Qazaqistanliq Uyghur sen'etchiliri Uyghur élida oyun qoyup qaytti

• Ixtiyariy muxbirimiz oyghan
  2015-03-10

Kéyinki waqitlarda, Uyghur aptonom rayoni we qazaqistan otturisidiki medeniy alaqiler barghanséri qoyuqlashmaqta. Bolupmu axirqi ikki-üch yilning ichide qazaqistanning quddus ghojamyarof namidiki jumhuriyetlik dölet Uyghur muzikiliq komédiye tiyatirining artisliri Uyghur élida, emdi Uyghur éli sen'etchiliri bolsa, bir nechche qétim qazaqistanda boldi. Bu jeryanda ikki terep sen'etchiliri öz-ara tejribe almashturushtin tashqiri yene, mesilen, qazaqistanliq yash sen'etchiler Uyghur élining dangliq naxshichi we ussulchilirining hünerlirini öginip keldi.

Bu heqte yéqinda Uyghur élida bolup qaytqan sen'etchiler guruppisining yétekchisi, Uyghur tiyatirining mudiri sawutjan sonurof melumat berdi.

Igilishimizche, qazaqistanliq Uyghur sen'etchilirining Uyghur éligha qilghan chong seperlirining biri 1992-yili shu waqittiki tiyatir mudiri murat exmediyéf bashchiliqida élip bérilghan idi. Yetmish ademdin terkib tapqan mezkur sen'etchiler guruppisi ikki ay mabeynide Uyghur élining köpligen sheherliride boldi. Uningdin kéyin her yili dégüdek bir nechche ademdin terkib tapqan sen'etning her sahe guruppiliri Uyghur diyarining her xil sheherliride oyun körsetti. 2006-Yili Uyghur tiyatiri “Kélinler qozghilingi” sehne esiri bilen Uyghur élida yigirme kün bolup qaytqandin kéyin, ikki aridiki alaqiler üzülüp qalghan idi. Shu üzülüshtin kéyin peqet 2013-yilning 9-we 10-aylirida yigirme ikki neper artis Uyghur élida bolup qaytti. Ene shuningdin béri ikki otturidiki alaqiler bara-bara qoyuqlishishqa bashlidi. Ikki memliket medeniyet idarilirining qollap-quwwetlishi bilen Uyghur élining bir top dangliq naxshichiliri ötkenki yilning axirida almata shehiride keng da'iride konsért körsetken idi.