Қазақистанда қазақ шаири җамбул уйғур оқуғучиларға тонуштурулмақта

Мәлумки, қазақ хәлқиниң улуғ шаири җамбул йүз йилға йеқин вақит өмүр сүргән болуп, иҗадийитиниң дәсләпки йиллири у “суранши батур”, “өтеген батур”, “хан вә шаир”, “һурун һәққидә чөчәк” қатарлиқ әсәрләрни язған. Униң иҗадийитиниң асасий қисми совет дәвридә өткән иди.

Җамбулниң қәбриси һазирқи алмата вилайити җамбул наһийисиниң җамбул йезисида орунлашқан. Шаирниң иҗадийити һәққидә һәр хил қариму - қарши пикирләрниң мәвҗут болушиға қаримай, униң исмини әбәдийләштүрүш мәқситидә һәм совет дәвридә, һәм һазирқи мустәқиллиқ дәвридә интайин көп хизмәтләр ишләнгән иди.

Бүгүнки күндә мәмликәтниң җәнубиға орунлашқан тараз шәһири 1938 - йилдин та 1997 - йилғичә җамбулниң исми билән аталған. Буниңдин ташқири қазақистанниң көплигән шәһәр вә йезилирида униңға һәйкәлләр орнитилди, көплигән музейлар, сәнәт дәргаһлири, мәктәпләр, кочилар шуниң исмида атилиду. Һазир, мәсилән, русийәниң москва, санкт - петербург, волгоград, новосибирск, хабаровск қатарлиқ шәһәрлиридиму униң намида кочиларни учритишқа болиду.

Уйғур тилида билим берилидиған мәктәпләрдики әдәбият дәрслиридә җамбулниң һаяти вә иҗадийити мәхсус оқутулиду. Униң тәвәллутлири мунасивити билән мәктәпләрдә һәр хил паалийәтләр пат - патла өткүзүлүп, уларда пәқәт шаир иҗадийити һәққидила сөз болмай, бәлки хәйрхаһлиқ ишлириму йүргүзүлмәктә.

Радиомиз зияритини қобул қилған язғучи исмаилҗан иминоф вә журналист гөһәрбүви исмаилҗанова бу һәқтә өз қарашлирини оттуриға қойди.