Shiwétsiyediki mexmut qeshqiri mektipi derstin sirtqi pa'aliyetlerni janlandurmaqta

Ixtiyariy muxbirimiz éhsan
2015.04.30
Share on WhatsApp
Share on WhatsApp
mexmut-qeshqiri-mektipi-oqughuchilar.jpg Mexmut qeshqiri mektipi oqughuchiliri derstin sirtqi pa'aliyette. 2015-Yili aprél, shiwétsiye.
RFA/Éhsan

Shiwétsiyede qurulghan mexmut qeshqiri mektipi oqughuchilarning derstin sirtqi pa'aliyetlirini mas qedemde élip bérish üchün, mektep oqughuchilirini etiyaz pesli kélish bilen teng dala pa'aliyitige teshkillidi we her xil muzéylarni ékskursiye qildurdi.

Bu mektep 2007-yili shiwétsiyediki munasiwetlik orunlarning testiqlishi bilen qurulghan bolup, hazirgha qeder Uyghur perzentlerning ana tili we islam diniy bilimliri bilen terbiyilinishige, özining kimlikini untumighan halda muhajiret hayatini dawam qilishigha asas salmaqta.

Bu mektep qurulghandin buyan, noqul halda dersxana bilenla cheklinip qalmay, her xil sheklide pa'aliyet élip bérishqa ehmiyet bérip, shiwétsiye ma'arip tüzümi boyiche oqu-oqutush xizmitini élip barmaqta.

Bu mektep 18-aprél küni élip barghan dala kawap pa'aliyitide, oquwatqan we 9-ayda mektepke kiridighan oqughuchilarnimu birlikte yighip ularni mexmut qeshqiri mektipini yéqindin tonush pursitige ige qilish hemde oquwatqan oqughuchilar bilen tonushup dostluq hasil qilish meqsitige yetken.

Mexmut qeshqiri mektipining orunlashturushi bilen 25-aprél küni oqughuchilar sitokholmdiki saqchi muzéyini ziyaret qilghan.

Ziyaret jeryanida oqughuchilar shiwétsiye saqchilirining élip yüridighan qoralliri, matorluq qatnash wasitiliri bilen tonushush pursitige ige bolghan.

Yétekchi oqutquchilar oqughuchilargha Uyghur diyarida xitay saqchilirining Uyghurlarni qandaq tutqun qiliwatqanliqini, hetta qizil chiraghdin bösüp ötüp ketken 17 yashliq Uyghur balisini étip tashlighandek emeliy weqelikni anglitish arqiliq, oqughuchilargha shiwétsiye saqchiliri bilen xitay saqchilirining perqini emeliy misallar bilen sözlep, xitay da'irilirining Uyghur diyarida Uyghurlargha yürgüzüwatqan qilmishlirini anglatqan.

Biz bu munasiwet bilen, mexmut qeshqiri mektipining oqughuchilargha yétekchilik qilish mes'uli tahir ependini ziyaret qilduq.

Tahir ependi oqughuchilarni saqchi muzéyida ziyaret qildurushtiki meqset, nishanlirini anglatti. Mexmut qeshqiri mektipining oqughuchisi bilal abdul'ehet öz tesiratini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.