Uyghur perzenti mujahit qeshqerli türk dunyasi pen-téxnika we layihelesh musabiqiside yaxshi bahagha érishti

Ixtiyariy muxbirimiz erkin tarim
2016-12-27
Élxet
Pikir
Share
Print

Türkiyening sherqiy jenubi rayonigha jaylashqan shanli'urfa shehiride ötküzülgen 3-nöwetlik türk dunyasi pen-téxnika we kültür féstiwalida Uyghur perzenti kichik mujahit qeshqerli özi layiheligen esirini körsetti. 12-Ayning 24- we 25-künliri ötküzülgen pa'aliyetke türkiyening 81 wilayiti bilen 18 dölettin kelgen kishiler élip kelgen 1200 ijadiyet layihesi ichide mujahit qeshqerlining pütün kün aptap chüshidighan, aylinidighan öy projékti 100 projékitning qatarigha kirgen.

Pa'aliyetke türkiye ma'arip ministiri mu'awini orxan erdem, shanli'urfa walisi gün'gör azim tuna ependi, parlamént ezasi xalil özjan ependi, sheherlik hökümet rehberliri we herqaysi döletlerdin kelgen yash-ösmür ijadkarlar ishtirak qilghan.

Biz pa'aliyet heqqide téximu tepsiliy melumat igilesh üchün pa'aliyetke ijadiyiti bilen qatnashqan kichik mujahit we uning dadisi mirkamil qeshqerli ependi bilen téléfon söhbiti élip barduq.

Mujahit qeshqerli özining nahayiti hayajan ichide ikenlikini, chong bolghanda alim bolushni arzu qilidighanliqini bayan qildi.

Mirkamil qeshqerli ependi layihelesh we ijadiyet témisidiki 3-nöwetlik ilim-pen we kültür féstiwal heqqide qisqiche melumat berdi we oghli mujahit qeshqerlining pütün kün aptap chüshidighan aylinidighan öy projékti toghrisida melumat berdi. Shundaqla, aldinqi yüz projékitning qatarigha kirgen yash-ösmürlerni etiyazda ezerbeyjan'gha ékskursiyege apiridighanliqini jakarlighanliqini éytti.

Mirkamil qeshqerli ependi yene, bu pa'aliyette kichik mujahit peqetla özi layihelep chiqqan projékitni körsitipla qalmastin, sherqiy türkistan mesilisinimu anglatqanliqini bayan qildi.

Yépilish murasimida kichik mujahit dangliq yazghuchi memet akif ersoyning xelqni ümidsiz bolmasliqqa chaqirghan shé'irini déklamatsiye qilip, kishilerning alqishigha érishkenlikini bayan qildi.

Uyghur xewer we tetqiqat merkizi mes'uli hamit göktürk ependi mujahit qeshqerlining yéshi kichiklikige qarimastin türkiyede Uyghurlarni nahayiti yaxshi tonutqanliqini bayan qildi.

Bu pa'aliyetni türkiye ma'arip ministirliqi, shanli'urfa waliliqi we türk dunyasi weqpi birlikte uyushturghan bolup, kichik mujahit ötken yili ötküzülgen musabiqige kéreksiz exletlerdin éléktr ishlepchiqirish layihisi bilen aldinqi 10 ning qatarigha kirip, kishilerning yaxshi bahasigha érishken idi.

Toluq bet