Uyghur ressam merwayit hapiz gérmaniye padishahliq sariyida resim körgezmisi achti

Ixtiyariy muxbirimiz erkin tarim
2018-09-17
Élxet
Pikir
Share
Print
Yawropadiki Uyghur ressam merwayit hapiz xanimning gérmaniye myunxén shehiridiki padishahliq sariyining hoylisidiki bir körgezmixanida ötküzgen resim körgezmisidin körünüsh. 2018-Yili séntebir.
Yawropadiki Uyghur ressam merwayit hapiz xanimning gérmaniye myunxén shehiridiki padishahliq sariyining hoylisidiki bir körgezmixanida ötküzgen resim körgezmisidin körünüsh. 2018-Yili séntebir.
RFA/Erkin Tarim

Yawropadiki Uyghur ressam merwayit hapiz xanim gérmaniyening myunxén shehiridiki padishahliq sariyining hoylisidiki bir körgezmixanida resim körgezmisi achti.

Mezkur resim körgezmisi 9-ayning 13-künidin 18-künigiche bir hepte dawamlishidighan bolup, körgezmide 2 gérman ressamning resimliri bilen Uyghur ressam merwayit hapiz xanimning 28 parche may boyaq resimi qoyulghan. Mezkur 28 parche resimde Uyghur xelqining ijtima'iy turmushi, tarixi we örp-adetliri eks ettürülgen.

Ressam merwayit hapiz xanim 22 yildin buyan yawropada resim ijadiyiti bilen shughulliniwatqan bolup, kespiy mutexessislerning éytishiche, u Uyghurlarning ijtima'iy turmushini we tarixini eks ettüridighan qoyuq milliy puraqqa ige may boyaq resimlirini sizishta yawropada közge körün'gen iken.

Biz neq meydan'gha téléfon qilip, gérmaniyede turuwatqan tonulghan ressam merwayit hapiz xanim we uning myunxénda ötküzgen resim körgezmisini ziyaret qilghan bir qisim Uyghurlar bilen söhbet ötküzduq.

Töt kündin béri myunxénda mexsus resim körgezmisini échiwatqan ressam merwayit hapiz xanim bu qétimliq körgezmisi échilghan jay sayahet rayoni bolghachqa nurghun kishining buni ékskursiye qiliwatqanliqini bayan qildi.

Merwayit hapiz xanimning bu qétimliq körgezmige qoyghan 28 parche resimide Uyghur xelqining kündilik turmushi, örp-adetliri we tarixiy en'eniliri inchikilik bilen teswirlen'gen.

Melum bolushiche, gérmaniyening myunxén shehiri Uyghurlar eng köp olturaqlashqan sheherlerdin biri hésablinidu. 6 Kün dawamlashqan bu resim körgezmisige yerlik némislardin (gérmanlardin) sirt yene chet'ellik sayahetchiler we gérmaniyede yashawatqan bir qisim Uyghurlarmu ishtirak qilghan. Ular resimlerni körgendin kéyinki özlirining biwasite hés-tuyghulirini bayan qilishti. Gérmaniyediki dunya Uyghur qurultiyi xadimliridin shehrizat gheyret xanim, merwayit hapiz xanim sizghan resimlerni körüp bekla tesirlen'genlikini, özining Uyghurluqidin pexirlen'genlikini we Uyghurlarning ijtima'iy turmushi eks ettürülgen bir resim sétiwalghanliqini, bayan qilip ötti.

Bügün, yeni 17-séntebir küni myunxéndiki resim körgezmisini ziyaret qilghuchilar ichide Uyghur pa'aliyetchi dilnar xeznechi xanimmu bar bolup, u mezkur körgezmini ékskursiye qiliwatqanliqini, kishilerning Uyghurlarning hazirqi weziyiti toghrisida so'allar sorighanliqini, merwayit hapiz xanimning 22 yildin béri gérmaniyede resim sen'iti arqiliq Uyghur medeniyitini we Uyghurlarning siyasiy weziyitini tonushturup kéliwatqan tonulghan sen'etchi ikenlikini bayan qildi.

Merwayit hapiz xanim 2018-yili 4-ayning 1-künidin 4-künigiche 23 gérman ressam bilen birlikte resim körgezmisi achqan bolup, buni köp sanda kishi ékskursiye qilghan. Körgezme jeryanida özi basturghan resim kataloginimu satqan. U, 23-séntebir küni gérmaniyening myunxén shehiride özining mexsus resim körgezmisini achidiken.

Toluq bet