Қазақистан уйғур тиятириға академийилик унван берилди

Ихтиярий мухбиримиз ойған
2016.12.12
Share on WhatsApp
Share on WhatsApp
qatnashqan-musteqilliqi-uyghur-tiyatiri-artisliri.jpg Қазақистан җумһурийити мустәқиллиқиниң 25 йиллиқиға беғишланған “тинчлиқ вә разимәнликкә 25 йил” мавзуслуқ фестивалға қатнашқан уйғур тиятири артислири. 2016-Йили 9-декабир, астана.
RFA/Oyghan

Қазақистан аммиви ахбарат васитилиридин мәлум болушичә, 9-декабирда қазақистан пайтәхти астана шәһириниң “сариарқа” тән-һәрикәт мәйданида қазақистан җумһурийити мустәқиллиқиниң 25 йиллиқиға беғишланған “тинчлиқ вә разимәнликкә 25 йил” мавзусида фестивал болуп өтти. Қазақистан хәлқи ассамблейисиниң уюштурушида өткән бу фестивалға мәмликәтниң барлиқ районлиридин қатнашқан етно-мәдәнийәт мәркәзлириниң һәвәскар һәм кәспий коллектиплири өзлириниң тиятирлаштурулған сәһнилирини, саз, нахша, уссул вә башқиму әсәрлирини намайиш қилди.

Мәзкур фестивалда қазақистан президенти нурсултан назарбайеф корейәликләр вә немис һәм уйғурларниң миллий тиятирлириға академийилик унван бериш һәққидә қарар алғанлиқини елан қилди.

Радиомиз зияритини қобул қилған қуддус ғоҗамяроф намидики җумһурийәтлик дөләт уйғур музикилиқ комедийә тиятириниң режиссори, “һөрмәт” ордениниң саһиби ялқунҗан шәмийеф уйғур тиятириға мундақ унванниң берилишиниң тиятир коллектипила әмәс, бәлки пүткүл қазақистан уйғурлириға болған чоң һөрмәтниң бир бәлгиси икәнликини билдүрүп, мундақ деди: “бу намниң берилиши биз, сәнәткарлар үчүн чоң унван. Һазир бизниң тиятир академийәлик болғандин кейин, әлвәттә, биринчидин, чоң хушаллиқ, иккинчидин, чоң җавабкарлиқ. Пүтүнләй қазақистанда 56 тиятир болса, шуниң арисида йәттә-сәккизила академийилик намни алған. Немишқа бу унванни бериду? чүнки мушундақ унванни алғанларниңки дәриҗиси юқири болуши керәк. Мисалға классик әсәрләр көп болуши керәк. Омумий коллектипниң билими юқири болуши керәк. Мән ойлаймәнки, коллектипимиз шуниңға лайиқ. Президентимизға рәһмәт!”.

Қазақистан язғучилар иттипақи уйғур әдәбияти кеңишиниң башлиқи, язғучи вә драматорг әхмәтҗан һашириниң пикричә, бүгүнки күндә уйғур тиятириниң мәмликәт ичи вә тешида миңлиған тамашибинлири бар болуп, шуларниң тәләплирини, еһтияҗлирини орунлашта тиятир артислири тинмай әмгәк қилмақта. У тиятирниң қазақистан мәдәнийитини раваҗландурушқа алаһидә төһпә қошуватқанлиқини илгири сүрүп, мундақ деди: “тиятиримиз қазақистан хәлқиниң роһий байлиқини яритиватқан чоң бир дәргаһ. Тиятир 83 йил хәлққә хизмәт қилип келиватиду. Униң программиси, нахша-сазлири, көплигән драматорглиримиз мушу тиятиримизниң роһини көтүрди. Шу җүмлидин бизму өз күчимизни тиятирниң гүллиниши, хәлқара мәйданда тиятиримизниң шан-шөһрити үчүн бир аз әмгәкләрни қилдуқ. Тиятир программисиға киргән әсәрләрдә достлуқ, инақлиқ, хәлқләр бирлики мәсилилири хәлқимизгә көрситиливатиду”.

Ә. Һашири уйғур тиятириға мундақ унванниң берилишиниң пәқәт уйғурлар үчүнла әмәс, бәлки мәмликәтниң көп милләтлик хәлқи үчүнму чоң вәқә икәнликини, тиятир тарихида мундақ вәқәниң биринчи қетим йүз бериватқанлиқини, драматоргларниң буниңдин кейин заман тәлипигә лайиқ әсәрләрни барлиққа кәлтүрүшкә техиму көп күч чиқириш лазимлиқини ейтип, тиятир коллектипини, барлиқ тамашибинларни, пүткүл уйғур хәлқини тәбриклиди.

Алмата вилайити талғир наһийисигә қарашлиқ бесағаш йезисиниң турғуни исмаил розийеф болса, уйғур тиятири тарихиниң узун болуп, униң келәчикидин көп үмид күтидиғанлиқини оттуриға қоюп, мундақ деди: “тиятир өз тәрәққиятида нурғун аҗайип сәһнә әсәрлирини қойған. Әмди бүгүнки дәвргә кәлсәк, заман тәлипи дәймиз, андин хәлқимизниң ейталмай йүргән көңүлдики гәпләрни ейтидиған әсәрләр болсикән дәймиз. Байқишимчә, қоюлумиларда (әсәрләрдә) көпрәк тәрҗимә қоюлумилар көп болуватиду. Әмди бүгүнки заманға, хәлқимизниң көңлигә лайиқ, қоюлумилар аз, һәтта йоқ болуватиду. Тәлипимиз шуки, тиятиримиз келәчәктә яхши қоюлумиларға йәтсә, хәлқ өзи йүгүрүп баридиған күнләр кәлсә, дәп арман қилимиз”.

У тиятирниң келәчәктә тамашибинлар ишәнчини, шундақла мәмликәт президенти бәргән унванни толуқ ақлайдиғанлиқиға ишинидиғанлиқини билдүрүп, пүткүл юртдашлири намидин тиятир коллектипини қизғин тәбриклиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.