklamatsiye qilip qizghin alqishqa érishti.

Axirida ösmürlerning zéhni sinash musabiqisi ötküzülüp wetinimiz qeyer? qachan musteqil dölet qurulghan dégendek so'allarni sorash arqiliq toghra jawab bergenlerge maddiy boyum mupakat bérildi.

Pa'aliyet 3 sa'et dawam qilghan bolup axirida tamaq ziyapiti bérildi we du'a qilish bilen axirlashti. Pa'aliyetke qatnashquchilarqizghin keypiyat bilen öylirige qaytishti.