“көз йешида нәмләнгән земин” намлиқ китаб лондонда тонуштурулди

“көз йешида нәмләнгән земин” намлиқ әсәрниң инглиз тәрҗимисиниң муқависи. 2016-Йили 27-ноябир, лондон.

“көз йешида нәмләнгән земин” намлиқ әсәрни тонуштуруш паалийитидин көрүнүш. 2016-Йили 27-ноябир, лондон.

11-Айниң 27-күни түркийәниң лондонда паалийәт елип бериватқан юнус әмрә институтида австралийәдә турушлуқ сөйүнгүл җанишеф ханим язған “көз йешида нәмләнгән земин” намлиқ китабни тонуштуруш паалийити өткүзүлди. Мәзкур паалийәтни китабниң инглизчә нусхисини нәшр қилмақчи болуватқан һәрдфиртширә нәшрияти билән йипәк йоли нәшрияти уюштурған.

Йиғинда, “көз йешида нәмләнгән земин” намлиқ әсәрни инглиз тилиға тәрҗимә қилған рәхимә мәхмут ханим китаб һәққидә тонуштуруш бәрди.

Униң ейтишичә, китаб тонуштуруш йиғиниға китабни ортақ нәшр қилмақчи болған икки чоң нәшриятниң мәсуллири вә тәһрирлири, юнус әмрә институти мәсуллири вә китаб сөйәрләрдин болуп көп санда киши иштирак қилған.

“көз йешида нәмләнгән земин” намлиқ китабниң инглизчә нусхисини тонуштуруш йиғини, лондонда өткүзүлүватқан оттура асияни тонуштуруш китаб фестивалиниң күн тәртипидин орун алған болуп, өткән йилдики паалийәттә мәшһур қирғиз язғучиси чиңгиз айтматоф вә униң әсәрлири тонутулған иди.

Биз “көз йешида нәмләнгән земин” намлиқ китаб тоғрисида мәлумат игиләш үчүн әсәрниң аптори сөйүнгүл җанишеф ханим вә китабни инглизчиға тәрҗимә қилған рәхимә мәхмут ханимлар билән телефон сөһбити елип бардуқ.

Рәхимә мәхмут ханим 475 бәтлик “көз йешида нәмләнгән земин” намлиқ китабниң келәр йили 3-айда әнглийәдики китабханиларда сетилишқа башлайдиғанлиқини илгири сүрди. У, лондонда тунҗи қетим бундақ бир паалийәтниң өткүзүлүватқанлиқини, алдимиздики йилларда уйғурларниң даңлиқ шаири вә язғучиси абдуреһим өткүр һәққидә бундақ бир паалийәткә иштирак қилишни арзу қилидиғанлиқини тәкитлиди.

Китабниң аптори сөйүнгүл җанишеф ханим китабиниң һазирғичә уйғур, түрк, рус вә татар тиллирида нәшр қилинғанлиқини, әсәрниң дуня тили болған инглиз тилида нәшр қилинишиниң өзини интайин хушал қилғанлиқини тәкитлиди.