Uyghur dewasining qollighuchisi, siyasetchi, ilim adimi newzat yalchintash alemdin ötti

Ixtiyariy muxbirimiz erkin tarim
2016-07-18
Élxet
Pikir
Share
Print
Uyghur dewasining qollighuchisi, siyasetchi, ilim adimi newzat yalchintash.
Uyghur dewasining qollighuchisi, siyasetchi, ilim adimi newzat yalchintash.
RFA/Erkin Tarim

Türkiye jumhuriyiti dölet re'isi rejep tayyip erdoghan bilen sabiq dölet re'isi abdullah gülning uniwérsitét oqutquchisi, Uyghurlarning sabiq lideri merhum eysa yüsüp alptekinning yéqin dosti, Uyghur dewasining sadiq qollighuchisi we adalet tereqqiyat partiyesining qurghuchiliridin biri bolghan proféssor doktor newzat yalchintash ependi 7-ayning 15-küni etigen yürek késili bilen alemdin ötti.

Türkiye hökümiti bayanatchisi bash ministir mu'awini numan qurtulmush ependi ijtima'iy taratqular arqiliq bayanat élan qilip, "Hörmetlik newzat yalchintash ependi alemdin ötti, allah rehmet qilsun, yatqan jayi jennet bolsun, a'ilisige we uruq-tughqanlirigha sewr tileymen" dep yazghan.

Türkiye parlaméntida 8 yil parlamént ezasi wezipisini ötigen newzat yalchintash ependi, uniwérsitét yilliridin tartip Uyghur dewasigha qiziqip, Uyghur dewasigha köngül bölgen. Türkiyening ichi we sirtida qatnashqan yighinlarda Uyghur mesilisini kün tertipke élip kelgen. Türkiyediki sherqiy türkistan ammiwi teshkilatlirining pa'aliyetlirige aktip qatnashqan.

Türkiyede zor abruygha ige bolghan newzat yalchintash merhumning 7-ayning 18-küni istanbul fatih meschitide ötküzülgen méyit namizini chüshürüshke türkiye dölet re'isi rejep tayyip erdoghan, sabiq dölet re'isi abdullah gül, köp sanda ministir we xelqtin bolup minglighan kishi qatnashti.

Biz méyit namizini chüshürüshke qatnashqan hamut göktürk, séyit tümtürk ependi we erkin aliptékin ependiler bilen söhbet élip barduq.

Erkin aliptékin ependi merhum newzat yalchintash ependining Uyghur dewasigha qoshqan töhpisining zor ikenlikini, 1950-yillardin tartip eysa yüsüp aliptékinni tonuydighanliqini tekitlidi.

Hamut göktürk ependi uning 1993-yilidin tartip merhum eysa yüsüp aliptékin bilen tonushidighanliqini bayan qildi.

Méyit namizini chüshürüshke qatnashqan séyit tümtürk ependi merhum newzat yalchintash méyit namizi chüshürüshke köp sanda dölet rehberlirining ishtirak qilghanliqini bayan qildi.

Sherqiy türkistan wexpining sabiq re'isi hamut göktürk ependi merhum newzat yalchintashning ömrining axirighiche sherqiy türkistan dewasini qollap quwetligen kishi ikenlikini tekitlidi.

Newzat yalchintash 1933-yili enqerede dunyagha kelgen. Türkiye tijaret we iqtisad fakultitini püttürgendin kéyin, firansiyede magistirliq, londonda doktorluqta oqughan. Istanbul uniwérsitéti iqtisad fakultétida oqutquchi bolup ishligen. 2002-Yilidin 2010-yilighiche türkiye parlaméntida parlamént ezasi bolup wezipe ötigen.

Toluq bet