Qazaqistan Uyghur tiyatirigha akadémiyilik unwan bérildi

Ixtiyariy muxbirimiz oyghan
2016-12-12
Share
qatnashqan-musteqilliqi-uyghur-tiyatiri-artisliri.jpg Qazaqistan jumhuriyiti musteqilliqining 25 yilliqigha béghishlan'ghan "Tinchliq we razimenlikke 25 yil" mawzusluq féstiwalgha qatnashqan Uyghur tiyatiri artisliri. 2016-Yili 9-dékabir, astana.
RFA/Oyghan

Qazaqistan ammiwi axbarat wasitiliridin melum bolushiche, 9-dékabirda qazaqistan paytexti astana shehirining "Sari'arqa" ten-heriket meydanida qazaqistan jumhuriyiti musteqilliqining 25 yilliqigha béghishlan'ghan "Tinchliq we razimenlikke 25 yil" mawzusida féstiwal bolup ötti. Qazaqistan xelqi assambléyisining uyushturushida ötken bu féstiwalgha memliketning barliq rayonliridin qatnashqan étno-medeniyet merkezlirining heweskar hem kespiy kolléktipliri özlirining tiyatirlashturulghan sehnilirini, saz, naxsha, ussul we bashqimu eserlirini namayish qildi.

Mezkur féstiwalda qazaqistan prézidénti nursultan nazarbayéf koréyelikler we némis hem Uyghurlarning milliy tiyatirlirigha akadémiyilik unwan bérish heqqide qarar alghanliqini élan qildi.

Radi'omiz ziyaritini qobul qilghan quddus ghojamyarof namidiki jumhuriyetlik dölet Uyghur muzikiliq komédiye tiyatirining rézhissori, "Hörmet" ordénining sahibi yalqunjan shemiyéf Uyghur tiyatirigha mundaq unwanning bérilishining tiyatir kolléktipila emes, belki pütkül qazaqistan Uyghurlirigha bolghan chong hörmetning bir belgisi ikenlikini bildürüp, mundaq dédi: "Bu namning bérilishi biz, sen'etkarlar üchün chong unwan. Hazir bizning tiyatir akadémiyelik bolghandin kéyin, elwette, birinchidin, chong xushalliq, ikkinchidin, chong jawabkarliq. Pütünley qazaqistanda 56 tiyatir bolsa, shuning arisida yette-sekkizila akadémiyilik namni alghan. Némishqa bu unwanni béridu? chünki mushundaq unwanni alghanlarningki derijisi yuqiri bolushi kérek. Misalgha klassik eserler köp bolushi kérek. Omumiy kolléktipning bilimi yuqiri bolushi kérek. Men oylaymenki, kolléktipimiz shuninggha layiq. Prézidéntimizgha rehmet!".

Qazaqistan yazghuchilar ittipaqi Uyghur edebiyati kéngishining bashliqi, yazghuchi we dramatorg exmetjan hashirining pikriche, bügünki künde Uyghur tiyatirining memliket ichi we téshida minglighan tamashibinliri bar bolup, shularning teleplirini, éhtiyajlirini orunlashta tiyatir artisliri tinmay emgek qilmaqta. U tiyatirning qazaqistan medeniyitini rawajlandurushqa alahide töhpe qoshuwatqanliqini ilgiri sürüp, mundaq dédi: "Tiyatirimiz qazaqistan xelqining rohiy bayliqini yaritiwatqan chong bir dergah. Tiyatir 83 yil xelqqe xizmet qilip kéliwatidu. Uning programmisi, naxsha-sazliri, köpligen dramatorglirimiz mushu tiyatirimizning rohini kötürdi. Shu jümlidin bizmu öz küchimizni tiyatirning güllinishi, xelq'ara meydanda tiyatirimizning shan-shöhriti üchün bir az emgeklerni qilduq. Tiyatir programmisigha kirgen eserlerde dostluq, inaqliq, xelqler birliki mesililiri xelqimizge körsitiliwatidu".

E. Hashiri Uyghur tiyatirigha mundaq unwanning bérilishining peqet Uyghurlar üchünla emes, belki memliketning köp milletlik xelqi üchünmu chong weqe ikenlikini, tiyatir tarixida mundaq weqening birinchi qétim yüz bériwatqanliqini, dramatorglarning buningdin kéyin zaman telipige layiq eserlerni barliqqa keltürüshke téximu köp küch chiqirish lazimliqini éytip, tiyatir kolléktipini, barliq tamashibinlarni, pütkül Uyghur xelqini tebriklidi.

Almata wilayiti talghir nahiyisige qarashliq bésaghash yézisining turghuni isma'il roziyéf bolsa, Uyghur tiyatiri tarixining uzun bolup, uning kélechikidin köp ümid kütidighanliqini otturigha qoyup, mundaq dédi: "Tiyatir öz tereqqiyatida nurghun ajayip sehne eserlirini qoyghan. Emdi bügünki dewrge kelsek, zaman telipi deymiz, andin xelqimizning éytalmay yürgen köngüldiki geplerni éytidighan eserler bolsiken deymiz. Bayqishimche, qoyulumilarda (eserlerde) köprek terjime qoyulumilar köp boluwatidu. Emdi bügünki zaman'gha, xelqimizning könglige layiq, qoyulumilar az, hetta yoq boluwatidu. Telipimiz shuki, tiyatirimiz kélechekte yaxshi qoyulumilargha yetse, xelq özi yügürüp baridighan künler kelse, dep arman qilimiz".

U tiyatirning kélechekte tamashibinlar ishenchini, shundaqla memliket prézidénti bergen unwanni toluq aqlaydighanliqigha ishinidighanliqini bildürüp, pütkül yurtdashliri namidin tiyatir kolléktipini qizghin tebriklidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.