Хитай сақчилири 82 яшлиқ рабийхан муса аниға тәһдит селишқа өтти : "тамға үсүвалисиз"

Чәтәлдики балисини көрүш арзуси тосқунлуққа учриған вә нәтиҗидә паспорти тартивелинған 82 яшлиқ рабийхан муса ана өзигә охшаш уйғур аниларниң бу җәһәттики дәрт һәсрәтлирини радийомиз арқилиқ дуняға ашкарилап келиватқан иди. Түнүгүн хитай сақчилири рабийхан муса аниға, шикайитини давамлаштурса җуңгониң дүшминигә айлинидиғанлиқини ейтқан вә "тамға үсүвелиш" хәвпини әскәртип тәһдит салған. Рабийхан ана "түрмидә шәрәп билән өлүш"кә рази вә тәйяр икәнликини ейтқан. Бүгүн дуня уйғур қурултийи баянатчиси дилшат ришит бу һәқтә позитсийә билдүрүп, хитай тәрәпни яшанғанларниму чәттә қоймаслиқтәк чекидин ашқан зораванлиқини тохтитишқа чақирди.

Һөрмәтлик радийо аңлиғучилар, биз рабийхан ана дуч кәлгән бу йолсузлуқ вә зораванлиқ һәққидә дуня уйғур қурултийи баянатчиси дилшатниң қарашлирини соридуқ. Дилшат ришит қурултайниң рабийхан аниниң шикайәтлиригә баштин - ахири диққәт қилип келиватқанлиқини, әмма һазирға қәдәр бөртала сақчилириниң яшанған бир аялниң бу һәққаний тәлипини һичболмиди дегәндә ахбаратқа ашкариланғандин кейин чирайлиқчә һәл қилишини үмид қилип кәлгәнликини билдүрди. Рабийхан аниниң шикайитиниң айрим бир әһвал әмәс, уйғур җәмийитигә нисбәтән вәкиллик характергә игә икәнликини тәкитлигән дилшат ришит, вәзийәтниң тәрәққиятиға қарап қурултайниң рабийхан муса ана мәсилисини буниңдин кейин хәлқара сәһниләргә елип чиқиш еһтималлиқини баян қилди.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар