Murat nasirof wapatining 7 yilliqi (1)

Bu yil 1-ayning 19-küni ataqliq Uyghur kompozitori we naxsha cholpini murat nasirofning wapatigha saq 7 yil toshti. Murat nasirof buningdin yette yil ilgiri, yeni 2007-yili, 1-ayning 19-küni kéchide özining moskwadiki öyining balkonidin chüshüp kétip, 38 yéshida wapat bolghandin kéyin, almatagha élip kélinip, zariya wastoka mehellisidiki qebristanliqqa, dadisi isma'il nasirofning yénigha depne qilin'ghan idi.

Murat nasirof wapat bolsimu, lékin qaldurghan tesiri hazirghiche uning ixlasmenliri teripidin eslenmekte.

Murat nasirof özining lirik, yéqimliq, süzük awazliri bilen 1997-2003-yilliri arisida rusiye we musteqil döletler hemdostluqidiki eng dangliq cholpanlarning biri süpitide tonulghan talant igisi idi. U, özining “Gülayim”, “Qaldim yalghuz” qatarliq naxshiliri we Uyghurlarni tonushturush ish pa'aliyetliri bilen Uyghur xelqining yuqiri hörmet töridin orun aldi.

Murat nasirofning 2007-yili, 19-yanwar künidiki tuyuqsiz ölümi eyni waqitta pütün rusiyeni zilzilige salghan bolup, uning ölümining sirliq ölüm ikenliki heqqidimu pikirler meydan'gha chiqqan. Uning akisi nijat nasirof we uning dostliri muratning ölümining tolimu tasadipiy we sirliq ikenliki, saqchilar chiqarghan “Özini öltürüwalghan” dégen yekünning natoghriliqini otturigha qoyup ishenmeslik idiyisini bildürgen idi. Qisqisi, murat nasirofning tuyuqsiz ölümi, uning özini öltürüwalghanliqi heqqidiki türlük uchurlar qayil qilishqa érishelmigen. Beziler bu ölümning arqisida körünmes yaman qollarning barliqini jezmleshtürgen idi. Qisqisi, muratning ölümi yette yildin buyan sirliq pétip qéliwerdi.

Murat nasirof wapat bolghanliqigha 7 yil ötkendin kéyinki bügünki künlerde rusiye ammiwi axbarat wasitiliri, bolupmu tor betliri murat nasirofni xatirileshni untup qalmidi. Bir qanche kündin buyan rusiye ammiwi axbarat wasitiliride muratni xatirilesh maqaliliri arqimu-arqidin élan qilindi. Bezi shexsiy blog yazghuchilirimu öz bloglirida muratqa bolghan chongqur séghinishi we hörmitini ipade qilishti.

Rusiyede tarqitilidighan “Splétnik” torida “Murat nasirofsiz yette yil” mawzusida süretlik xatirilesh uchuri élan qilindi. Buningda muratning 20 parchigha yéqin her xil ayrim we a'ile süretliri chüshendürüsh bilen élan qilindi.

Rusiyediki sen'et cholpanlirigha a'it meshhur tor betliridin biri “Starxit.Ru” torida “Yéqinliri murat nasirofning menggülük arzusi emelge ashurdi” dégen témida mexsus bir parche maqale élan qilindi. Mezkur maqalide murat nasirofning anisi, aka-hediliri we özining ikki perzenti we ayalining ehwali heqqide uchurlar bérilgen bolup, maqalide éytilishiche, murat nasirofning ayali nataliya yilda bir qanche qétim ikki perzentini élip, almatagha kélip, qéyin anisi xatire xanimni ziyaret qilidiken we murat nasirofning qebrisini yoqlaydiken. Xatire xanim newriliridin tolimu pexirlinidu, bolupmu muratning kichik oghli hakimning dadisining izini bésishini ümid qilidu. Murat nasirofning qizi liliya bu yil 17 yashqa, oghli hakim 13 yashqa kirgen. Ular anisi bilen birlikte moskwadiki ashu murat nasirof wapat bolghan öyde yashimaqta.

Buningdin bashqa yene rusiye tor betliridin biri “News.Xxxp.Biz” da “Mana murat nasirofning bizdin ayrilghinigha 7 yil toshti” mawzuluq qisqa eslime élan qilinip, murat nasirofning “Sen démek men” namliq d dangliq naxshisi oqurmenlerning huzurigha sunuldi.